પેરિસ ઓલિમ્પિક 2024નો ઉદઘાટન સમારોહ 26 જુલાઈએ યોજાનાર છે. આ ઈવેન્ટમાં 10500 ખેલાડીઓ ભાગ લેશે. તેમના સિવાય હજારો દર્શકો અને મહેમાનો આ કાર્યક્રમમાં ભાગ લેશે. આ દરમિયાન 128 વર્ષથી ચાલી આવતી પરંપરાને તોડવામાં આવશે. ઉદઘાટન સમારોહનો સમગ્ર કાર્યક્રમ એફિલ ટાવર અને સીન નદી ખાતે યોજાનાર છે. ઓલિમ્પિક ગેમ્સની શરૂઆત 1896માં થઈ હતી, ત્યારથી લઈને અત્યાર સુધી સ્ટેડિયમમાં ઉદ્ઘાટન સમારોહ યોજાય છે. આ પ્રથમ વખત છે જ્યારે સ્ટેડિયમની બહાર આ કાર્યક્રમનું આયોજન કરવામાં આવશે. ચાલો જાણીએ કે ઓપનિંગ સેરેમની દરમિયાન શું થશે, કઈ ખાસ હસ્તીઓ પરફોર્મ કરશે અને તમે તેને ક્યાં જોઈ શકશો.
ઓપનિંગ સેરેમની 26 જુલાઈના રોજ પેરિસના સમય મુજબ સાંજે 7.30 વાગ્યે શરૂ થશે, એટલે કે તમે તેને ભારતીય સમય અનુસાર રાત્રે 11 વાગ્યાથી જોઈ શકશો. આ દરમિયાન પેરિસના ઇતિહાસ, સંસ્કૃતિ અને કલા વિશે માહિતી આપવામાં આવશે. આ તમામની જવાબદારી ફ્રેન્ચ અભિનેતા અને દિગ્દર્શક થોમસ જોલી સંભાળશે. સમારોહના કોરિયોગ્રાફર મૌડ લે પ્લેડેકના જણાવ્યા અનુસાર, દરેક બ્રિજ પર ડાન્સર્સ હાજર રહેશે. આ માટે કોસ્ચ્યુમ ડિઝાઈનર ડેફની બુર્કીએ તેની ટીમ સાથે મળીને 3000 નર્તકો અને કલાકારો માટે કોસ્ચ્યુમ તૈયાર કર્યા છે.
સીન નદી પર 6 કિલોમીટર લાંબી પરેડનું પણ આયોજન કરવામાં આવશે. આ સમારોહ દરમિયાન અન્ય રિવાજમાં ફેરફાર કરવામાં આવશે. દર વખતે ઓલિમ્પિકમાં ભાગ લેનારા ખેલાડીઓ ટ્રેક પર કૂચ કરતા હતા. આ વખતે લગભગ 10,500 એથ્લેટ્સ 100 બોટમાં સીન નદી પર કૂચ કરતા જોવા મળશે. અંતે ઓલિમ્પિકની મશાલ પ્રગટાવીને ગેમ્સનું સત્તાવાર ઉદઘાટન કરવામાં આવશે.
6 કિલોમીટર લાંબી પરેડ ઓસ્ટરલિટ્ઝ બ્રિજથી શરૂ થશે, ફેમસ કેથેડ્રલ ચર્ચ નોટ્રે ડેમ અને લુવ્ર મ્યુઝિયમમાંથી પસાર થશે અને જાર્ડિન ડેસ પ્લાન્ટેસ સુધી પહોંચશે. આ પરેડ ઓલિમ્પિકના કેટલાક સ્થળો પરથી પણ પસાર થશે.
આ ઉદઘાટન સમારોહમાં, રમતવીરોના 200 થી વધુ પ્રતિનિધિમંડળ સીન નદી પર પ્રદર્શન કરશે, જ્યારે હજારો દર્શકો તેને સીન નદીની બંને બાજુએથી નિહાળી શકશે. આ ભવ્ય સમારોહમાં ફેમસ સિંગર્સ લેડી ગાગા અને સેલિન ડીયોન પણ પરફોર્મ કરી શકે છે. રિપોર્ટ અનુસાર તેમને આ માટે 2 મિલિયન ડોલર આપવામાં આવ્યા છે. બંને તાજેતરમાં પેરિસ શહેરમાં જોવા મળ્યા હતા. જો કે હજુ સુધી આ વાતની પુષ્ટિ થઈ નથી. રિપોર્ટ્સ અનુસાર, R&B સ્ટાર આયા નાકામુરા પણ ઈવેન્ટમાં પરફોર્મ કરતી જોવા મળી શકે છે.
પેરિસ ઓલિમ્પિક્સ 2024ના સ્ટ્રીમિંગ અધિકારો ભારતમાં Viacom18 પાસે છે. તેથી જો તમે તેને ટીવી પર જોવા માંગો છો, તો તમે તેને Sports18, Jio Cinema પર જોઈ શકો છો.
ક્રિકેટ સહિત રમતગમતના દરેક સમાચાર વાંચવા અહીં ક્લિક કરો
Published On - 9:37 pm, Thu, 25 July 24