જયંત ચૌધરીએ ક્રિપ્ટોકરન્સીમાં કર્યું રોકાણ, મોદી કેબિનેટમાં આવું કરનાર પ્રથમ મંત્રી

મોદી સરકારમાં મંત્રી અને રાષ્ટ્રીય લોકદળના પ્રમુખ જયંત ચૌધરીએ પોતાની સત્તાવાર સંપત્તિનો ખુલાસો કર્યો છે. PMOની વેબસાઇટ પર આપેલી માહિતીમાં તેમણે ક્રિપ્ટોકરન્સીમાં રોકાણ જાહેર કર્યું છે. મોદી કેબિનેટમાં આ પહેલો કિસ્સો છે જ્યારે કોઈ મંત્રીએ ક્રિપ્ટોકરન્સીમાં રોકાણ કર્યું હોય.

જયંત ચૌધરીએ ક્યાં રોકાણ કર્યું?

એક મીડિયા અનુસાર ડોક્યુમેન્ટ્સ દર્શાવે છે કે કૌશલ્ય વિકાસ અને ઉદ્યોગસાહસિકતા રાજ્ય મંત્રી (સ્વતંત્ર હવાલો) જયંત ચૌધરીએ 31 માર્ચ 2025 સુધીમાં ક્રિપ્ટોકરન્સી (વર્ચ્યુઅલ ડિજિટલ એસેટ્સ) માં 21,31,630 રૂપિયાનું રોકાણ જાહેર કર્યુ. તેમની પત્ની, ચારુ સિંહે ક્રિપ્ટોકરન્સી હોલ્ડિંગ્સમાં 22,41,951 રૂપિયાનો ખુલાસો કર્યો હતો. બંનેએ ભંડોળના સ્ત્રોત તરીકે વ્યક્તિગત બચતનો ઉલ્લેખ કર્યો હતો, પરંતુ ક્રિપ્ટોકરન્સીનું નામ આપ્યું ન હતું.

ક્રિપ્ટો રોકાણોની જાણ કરી

કેન્દ્રીય મંત્રીમંડળના મંત્રીઓની આવક દર વર્ષે પ્રધાનમંત્રી કાર્યાલયની વેબસાઇટ પર પ્રકાશિત થાય છે. જૂન 2024 ના તેમના ફાઇલિંગમાં, જયંત ચૌધરી અને ચારુ સિંહે અનુક્રમે રૂપિયા 17.9 લાખ અને રૂપિયા 19 લાખના ક્રિપ્ટો રોકાણોની જાણ કરી હતી, જે ત્યારથી 19% અને 18% વધ્યા છે.

જયંત મોદી સરકારમાં મંત્રી છે

રાજ્યસભાના સભ્ય અને રાષ્ટ્રીય લોકદળ (RLD) ના રાષ્ટ્રીય અધ્યક્ષ જયંત ચૌધરી જૂન 2024 માં મોદી સરકારમાં જોડાયા હતા. તેમની પાસે શિક્ષણ મંત્રાલયમાં રાજ્યમંત્રીનો હવાલો પણ છે. તેમની જાહેરાત કેન્દ્રીય મંત્રીઓની સામાન્ય સંપત્તિથી અલગ છે. જેમાં સામાન્ય રીતે જમીન, મકાનો, ફિક્સ્ડ ડિપોઝિટ, શેર, મ્યુચ્યુઅલ ફંડ, ઝવેરાત, વાહનો અને કેટલાક કિસ્સાઓમાં શસ્ત્રોનો સમાવેશ થાય છે.

જયંતની મિલકત કેટલી છે?

એકંદરે, જયંત ચૌધરીએ 31 માર્ચ, 2025 સુધીમાં 33.23 કરોડ રૂપિયા (વર્તમાન બજાર મૂલ્ય) ની સ્થાવર સંપત્તિ અને 14.51 કરોડ રૂપિયાની જંગમ સંપત્તિ જાહેર કરી છે. જ્યારે તેમની પત્નીએ 2.15 કરોડ રૂપિયા (વર્તમાન બજાર મૂલ્ય) ની સ્થાવર સંપત્તિ અને 9.54 કરોડ રૂપિયાની જંગમ સંપત્તિ જાહેર કરી છે. આ પરંપરાગત હોલ્ડિંગ્સથી વિપરીત, ભારતમાં ક્રિપ્ટોકરન્સી અનિયંત્રિત છે. ભારતીય રિઝર્વ બેંકે વારંવાર રોકાણકારોને વર્ચ્યુઅલ કરન્સીના નાણાકીય, કાનૂની અને સુરક્ષા જોખમો વિશે ચેતવણી આપી છે. જ્યારે સરકારે આદર્શ નિયમો ઘડતા પહેલા આંતરરાષ્ટ્રીય સર્વસંમતિની જરૂરિયાત પર ભાર મૂક્યો છે.

આવી સંપત્તિઓમાંથી થતી આવક આવકવેરા કાયદા હેઠળ કરપાત્ર છે

સંસદના ચોમાસુ સત્રમાં, નાણા રાજ્યમંત્રી પંકજ ચૌધરીએ લોકસભાને માહિતી આપી હતી કે સરકાર ક્રિપ્ટોકરન્સી પર ડેટા એકત્રિત કરતી નથી. 28 જુલાઈ, 2025 ના રોજ એક લેખિત જવાબમાં, તેમણે કહ્યું હતું કે, “ભારતમાં ક્રિપ્ટો સંપત્તિઓ અનિયંત્રિત છે અને સરકાર આ સંપત્તિઓનો ડેટા એકત્રિત કરતી નથી.” જો કે, તેમણે નિર્દેશ કર્યો હતો કે આવી સંપત્તિઓમાંથી થતી આવક આવકવેરા કાયદા હેઠળ કરપાત્ર છે. કંપનીઓએ નાણાકીય નિવેદનોમાં ક્રિપ્ટો એક્સપોઝર જાહેર કરવું પડશે અને વર્ચ્યુઅલ ડિજિટલ સંપત્તિઓ (VDA) માં વ્યવહારોને માર્ચ 2023 થી પ્રિવેન્શન ઓફ મની લોન્ડરિંગ એક્ટ (PMLA) હેઠળ લાવવામાં આવ્યા છે.