શું તમે જાણો છો ? મતદાન મથકના એક બુથ ઉપર ટાંકણીથી લઈને પોસ્ટર સુધીની 170 વસ્તુઓ હોય છે
મતદાનના દિવસે, એક મતદાન કેન્દ્ર ઉપર ટાંકણીથી લઈને દિવાલ પર લગાવવાના પોસ્ટર્સ સુધીની નાની મોટી 170 જેટલી ચીજવસ્તુઓની જરૂર પડતી હોય છે. આ 170 વસ્તુમાં સ્ટેશનરીની જ આશરે 31 જેટલી વસ્તુઓ હોય છે જેમા, કવર, ફોર્મ, અવિલોપ્ય શાહી જેવી અનેક વસ્તુઓનો સમાવેશ થાય છે.
ગુજરાતની 25 સહીત 12 રાજ્ય અને કેન્દ્ર શાસિત પ્રદેશની 93 બેઠકો માટે આવતીકાલ 7મી મેના રોજ યોજાનાર લોકસભાની ત્રીજા તબક્કાની સામાન્ય ચૂંટણી આડે હવે ગણતરીના કલાકો જ બાકી રહ્યા છે. આવતીકાલ 7મી મેના રોજ સવારે 7 કલાકે દરેક મતદાન મથકે મતદાનનો પ્રારંભ થશે. ગુજરાતની 25 બેઠકોની સાથે સાથે અમદાવાદ જિલ્લાના ચૂંટણી તંત્ર દ્વારા, લોકસભાની ચૂંટણીની તમામ તૈયારીઓ પૂર્ણ કરી દેવાઈ છે.
આવતીકાલ 7મીમેના રોજ ગરમીનો પ્રકોપ રહેવાનો હોવાની આગાહી હવામાન વિભાગે જાહેર કરી છે ત્યારે, મતદાન કરવા મતદાન મથકે આવનાર મતદારો એવા નાગરિકો અને ચૂંટણીની ફરજમાં રોકાયેલા કર્મચારીઓને હિટ વેવની અસર ના થાય તે માટે ચૂંટણી પંચ દ્વારા તમામ પ્રકારની વ્યવસ્થાઓ કરવામાં આવી છે.
ચૂંટણી પંચ દ્વારા જે-તે વિધાનસભા મતવિસ્તારમાં સમાવિષ્ટ થતા મતદાન બુથની સંખ્યા મુજબ પ્રતિ બુથ એક વિશેષ કિટ તૈયાર કરવામાં આવે છે. આ કિટમાં ચૂંટણી પંચના નિર્દેશ અનુસાર નાની મોટી આશરે 170 જેટલી વસ્તુઓ રાખવામાં આવે છે. બુથ માટે તૈયાર કરાયેલ વિશેષ કિટમાં નાનામાં નાની ટાંકણીથી લઈને દિવલ પર લગાવવાના પોસ્ટર સુધીની તમામ પ્રકારની નાની મોટી 170 સામગ્રીઓ હોય છે. આ સામગ્રીમાં પેન્સિલ, મીણબત્તી, સેફ્ટીપિન, લાખ, માચિસ બોક્સ, ગુંદર, બોલપેન વગેરેનો સમાવેશ થાય છે.
જેમા સ્ટેશનરીની જ આશરે 31 જેટલી વસ્તુઓ હોય છે જેમા, કવર, ફોર્મ, અવિલોપ્ય શાહી જેવી અનેક વસ્તુઓનો સમાવેશ થાય છે. આ બધી સામગ્રીઓ રાજ્ય ચૂંટણી તંત્ર તથા જિલ્લા ચૂંટણી તંત્ર દ્વારા આપવામાં આવે છે.
જો અમદાવાદની વાત કરવામાં આવે તો, ગરમી અને ચૂંટણીને ધ્યાને રાખીને જિલ્લા ચૂંટણી અધિકારીના માર્ગદર્શન હેઠળ દરેક બુથ મુજબ 3 કિટ તૈયાર કરવામાં આવી છે. ચૂંટણી પ્રક્રિયામાં ઉપયોગમાં લેવાતી જરૂરી વસ્તુઓ ઉપરાંત એક વેલ્ફેર કિટ, બીજી હાઇજીન કિટ અને ત્રીજી મેડિકલ કિટ તમામ બૂથમાં રાખવામાં આવશે.
આ ત્રણ પૈકી વેલ્ફેર કિટમાં સૂકો નાસ્તો, ચોકલેટ, બિસ્કિટ જેવું રાખવામાં આવશે. જ્યારે હાઈજીન કિટમાં સાબુ, મોસ્કિટો રેપિલન્ટ કિટ જેવી વસ્તુઓ રખાશે. અને મેડિકલ કીટમાં જરૂરી દવાઓ અને ORSના પેકેટ વગેરે મૂકવામાં આવશે.