Bihar :’ધ કાશ્મીર ફાઇલ્સ’ જોવા પહોંચ્યા બિહારના ધારાસભ્યો, નાયબ મુખ્યમંત્રી અને સ્પીકર , કોંગ્રેસે કહ્યું ગોધરા ઉપર પણ ફિલ્મ બનવી જોઈએ
સોમવારે બિહાર સરકાર વતી તમામ ધારાસભ્યોને ફિલ્મ ધ કાશ્મીર ફાઇલ બતાવવામાં આવી હતી. ફિલ્મના સ્પેશિયલ શો દરમિયાન વિપક્ષના મોટાભાગના ધારાસભ્યો ગાયબ હતા. આ દરમિયાન કોંગ્રેસના મહિલા ધારાસભ્યએ ફિલ્મની પ્રશંસા કરતા ગોધરા પર પણ ફિલ્મ બનાવવાની માંગ કરી હતી.
Bihar: ધારાસભ્યોએ પટનાના મોના સિનેમામાં કાશ્મીરી પંડિતો (Kashmiri Pandit) પર બનેલી ફિલ્મ ‘ધ કાશ્મીર ફાઇલ્સ’ (The Kashmir Files) જોઈ. શાસક પક્ષના મોટાભાગના ધારાસભ્યો (MLA)એ ફિલ્મ જોઈ હતી. પરંતુ વિરોધ પક્ષમાંથી માત્ર એક-બે ધારાસભ્યો જ ફિલ્મ જોવા આવ્યા હતા. વિપક્ષના આ ધારાસભ્યોએ ફિલ્મની પ્રશંસા કરી હતી. આ સાથે તેમણે ગુજરાતની ગોધરા ઘટના પર ‘ધ કાશ્મીર ફાઇલ્સ‘ જેવી ફિલ્મ બનવી જોઈએ તેવી માંગ કરી હતી. સોમવારે કોંગ્રેસના બે ધારાસભ્યો પ્રતિમા દાસ અને નીતુ કુમારી બિહાર સરકાર દ્વારા આયોજિત ફિલ્મનો સ્પેશિયલ શો જોવા પહોંચ્યા હતા. ફિલ્મ જોઈને તેણે વખાણ કર્યા અને સમર્થન કર્યું કે કાશ્મીરી પંડિતો સાથે અત્યાચાર થયો છે.
આ સાથે બંને ધારાસભ્યોએ કહ્યું કે, જે રીતે કાશ્મીરી પંડિતોનું સત્ય સામે આવ્યું છે તેવી જ રીતે ગોધરાકાંડનું સત્ય પણ બહાર આવવું જોઈએ.
ગોધરા પર ફિલ્મ બનવી જોઈએ
કોંગ્રેસના ધારાસભ્ય પ્રતિમા દાસે કહ્યું કે, આ ફિલ્મ દ્વારા જે રીતે કાશ્મીરનું સત્ય સામે આવ્યું છે. તેવી જ રીતે ગોધરા પર પણ ફિલ્મ બનવી જોઈએ જેથી તેનું સત્ય સૌની સામે આવે. બીજી તરફ કોંગ્રેસના હિસુઆ ધારાસભ્ય નીતુ કુમારીએ કહ્યું કે કોંગ્રેસે દેશ માટે ઘણું બલિદાન આપ્યું છે. તેમણે કહ્યું કે અમે વડાપ્રધાનને ગુમાવ્યા છે. હવે જ્યારે ધ કાશ્મીર ફાઇલ્સ જેવી ફિલ્મ બની રહી છે ત્યારે ગોધરા પર પણ ફિલ્મ બનવી જોઈએ જેથી લોકો તેનું સત્ય જાણી શકે.
આરજેડીના એમએલસી આરકે પ્રસાદ પણ પહોંચ્યા
સોમવારે નાયબ મુખ્યમંત્રી તારકિશોર પ્રસાદના નેતૃત્વમાં આ ફિલ્મ વિધાનસભાના બંને ગૃહોના સભ્યોને બતાવવામાં આવી હતી. મંત્રીઓની સાથે બિહાર વિધાન પરિષદના ઘણા મંત્રીઓ અને વિધાનસભા અધ્યક્ષ પણ ફિલ્મ જોવા પહોંચ્યા હતા. તો વિપક્ષ વતી આરજેડી એમએલસી આરકે પ્રસાદ અને કોંગ્રેસના ધારાસભ્ય પ્રતિમા દાસ પહોંચ્યા હતા. કહેવામાં આવી રહ્યું છે કે ફિલ્મ દરમિયાન ઘણા ધારાસભ્યો ભાવુક થઈ ગયા હતા.
