WTC Final: પાર્થિવ પટેલે કહ્યુ ન્યુઝીલેન્ડ સામે સૌથી વધુ રન કોણ નોંધાવશે, કોની બોલીંગ મહત્વની રહેશે

ICC વિશ્વ ટેસ્ટ ચેમ્પિયનશીપ ફાઇનલ (WTC Final) ને લઇ વિશ્લેષકો અને દિગ્ગજ ખેલાડીઓ પણ પ્રિડીકશન કરવા લાગી ચુક્યા છે. 18 જૂનથી શરુ થનારી ફાઇનલ મેચનો ફેન્સને ખૂબ જ ઇંતઝાર છે. ટીમ ઇન્ડીયાના કેપ્ટન વિરાટ કોહલી (Virat Kohli) અને રોહિત શર્મા (Rohit Sharma) જેવા દિગ્ગજો છે. તો હરિફ ટીમ પણ ટેસ્ટમાં બીજુ સ્થાન ધરાવતી ટીમ છે. જેની સામે મેદાને ઉતરતી વેળા ચેતેશ્વર પુજારા (Cheteshwar Pujara) સૌથી વધારે રન બનાવશે તેવી આગાહી કરાઇ છે.

આ પ્રકારનું અનુમાન ટીમ ઇન્ડીયા (Team India) ના પૂર્વ ક્રિકેટર પાર્થિવ પટેલે (Parthiv Patel) પ્રિડીક્ટ કર્યુ છે. પાર્થિવ પટેલના મતે ભારતીય ટીમ માટેની નવી ‘ધ વોલ’ તરીકે ઓળખ પામી રહેલ પુજારા સારો દેખાવ કરશે. જ્યારે બોલીંગ વિભાગમાં મહંમદ શામીનો દેખાવ મહત્વનો રહેશે.

મીડિયા રિપોર્ટસ મુજબ પટેલે કહ્યુ હતુ કે, જો ભારતે ફાઇનલ મેચમાં જીત હાંસલ કરવી હશે તો, પુજારાને ત્રણ નંબર પર બનાવી રાખવો જરુરી હશે. જો તે આ મેચમાં ત્રણ થી ચાર કલાક માટે ક્રિઝ પર ટકી રહેશે તો, ભારત માટે સારી સ્થિતી સર્જાશે. હું આ ટેસ્ટ મેચમાં સૌથી વધુ રન બનાવનાર બેટ્સમેનના રુપમાં પુજારાને જોઉ છુ.

ભારત તરફથી 25 ટેસ્ટ અને 38 વન ડે મેચ રમનારા પાર્થિવ પટેલને આશા છે કે ભારતીય ટીમ ફાઇનલ મેચમાં સફળતા હાંસલ કરી શકે છે. તેણે કહ્યુ કે, દમદાર બેટીગ અને જબરદસ્ત બોલીંગ આક્રમણના દમ પર વિરાટ કોહલીની ટીમ ફાઇનલ મેચ જીતવામાં સફળ રહેશે.

શામી શાનદાર રહેશે

પટેલે આગળ પણ કહ્યુ હતું કે, ક્રિકેટના તર્કને એક બાજુ રાખીને આ ટેસ્ટને જીતવા માટે હું ભારતને સમર્થન કરીશ. મને લાગે છે કે, ભારતીય બોલીંગ આક્રમણમાં મહંમદ શામી ની ભૂમિકા મહત્વની રહેશે. તેણે હકિકતમાં તમામ પરિસ્થિતીમાં સારુ પ્રદર્શન કર્યુ છે.

ભારતીય ટીમ 18 જાન્યુઆરીથી શરુ થનારી વિશ્વ ટેસ્ટ ચેમ્પિયનશીપની ફાઇનલ મેચમાં ન્યુઝીલેન્ડ સામે મેદાને ઉતરશે. ન્યુઝીલેન્ડ હાલમાં ઇંગ્લેંડ સામે બે ટેસ્ટ મેચની શ્રેણી ઇંગ્લેંડ સામે રમી રહ્યુ છે. ત્યારબાદ ન્યુઝીલેન્ડ ભારત સામે ફાઇનલમાં મેદાને ઉતરશે. ભારતીય ટીમ પણ ફાઇનલ મેચને લઇને ઉત્સુક છે. ટીમ ઇન્ડીયાના ખેલાડીઓ આ માટે તૈયારીઓ શરુ કરી દીધી છે.