નવરાત્રીમાં અંબાજી જવાના છો? શક્તિપીઠમાં નોરતાની ભવ્ય ઉજવણીની તડામાર તૈયારીઓ, જુઓ Video

શક્તિપીઠ અંબાજી 2026ની નવરાત્રીની ભવ્ય ઉજવણી માટે સંપૂર્ણપણે સજ્જ છે. મા અંબાના આશીર્વાદ મેળવવા અને ભક્તિભાવમાં લીન થવા માટે લાખો માઈભક્તોમાં ભારે ઉત્સાહ જોવા મળી રહ્યો છે. આગામી 11 ઑક્ટોબરથી શરૂ થનારી નવરાત્રી માટે અંબાજી મંદિરમાં અંતિમ તબક્કાની તૈયારીઓ પૂરજોશમાં ચાલી રહી છે, જેમાં ધાર્મિક વિધિઓ અને ભક્તોની સુવિધા બંને પર વિશેષ ધ્યાન કેન્દ્રિત કરવામાં આવ્યું છે.

નવરાત્રીના પાવન અવસરે અનેક ધાર્મિક કાર્યક્રમોનું આયોજન કરવામાં આવ્યું છે. નવરાત્રીના પ્રથમ દિવસે, એટલે કે 11 ઑક્ટોબરે, સવારે 9 વાગ્યે નીજ મંદિરમાં ઘટ સ્થાપન કરવામાં આવશે, જે પર્વનો શુભારંભ સૂચવે છે. આરતીનું સમયપત્રક પણ વિસ્તૃત રીતે ગોઠવવામાં આવ્યું છે. દરરોજ ત્રણ આરતીઓ થશે- સવારે માતાજીના ગર્ભગૃહની આરતી, ત્યારબાદ ઘટ સ્થાપનની આરતી અને સાંજે એક આરતી. આ ઉપરાંત, આઠમ અને શરદ પૂર્ણિમાના દિવસે સવારે 6 વાગ્યે વિશેષ મંગળા આરતી યોજાશે. આઠમના દિવસે નીજ મંદિરમાં વાવેલા જવારાનું ઉત્થાપન પણ કરવામાં આવશે.

નવરાત્રી દરમિયાનના અન્ય મહત્વપૂર્ણ કાર્યક્રમોમાં આસો સુદ આઠમે (સોમવારે) યોજાનાર યજ્ઞનો સમાવેશ થાય છે. 25 ઑક્ટોબરના રોજ દૂધ પૌવાની પૂનમ છે. આ દિવસે રાત્રે 12 વાગ્યે માતાજીને દૂધ પૌઆનો ભોગ ધરાવીને કપૂર આરતી કરવામાં આવશે. પૂર્ણિમાની આરતી 26 ઑક્ટોબરના રોજ સવારે 6 વાગ્યે યોજવામાં આવશે, જે નવરાત્રીની પૂર્ણાહુતિનું પ્રતિક છે.

માઈભક્તોને માતાજીના દર્શન કરવામાં કોઈ મુશ્કેલી ન પડે તે માટે મંદિર ટ્રસ્ટ અને વહીવટી તંત્ર દ્વારા વ્યાપક વ્યવસ્થા ગોઠવવામાં આવી છે. મોટી સંખ્યામાં શ્રદ્ધાળુઓ અંબાજી પહોંચવાની શક્યતાને ધ્યાનમાં રાખીને, દર્શન વ્યવસ્થાને સુચારુ બનાવવા પર વિશેષ ધ્યાન અપાઈ રહ્યું છે.

ભક્તો માટે યોગ્ય કતાર વ્યવસ્થા, પીવાના પાણીની સુવિધા, સ્વચ્છતા અને સુરક્ષા સહિતની તમામ સગવડો પૂરી પાડવામાં આવશે. ચાચર ચોકમાં ખેલૈયાઓ મા અંબાની ભક્તિમાં લીન થઈ ગરબાની રમઝટ બોલાવશે, જેના માટે પણ સુંદર આયોજન કરવામાં આવ્યું છે. આ સમગ્ર આયોજનનો હેતુ એ છે કે દરેક માઈભક્ત સરળતાથી માતાજીના દર્શન કરી શકે અને પવિત્ર નવરાત્રીના પર્વનો સંપૂર્ણ લાભ લઈ શકે.

ગાંધીનગર મેટ્રો સેવામાં ટેકનિકલ ખામી, વહેલી સવારે મુસાફરોને હાલાકી, જુઓ Video