જામનગરમાં એક સરકારી કોન્ટ્રાક્ટર પાસેથી ઉંચા વ્યાજે નાણાં આપી બળજબરીપૂર્વક ગેરકાયદે વસૂલાત કરવાનો સનસનીખેજ મામલો સામે આવ્યો છે, જેને પગલે સમગ્ર રાજ્યમાં ખળભળાટ મચી ગયો છે. આ ગંભીર પ્રકરણની તપાસ માટે સુરેન્દ્રનગરના પોલીસ અધિક્ષક પ્રેમસુખ ડેલુના અધ્યક્ષસ્થાને એક વિશેષ તપાસ ટીમ (SIT) ની રચના કરવામાં આવી છે. આ કેસમાં પોલીસકર્મી અજયસિંહ ઝાલા સહિત કુલ ચાર વ્યક્તિઓ સામે ફરિયાદ નોંધવામાં આવી છે, જેમાંથી એક પોલીસકર્મીની સંડોવણીએ મામલાને વધુ પેચીદો બનાવ્યો છે.પ્રાપ્ત માહિતી અનુસાર, સરકારી કોન્ટ્રાક્ટર પાસેથી ગેરકાયદે ઉઘરાણીના આ મામલામાં પોલીસકર્મી અજયસિંહ ઝાલા અને અન્ય ત્રણ આરોપીઓના ઘર સહિતના સ્થળોએ તપાસ કામગીરી હાથ ધરવામાં આવશે. આરોપીઓની શોધખોળ માટે આસપાસના વિસ્તારોમાં પણ સઘન પ્રયાસો કરવામાં આવી રહ્યા છે. હાલ, આરોપીઓ સાથે સંકળાયેલા લોકોના નિવેદન લેવાની કામગીરી પણ ચાલુ છે, જે કેસની તપાસમાં મહત્વપૂર્ણ કડીઓ પૂરી પાડી શકે છે.

ફરિયાદી કોન્ટ્રાક્ટર દ્વારા કરવામાં આવેલા આક્ષેપો મુજબ, તેમની પાસેથી રૂપિયા 2 કરોડના ચેક મેળવી તેને ઇરાદાપૂર્વક બાઉન્સ કરાવવામાં આવ્યા હતા, અને ત્યારબાદ કાયદાકીય નોટિસ મોકલવામાં આવી હતી. આ ઉપરાંત, ધમકી આપીને નોટરાઇઝ્ડ લખાણો પણ કરાવી લેવામાં આવ્યા હોવાનો ઉલ્લેખ ફરિયાદમાં કરાયો છે. આ દાવાને સમર્થન આપવા માટે, ફરિયાદીએ વોટ્સએપ ચેટ્સ, કોલ રેકોર્ડિંગ્સ અને આંગણિયાની પહોંચ સહિતના પુરાવાઓ હોવાનો દાવો કર્યો છે, જે SIT તપાસમાં મુખ્ય આધાર બનશે.

આ પ્રકરણની વિગતવાર માહિતી આપતા જણાવાયું છે કે, સરકારી કોન્ટ્રાક્ટરે રૂપિયા 50 લાખની લોન લીધી હતી, જેના બદલામાં તેમણે અત્યાર સુધીમાં 1 કરોડ રૂપિયાથી વધુની રકમ ચૂકવી દીધી હતી. તેમ છતાં, તેમની પાસેથી વધુ 2 કરોડ રૂપિયાની ગેરકાયદેસર રીતે ઉઘરાણી કરવામાં આવી રહી હતી. આ ત્રાસથી કંટાળીને કોન્ટ્રાક્ટરે રાજકોટ રેન્જ આઇજી નિર્લિપ્ત રાય સમક્ષ રૂબરૂ રજૂઆત કરી હતી. કોન્ટ્રાક્ટરની રજૂઆત અને મામલાની ગંભીરતાને ધ્યાનમાં રાખીને, આઇજી દ્વારા તાત્કાલિક SITની રચના કરવાનો આદેશ આપવામાં આવ્યો હતો. SIT દ્વારા લોનની રકમથી બમણી વસૂલ્યા બાદ પણ ત્રાસ આપતા પોલીસ દ્વારા તપાસ શરૂ કરવામાં આવી છે.

આ SITમાં સુરેન્દ્રનગર, જામનગર, દ્વારકા અને રાજકોટ જેવા જિલ્લાઓના અનુભવી પોલીસ અધિકારીઓને શામેલ કરવામાં આવ્યા છે, જેથી તપાસ નિષ્પક્ષ અને ત્વરિત ગતિએ આગળ વધી શકે. ઉલ્લેખનીય છે કે, જામનગર સિટી બી ડિવિઝન પોલીસ સ્ટેશનમાં અગાઉ ફરજ બજાવતા અને હાલ સુરેન્દ્રનગર બદલી કરાયેલા પોલીસકર્મી અજયસિંહ મહાવીરસિંહ ઝાલા સહિત ચાર વ્યક્તિઓ સામે આ ગંભીર આરોપો મૂકવામાં આવ્યા છે. પોલીસ ખાતાના જ કર્મચારીની આ પ્રકારની સંડોવણી બહાર આવતા સમગ્ર પંથકમાં ચકચાર અને રોષની લાગણી ફેલાઈ છે. SITની તપાસ બાદ આ મામલે વધુ ચોંકાવનારા ખુલાસા થવાની શક્યતા છે.

TV9ના રિયાલિટી ચેકમાં MJ હોસ્ટેલના ભોજનમાં જીવાત, વાસી ખોરાક અને સ્વચ્છતાના અભાવનો પર્દાફાશ- જુઓ Video