IPL 2022: સુનીલ ગાવસ્કરે બતાવ્યુ આઇપીએલ ઓક્શનમાં હર્ષલ પટેલ પર કેમ પૈસાનો વરસાદ થયો, ગુજ્જુ ખેલાડીના કર્યા જબરદસ્ત વખાણ
આઇપીએલ ઓક્શન 2022 (IPL 2022 Auction) માં હર્ષલ પટેલ (Harshal Patel) ને રોયલ ચેલેન્જર્સ બેંગ્લોર (RCB) એ મોટી બોલી લગાવીને ખરીદ્યો હતો.
ભારતીય બોલર હર્ષલ પટેલ (Harshal Patel) માટે છેલ્લા કેટલાક મહિના ઘણા ખાસ રહ્યા છે. પહેલા IPL (IPL 2022 Auction ) માં અને પછી ટીમ ઈન્ડિયામાં તેણે બોલિંગમાં શાનદાર પ્રદર્શન કર્યું અને અનુભવી દિગ્ગજોને પણ પોતાના પ્રશંસક બનાવ્યા છે. આ જ કારણ છે કે તે IPL ઓક્શનમાં ટીમોને સામેલ કરવા માટે સ્પર્ધા જોવા મળી હતી. આખરે તે એ જ ટીમમાં ગયો જેણે તેને સ્ટાર બનાવ્યો. હરાજીમાં તેના પર 10.75 કરોડ રૂપિયાનો ખર્ચ કરવામાં આવ્યો છે. ભૂતપૂર્વ ઓપનર અને મહાન ખેલાડી સુનીલ ગાવસ્કર (Sunil Gavaskar) નું માનવું છે કે હર્ષલ પટેલ પર જે રકમ ખર્ચવામાં આવી તે યોગ્ય છે.
અંતિમ સિઝનમાં રોયલ ચેલેન્જર્સ બેંગ્લોર તરફથી રમતી વખતે હર્ષલ પટેલ પર્પલ કેપ ધારક હતો. જોકે તેમ છતાં પણ આરસીબીએ તેને છોડી દીધો હતો. હરાજી દરમિયાન, RCBએ 10 કરોડ 75 લાખની બોલી લગાવીને હર્ષલને ફરીથી પરત મેળવ્યો હતો. હર્ષલ પટેલને ખરીદવા માટે આરસીબી અને સનરાઈઝર્સ વચ્ચે જોરદાર જંગ ચાલી રહ્યો હતો અને તેના કારણે તેના પૈસા વધતા ગયા હતા.
હર્ષલ પટેલ રકમનો હકદાર છે
ગાવસ્કરે હર્ષલની પ્રશંસા કરતા કહ્યું, ‘જુઓ, હરાજીમાં મળેલા દરેક પૈસા, દરેક રૂપિયાનો તે હકદાર છે. તેણે ગયા વર્ષે શાનદાર કામ કર્યું હતું. તેના વિશે સૌથી સારી બાબત એ છે કે તેણે પોતાને કેવી રીતે ફરીથી બનાવ્યો છે.’ તેણે કહ્યું, ‘પહેલાં, તે એક બોલર હતો જેનો બેટ્સમેન સામનો કરવા તૈયાર હતા. કારણ કે તેની ઝડપ ભાગ્યે જ બદલાતી હતી. તે ઘણા રન બનાવવા માટે જાણીતો હતો. તે તેમાંથી શીખી રહ્યો છે, તેણે સુધારો કર્યો છે. હવે, તે એવો બોલર છે જેનો બેટ્સમેન સામનો કરવા માંગતા નથી કારણ કે તેઓ જાણતા નથી કે તે શું બોલિંગ કરવા જઈ રહ્યો છે.
ગાવસ્કરે વધુમાં કહ્યું, ‘તેની પાસે ખૂબ જ સારું યોર્કર છે. તેની પાસે ધીમા બાઉન્સર છે. તેની પાસે એવો બોલ છે જે ખૂબ જ સારી રીતે ચાલે છે અને વર્ષોથી આઈપીએલમાં રમવાના અનુભવથી તે જાણે છે કે તેનો ક્યારે ઉપયોગ કરવો. તે દર વર્ષે વધુ સારો થયો છે.
આઈપીએલમાં પટેલનો રેકોર્ડ શાનદાર છે
હર્ષલ પટેલ આઈપીએલમાં અત્યાર સુધીમાં 63 મેચ રમી ચૂક્યો છે અને તેણે 78 વિકેટ ઝડપી છે. 27 રનમાં પાંચ વિકેટ તેનું સર્વશ્રેષ્ઠ પ્રદર્શન રહ્યું છે. તેણે આઈપીએલમાં હેટ્રિક પણ લીધી છે. તે આ ટુર્નામેન્ટમાં જ દિલ્હી કેપિટલ્સ અને આરસીબી તરફથી રમ્યો છે. તે ગુજરાતનો છે પરંતુ સ્થાનિક ક્રિકેટમાં હરિયાણા તરફથી રમે છે. અહીં તેણે ટીમની કેપ્ટનશિપ પણ કરી છે. તે 2010 અંડર 19 વર્લ્ડ કપ રમનાર ભારતીય ટીમનો પણ ભાગ રહી ચુક્યો છે.
આ પણ વાંચોઃ Sabarkantha: ટ્રેકટર વેચવા આવતો સેલ્સમેન ખેડૂતના ટ્રેલરને ચોરી જતો અનોખો ચોર ઝડપાયો
આ પણ વાંચોઃ IND VS WI: યુઝવેન્દ્ર ચહલની મેદાનમાં ઉડાવી મજાક, કહ્યુ ‘દાંત ના દેખાડ’ જુઓ Video
