Breaking News : કેરળ સ્ટોરી 2 આવતીકાલે રિલીઝ નહીં થાય, નિર્માતાઓને મોટો ઝટકો, ફિલ્મને હોલ્ડ પર રાખવામાં આવી

કેરળ હાઈકોર્ટે વિવાદિત ફિલ્મ ધ કેરળ સ્ટોરી 2 ગોઝ બિયોન્ડના મેકર્સને મોટો ઝટકો લાગ્યો છે. કોર્ટે ફિલ્મ પર હાલ વચગાળાનો સ્ટે લગાવી દીધો છે. કોર્ટે સેન્ટ્રલ બોર્ડ ઓફ ફિલ્મ સર્ટિફિકેશન (CBFC) ને અરજદારની અરજી પર વિચાર કરવા અને આગામી બે અઠવાડિયામાં આ મામલે નિર્ણય લેવાનો નિર્દેશ આપ્યો છે. ફિલ્મ વિરુદ્ધ કોર્ટમાં ત્રણ અરજીઓ દાખલ કરવામાં આવી હતી, જેમાં તેનું સેન્સર સર્ટિફિકેટ રદ કરવા અને તેની રિલીઝ અટકાવવાની માંગ કરવામાં આવી હતી.

અરજીકર્તાઓએ કહ્યું હતુ કે, આ ફિલ્મ કેરળ રાજ્યની ભૂલની તસ્વીરો રજુ કરી રહી છે. આ ફિલ્મના રિલીઝ થવાથી સાંપ્રદાયિક માહોલ બગડી શકે છે. જસ્ટિસ કુરિયન થોમસની સિંગલ બેન્ચે આ મામલે સુનાવણી કરતા કહ્યું કે, પહેલી નજરમાં એવું લાગે છે કે,સીબીએફસીએ ફિલ્મનું સર્ટિફિકેટ આપતી વખતે સમજદારીથી કામ કર્યું નથી.

CBFCએ બે અઠવાડિયામાં આ બાબત પર વિચાર કરવો પડશે

કોર્ટે CBFCને અરજદારો દ્વારા દાખલ કરવામાં આવેલી રિવિઝન અરજી પર બે અઠવાડિયામાં વિચાર કરવાનો નિર્દેશ આપ્યો છે. જ્યાં સુધી CBFC નવો આદેશ જાહેર ન કરે ત્યાં સુધી કોર્ટે ફિલ્મની રિલીઝ પર રોક લગાવી દીધી છે. સુનાવણી દરમિયાન, હાઇકોર્ટે જણાવ્યું હતું કે, તે સામાન્ય રીતે ફિલ્મની રિલીઝમાં દખલ કરવાથી દૂર રહે છે, પરંતુ જ્યારે કોઈ ફિલ્મની સામગ્રીમાં કથિત રીતે સાંપ્રદાયિક સૌહાર્દને ખલેલ પહોંચાડવાની સંભાવના હોય છે, ત્યારે તેને હસ્તક્ષેપ કરવાની ફરજ પડે છે.

25 ફેબ્રુઆરીના રોજ થયેલી સુનાવણી દરમિયાન કોર્ટે સ્પષ્ટ કર્યું હતુ કે, જ્યાં સુધી તમામ પાર્ટીઓને સાંભળી લેવામાં ન આવે ત્યાં સુધી ફિલ્મ રિલીઝ કરાશે નહી. કોર્ટનું કહેવું છે કે, હજુ સુનાવણી પેન્ડિંગ છે. ત્યારે ફિલ્મ જો રિલીઝ થાય છે તો અરજી નકામી જશે.

અરજદારોની ચિંતાઓ વાજબી :HC

સુનાવણી દરમિયાન, કોર્ટે સ્વીકાર્યું હતું કે, ફિલ્મ અંગે અરજદારોની ચિંતાઓ કાયદેસર અને વાજબી લાગી હતી. ફિલ્મને સત્ય ઘટનાઓથી પ્રેરિત તરીકે રજૂ કરવામાં આવી રહી છે અને ફિલ્મની વાર્તાનો કેરળ સાથે કોઈ સંબંધ ન હોવા છતાં, ટાઈટલમાં રાજ્યનું નામ પણ દર્શાવવામાં આવ્યું છે.

ધ કેરળ સ્ટોરી 2 2023માં આવેલી ધ કેરળ સ્ટોરીની સીકવલ છે. પહેલી ફિલ્મને લઈને પણ ખુબ વિવાદ થયો હતો. ફિલ્મે શાનદાર કમાણી કરી હતી. ફિલ્મને વિપુલ અમૃતલાલ શાહે પ્રોડ્યુસ કરી છે. ધ કરેળ સ્ટોરી 2નું નિર્દેશન કામાખ્યા નારાયણ સિંહે કર્યું છે. ફિલ્મ 27 ફેબ્રુઆરીના રોજ રિલીઝ થવાની હતી પરંતુ હાલમાં આ ફિલ્મ રિલીઝ થશે નહી.

હિન્દી ફિલ્મ ઈન્ડસ્ટ્રી જેને બોલિવુડના નામથી ઓળખવામાં આવે છે. બોલિવૂડનું નામ અંગ્રેજી ફિલ્મ ઈન્ડસ્ટ્રી હોલીવુડની તર્જ પર રાખવામાં આવ્યું હતું. અહી ક્લિક કરો