અંકલેશ્વરમાં DJના ટેમ્પા નીચે 3 કચડાયા, એક બાળકીનું મોત, આખલાની અડફેટે 8 લોકો ઇજાગ્રસ્ત, જુઓ Video

ભરૂચના અંકલેશ્વરમાં ગણેશ આગમન યાત્રાનો ઉત્સાહ માતમમાં ફેરવાઈ ગયો હતો. યાત્રા દરમિયાન બે અલગ-અલગ અને ગંભીર અકસ્માતો થયા, જેના કારણે એક બાળકીનું મૃત્યુ થયું અને 10 થી વધુ લોકો ઘાયલ થયા. આ ઘટનાઓએ પંથકમાં શોક અને ચિંતાનો માહોલ ફેલાવ્યો છે.

ડીજે ટેમ્પાએ લીધો ભોગ

ગડખોલ ગામના માર્ગ પર શ્રીજીની આગમન યાત્રા નીકળી હતી. આ યાત્રામાં સામેલ DJના ટેમ્પાએ ત્રણ બાળકોને અડફેટે લીધા. અકસ્માત એટલો ગંભીર હતો કે એક બાળકી ટેમ્પા નીચે કચડાઈ ગઈ અને તેનું ઘટનાસ્થળે જ કરુણ મોત થયું. અન્ય બે બાળકોને ગંભીર ઈજાઓ પહોંચતા તેમને તાત્કાલિક હોસ્પિટલમાં ખસેડવામાં આવ્યા. પોલીસની પ્રાથમિક તપાસ મુજબ, ટેમ્પાના મૂળ ડ્રાઈવરે કોઈ અન્ય વ્યક્તિને ચલાવવા આપ્યો હતો, જેના કારણે આ દુર્ઘટના સર્જાઈ હતી.

DJના અવાજથી ભડકેલા આખલાનો આતંક

આ જ યાત્રા દરમિયાન અંકલેશ્વરના GIDC વિસ્તારમાં એક આખલાએ ભારે આતંક મચાવ્યો હતો. યાત્રામાં વાગતા જોરદાર ડીજેના અવાજથી આખલો ભડકી ગયો હતો અને તેણે યાત્રાળુઓ પર હુમલો કર્યો. આ ઘટનામાં 8 લોકો ઘાયલ થયા હતા. સ્થાનિકોનું માનવું છે કે DJના અવાજને કારણે આખલાએ નિયંત્રણ ગુમાવ્યું હતું.