IPL 2024: મહારાજ-હેટમાયરના દમ પર રાજસ્થાનનો વિજય, પંજાબની ઘરઆંગણે સતત બીજી હાર
રાજસ્થાન રોયલ્સે સિઝનમાં તેમની પાંચમી જીત નોંધાવી છે અને પોઈન્ટ ટેબલમાં નંબર 1 પર પોતાનું સ્થાન વધુ મજબૂત કર્યું છે. જ્યારે બીજી તરફ પંજાબ કિંગ્સે 6 મેચમાં ચોથી હારનો સામનો કરવો પડ્યો છે અને ટીમ હજુ પણ આઠમાં સ્થાને છે. રાજસ્થાન રોયલ્સે જોરદાર પ્રદર્શન કરતા પંજાબ કિંગ્સને રોમાંચક મેચમાં 3 વિકેટે હરાવ્યું હતું.
IPL 2024માં રાજસ્થાન રોયલ્સે તેમનું જોરદાર પ્રદર્શન ચાલુ રાખતા પંજાબ કિંગ્સને એક રોમાંચક મેચમાં 3 વિકેટે હરાવ્યું. વિનિંગ પોઝીશનમાં હોવા છતાં છેલ્લી મેચમાં ગુજરાત ટાઈટન્સ સામે હારેલી રાજસ્થાનને ફરી એકવાર આવી સ્થિતિનો સામનો કરવો પડ્યો હતો પરંતુ આ વખતે ટીમ છેલ્લી ઓવરમાં જીત મેળવવામાં સફળ રહી હતી. શિમરોન હેટમાયર (27 રન, 10 બોલ) એ છેલ્લી ઓવરમાં 2 છગ્ગા ફટકારીને રાજસ્થાનને સિઝનમાં તેની પાંચમી જીત અપાવી હતી, જ્યારે પંજાબને ઘરઆંગણે બીજી હારનો સામનો કરવો પડ્યો હતો અને સિઝનમાં એકંદરે ચોથી હારનો સામનો કરવો પડ્યો હતો.
રાજસ્થાનના બોલરો સામે પંજાબનો મિડલ ઓર્ડર ફ્લોપ
પંજાબ, જે તેના નવા હોમ-ગ્રાઉન્ડ મુલ્લાનપુર ખાતે અગાઉની મેચ હાર્યા બાદ પુનરાગમનની આશા સાથે આવ્યું હતું, તે આ વખતે તેના કેપ્ટન શિખર ધવન વિના રમી રહ્યું હતું. ધવન ઈજાના કારણે આ મેચમાંથી બહાર થઈ ગયો હતો અને તેની જગ્યાએ અથર્વ તાઈડે (15) ઓપનિંગ માટે આવ્યો હતો પરંતુ તે પણ કંઈ કરી શક્યો નહોતો. જોની બેયરસ્ટો (15) સતત છઠ્ઠી મેચમાં નિષ્ફળ રહ્યો હતો. રાજસ્થાનના સ્પિનરો યુઝવેન્દ્ર ચહલ (1/31) અને કેશવ મહારાજ (2/23)ની જોડીએ પંજાબના મિડલ ઓર્ડરને સંપૂર્ણપણે કાબૂમાં રાખ્યો હતો અને ટીમની 5 વિકેટ માત્ર 70 રનમાં જ ઘટાડી દીધી હતી.
આશુતોષની જબરદસ્ત બેટિંગ
જીતેશ શર્મા (29), જે આ સિઝનમાં કોઈ મોટી ઈનિંગ રમવામાં નિષ્ફળ રહ્યો હતો, તેણે થોડો સમય બહાદુરીપૂર્વક લડત આપી હતી પરંતુ તે પણ પૂરતું ન હતું, જ્યારે ટીમમાં પરત ફરેલા લિયામ લિવિંગ્સ્ટન (21)ની ટૂંકી પરંતુ શાર્પ ઈનિંગનો અંત આવ્યો હતો. આવી સ્થિતિમાં પંજાબને નાના સ્કોર પર ઓલ આઉટ થવાનો ખતરો હતો, પરંતુ ઈમ્પેક્ટ સબસ્ટિટ્યૂટ આશુતોષ શર્માએ છેલ્લી 2 ઓવરમાં મેચનું ચિત્ર બદલી નાખ્યું. આશુતોષે માત્ર 16 બોલમાં 31 રન બનાવ્યા અને ટીમને 147 રનના સન્માનજક સ્કોર સુધી પહોંચાડી દીધી.
રબાડાએ લગામ લગાવી
પંજાબની જેમ રાજસ્થાન પણ તેના સ્ટાર ઓપનર જોસ બટલર વિના ઉતાર્યું અને આવી સ્થિતિમાં તેણે નવોદિત તનુષ કોટિયનને ઓપનિંગની જવાબદારી સોંપી. તનુષે યશસ્વી જયસ્વાલ સાથે મળીને અડધી સદીની ભાગીદારી કરીને ટીમને સારી શરૂઆત અપાવી હતી પરંતુ તનુષની ઈનિંગ ઘણી ધીમી હતી અને તે 31 બોલમાં માત્ર 24 રન જ બનાવી શક્યો હતો. જ્યારે જયસ્વાલે (39) ઝડપી શરૂઆત કરી હતી પરંતુ તે પોતાની ઈનિંગને મોટા સ્કોરમાં બદલી શક્યો નહોતો. જયસ્વાલને કાગીસો રબાડા (2/18)એ આઉટ કર્યો હતો. રબાડાએ રાજસ્થાનના કેપ્ટન સંજુ સેમસનની પણ વિકેટ લીધી હતી.
રબાડા-સેમ કરનની ચુસ્ત બોલિંગ
રબાડા અને સેમ કરનની ચુસ્ત બોલિંગે રાજસ્થાનને ઝડપી સ્કોર કરવાની તક આપી ન હતી. તેમ છતાં રિયાન પરાગ ક્રીઝ પર હોવાથી રાજસ્થાનની સ્થિતિ મજબૂત હતી. રિયાન ટીમને 100 રનથી આગળ લઈ ગયો હતો અને જ્યારે તેને ફાસ્ટ બેટિંગ શરૂ કરી ત્યારે અર્શદીપ સિંહે તેને આઉટ કર્યો હતો. ટૂંક સમયમાં ધ્રુવ જુરેલ પણ આઉટ થયો. રાજસ્થાને 18મી ઓવરમાં 117ના સ્કોર પર 5 વિકેટ ગુમાવી દીધી હતી.
હેટમાયરે સિક્સર ફટકારી રાજસ્થાનને જીત અપાવી
જુરેલના આઉટ થયા બાદ શિમરોન હેટમાયર અને રોવમેન પોવેલે સતત 4 બાઉન્ડ્રી ફટકારીને ટીમને મેચમાં વાપસી કરાવી હતી. ત્યારબાદ 19મી ઓવરમાં કરને પોવેલ અને પછી કેશવ મહારાજની વિકેટ લઈને મેચને છેલ્લી ઓવર સુધી લઈ ગયા. છેલ્લી ઓવરમાં શિમરોન હેટમાયરે ત્રીજા અને પાંચમા બોલ પર સિક્સર ફટકારીને ટીમને 3 વિકેટે વિજય અપાવ્યો હતો.
આ પણ વાંચો : IPL 2024: MS ધોનીના હાથમાં ફરી વર્લ્ડ કપ, વાનખેડે સ્ટેડિયમમાં 13 વર્ષ જૂની યાદો તાજી થઈ
Latest News Updates
