LPG સિલિન્ડર મોંઘો થશે? સરકાર નવા શુલ્ક પર કરી રહી છે વિચારણા, જાણો સમગ્ર મામલો
ભારતમાં LPG અને કુદરતી ગેસના ભાવમાં આગામી સમયમાં વધારો થઈ શકે છે. કેન્દ્ર સરકાર ઉર્જા સુરક્ષા કાર્યક્રમને મજબૂત કરવા માટે LPG અને CNG/PNG પર વધારાનો શુલ્ક લાદવા વિચારણા કરી રહી છે.
ભારતમાં એલપીજી (LPG) સિલિન્ડરના ભાવ આગામી સમયમાં વધી શકે તેવી ચર્ચાઓ ચાલી રહી છે. તેનું કારણ એ છે કે કેન્દ્ર સરકાર એલપીજી તેમજ કુદરતી ગેસ (PNG/CNG) પર વધારાનું શુલ્ક લાદવાના પ્રસ્તાવ પર વિચાર કરી રહી હોવાનું અહેવાલોમાં જણાવવામાં આવ્યું છે. જોકે, આ અંગે સરકાર તરફથી હજુ સુધી કોઈ સત્તાવાર જાહેરાત કરવામાં આવી નથી.
અહેવાલો મુજબ, ઈરાન અને અમેરિકા વચ્ચે વધતા તણાવ અને વૈશ્વિક ઊર્જા પુરવઠા પર તેની અસરને ધ્યાનમાં રાખીને ભારત પોતાની ઊર્જા સુરક્ષા વધુ મજબૂત બનાવવા માંગે છે. આ માટે સરકાર લાંબા ગાળાના ઇંધણ સંગ્રહ (Energy Reserve) કાર્યક્રમને વિસ્તૃત કરવાની યોજના બનાવી રહી હોવાનું કહેવાય છે.
LPG અને કુદરતી ગેસ પર કેટલું શુલ્ક લાગી શકે?
માહિતી અનુસાર, સરકાર એલપીજી પર પ્રતિ કિલોગ્રામ આશરે ₹1.29 અને કુદરતી ગેસ પર પ્રતિ સ્ટાન્ડર્ડ ક્યુબિક મીટર ₹1.43 જેટલી ફી લાદવાનો વિચાર કરી રહી છે. જો આ પ્રસ્તાવને મંજૂરી મળે તો 14.2 કિલોગ્રામના ઘરેલુ LPG સિલિન્ડરની કિંમતમાં અંદાજે ₹18નો વધારો થઈ શકે છે.
અહેવાલમાં એવો પણ દાવો કરવામાં આવ્યો છે કે આ શુલ્ક દ્વારા દર વર્ષે અંદાજે 42 અબજ રૂપિયા (લગભગ 1.5 અબજ ડોલર) એકત્ર કરવાની યોજના છે. જોકે, આ રકમ કેવી રીતે વસૂલવામાં આવશે તે અંગે હજુ સુધી કોઈ સ્પષ્ટ માહિતી સામે આવી નથી.
સરકાર આ નાણાં ક્યાં ખર્ચશે?
મીડિયા અહેવાલો અનુસાર, આગામી દસ વર્ષમાં ભારતના ઊર્જા સંગ્રહ કાર્યક્રમ પાછળ અંદાજે 42 અબજ ડોલર જેટલો ખર્ચ થવાનો અંદાજ છે. આમાંથી મોટો હિસ્સો નવા ઇંધણ સંગ્રહ માળખાના નિર્માણ માટે ખર્ચવામાં આવશે, જ્યારે બાકીની રકમ વ્યૂહાત્મક ઇંધણ અનામત (Strategic Fuel Reserve) તૈયાર કરવા માટે ઉપયોગમાં લેવામાં આવશે.
જો આ યોજના અમલમાં આવશે તો ભારતનો ઊર્જા સંગ્રહ કાર્યક્રમ માત્ર ક્રૂડ ઓઇલ પૂરતો મર્યાદિત નહીં રહે, પરંતુ તેમાં LPG અને LNG જેવા ઇંધણનો પણ સમાવેશ થઈ શકે છે.
હજુ સુધી કોઈ સત્તાવાર નિર્ણય નથી
મહત્વની વાત એ છે કે હાલ આ માત્ર પ્રસ્તાવના તબક્કામાં છે. કેન્દ્ર સરકાર દ્વારા LPG અથવા કુદરતી ગેસ પર નવા શુલ્ક અંગે હજુ સુધી કોઈ સત્તાવાર જાહેરાત કે મંજૂરી આપવામાં આવી નથી. તેથી ગ્રાહકોએ સોશિયલ મીડિયા અથવા અપ્રમાણિત માહિતી પર વિશ્વાસ કરતા પહેલા સરકારના સત્તાવાર નિવેદનની રાહ જોવી જોઈએ.
ગુજરાતમાં એનાલોગ પનીર, ચીઝ અને બટર પર પ્રતિબંધ, લોકોના સ્વાસ્થ્ય માટે મહત્વપૂર્ણ નિર્ણય
