SBI ની FD પર કેટલું મળશે વ્યાજ ? ₹1 લાખ પર મેળવો ‘આટલું રિટર્ન’
સુરક્ષિત અને શ્રેષ્ઠ રિટર્ન માટે સ્ટેટ બેંક ઓફ ઇન્ડિયા (SBI) ની ફિક્સ્ડ ડિપોઝિટ (FD) હંમેશા લોકોની પહેલી પસંદ રહી છે. એવામાં શું તમે જાણો છો કે, સામાન્ય નાગરિકો અને સિનિયર સિટિઝન્સને ₹1 લાખના રોકાણ પર 1, 3, 5 અને 10 વર્ષમાં કેટલું રિટર્ન મળે છે? એટલું જ નહીં, શું FD થી થતી કમાણી સંપૂર્ણપણે ટેક્સ-ફ્રી હોય છે?
શું તમે સુરક્ષિત રોકાણ માટે સ્ટેટ બેંક ઓફ ઇન્ડિયા (SBI) માં ફિક્સ્ડ ડિપોઝિટ (FD) કરવાનું વિચારી રહ્યા છો? તો તમારા માટે એ જાણવું ખૂબ જ જરૂરી છે કે, નક્કી કરેલો સમય પૂરો થવા પર તમારા હાથમાં કુલ કેટલા પૈસા આવશે ? FD પર મળતી મેચ્યોરિટી રકમ મુખ્યત્વે બેંકના વ્યાજ દર અને તમારા રોકાણના સમયગાળા પર આધાર રાખે છે.
SBIના હાલના રિટેલ ટર્મ ડિપોઝિટ દરો અનુસાર ચાલો સમજીએ કે, સામાન્ય નાગરિકો અને વરિષ્ઠ નાગરિકો (સીનિયર સિટિઝન્સ) માટે ₹1 લાખનું રોકાણ 1 થી લઈને 10 વર્ષમાં વધીને કેટલું થશે? બીજું કે, આના પર ટેક્સના કયા નિયમો લાગુ પડે છે?
સામાન્ય નાગરિકો માટે: ₹1 લાખના રોકાણ પર કેટલું રિટર્ન મળશે?
સામાન્ય ગ્રાહકો માટે SBIના વર્તમાન FD દરો અને ₹1 લાખ પર મળતી અંદાજિત મેચ્યોરિટી રકમ આ મુજબ છે:
- 1 વર્ષની FD (6.25% વ્યાજ દર): 1 વર્ષ પૂરૂં થવા પર તમારા ₹1 લાખ વધીને લગભગ ₹1,06,398 થઈ જશે.
- 3 વર્ષની FD (6.30% વ્યાજ દર): 3 વર્ષના સમયગાળા માટે જમા કરાયેલી રકમ વધીને લગભગ ₹1,20,642 થઈ જશે.
- 5 વર્ષની FD (6.05% વ્યાજ દર): 5 વર્ષના રોકાણ પર આ રકમ લગભગ ₹1,34,982 થઈ જશે.
- 10 વર્ષની FD: જો 10 વર્ષના લાંબા સમયગાળા માટે રોકાણ કરવામાં આવે, તો ₹1 લાખનું આ રોકાણ વધીને લગભગ ₹1,82,400 ની આસપાસ પહોંચી જશે.
વરિષ્ઠ નાગરિકોને કેટલો ફાયદો?
SBI વરિષ્ઠ નાગરિકોને (60 વર્ષ કે તેથી વધુ) સામાન્ય દરોની સરખામણીએ 0.50% (50 Bps) વધુ વ્યાજ આપે છે.
- 1 વર્ષની FD (6.75% વ્યાજ દર): વરિષ્ઠ નાગરિકો માટે ₹1 લાખનું રોકાણ 1 વર્ષમાં વધીને લગભગ ₹1,06,920 થઈ જશે.
- 3 વર્ષની FD (6.80% વ્યાજ દર): 3 વર્ષના સમયગાળામાં આ રકમ વધીને લગભગ ₹1,22,430 થઈ જશે.
- 5 વર્ષની FD (7.05% વ્યાજ દર): 5 વર્ષમાં 7% થી વધુ દર સાથે આ રકમ વધીને લગભગ ₹1,41,680 (અથવા લગભગ ₹1.42 લાખ) થઈ જશે.
- 10 વર્ષની FD: લાંબા સમયગાળા એટલે કે 10 વર્ષમાં વરિષ્ઠ નાગરિકોના ₹1 લાખ વધીને લગભગ ₹2,01,000 ના સ્તરને પાર કરી જશે.
શું FDમાંથી મળતા પૈસા સંપૂર્ણપણે ટેક્સ-ફ્રી હોય છે?
ઘણીવાર રોકાણકારોને લાગે છે કે, FDના બધા પૈસા ટેક્સ-ફ્રી હોય છે પરંતુ એવું નથી. ઇન્કમ ટેક્સના હાલના નિયમો અનુસાર, FD પર મળતું વ્યાજ સંપૂર્ણપણે ટેક્સપાત્ર (Taxable) હોય છે.
- ટેક્સની જવાબદારી: તમારે FDના વ્યાજ પર કેટલો ટેક્સ ચૂકવવો પડશે, તે તમારી કુલ વાર્ષિક આવક અને તમારા દ્વારા પસંદ કરવામાં આવેલા ટેક્સ સ્લેબ (Old or New Tax Regime) પર આધાર રાખે છે.
- ટીડીએસ (TDS) કપાત: બેંકો દ્વારા FDના વ્યાજ પર એક નક્કી કરેલી મર્યાદા પછી સ્રોત પર કર કપાત (TDS) કરવામાં આવે છે. ધ્યાન રાખો કે ટીડીએસ એ કોઈ વધારાનો ટેક્સ નથી. ઇનકમ ટેક્સ રિટર્ન (ITR) ફાઇલ કરતી વખતે તમે તેને તમારી કુલ ટેક્સ જવાબદારી સાથે એડજસ્ટ કરી શકો છો અથવા ટેક્સ રિફંડ તરીકે ક્લેમ કરી શકો છો.
- ફોર્મ 15H દ્વારા TDSમાંથી રાહત: વરિષ્ઠ નાગરિકો બેંકમાં Form 15H જમા કરાવીને TDS કપાતથી બચી શકે છે. આ માટેની શરત એ છે કે, કલમ 87A ની છૂટ અને અન્ય કપાત બાદ તેમની કુલ આવક ટેક્સ ફ્રી મર્યાદા એટલે કે ન્યૂ ટેક્સ રિજીમમાં ₹12 લાખ અને ઓલ્ડ ટેક્સ રિજીમમાં ₹5 લાખથી ઓછી હોવી જોઈએ.
નોંધ: અહીં આપવામાં આવેલી માહિતી ફક્ત જાણકારી માટે છે. TV9 Gujarati કોઈપણ રીતે શેરમાં, સોના-ચાંદીમાં, મ્યુચ્યુઅલ ફંડમાં અને IPO માં પૈસા લગાવવાની કે વેચવાની સલાહ આપતું નથી. બજારમાં રોકાણ સંભવિત જોખમ સાથે સંકળાયેલું છે. રોકાણ કરતા પહેલા તમારા નાણાંકીય સલાહકાર અથવા માર્કેટ એક્સપર્ટની સલાહ જરૂરથી લો.
દુનિયામાં રમાઈ રહ્યો છે ‘સોનાનો સૌથી મોટો ખેલ’ ! બેંકોએ એકસાથે ખરીદ્યું 39 ટન ગોલ્ડ, આખરે શું થવાનું છે ‘વિશ્વમાં’?
