IPL 2022: લીગના ઈતિહાસમાં આ 3 ક્રિકેટર્સ એક પણ સિક્સર ફટકારી શક્યા નથી, આ યાદીમાં ઓસ્ટ્રેલિયાના પૂર્વ કેપ્ટનનો પણ સમાવેશ
IPL 2022: IPLની મોટાભાગની મેચોમાં ચોગ્ગા-છગ્ગાનો વરસાદ જોવા મળે છે, જે દર્શકોને ખૂબ જ પસંદ આવે છે. શું તમે જાણો છો કે ઓસ્ટ્રેલિયાના કેટલાક દિગ્ગજ ક્રિકેટરો IPL માં એક પણ સિક્સર નથી ફટકારી શક્યા.
આઈપીએલ (IPL)ને વિશ્વની સૌથી લોકપ્રિય અને રોમાંચક ટુર્નામેન્ટ માનવામાં આવે છે. આ ટુર્નામેન્ટમાં તમામ બેટ્સમેનો પોતાની રમત બતાવીને હેડલાઈન્સ બનાવે છે. IPLની મોટાભાગની મેચોમાં ચોગ્ગા-છગ્ગાનો વરસાદ જોવા મળે છે, જે દર્શકોને ખૂબ જ પસંદ આવે છે. શું તમે જાણો છો કે ઓસ્ટ્રેલિયાના કેટલાક દિગ્ગજ ક્રિકેટરો IPL માં એક પણ સિક્સર નથી ફટકારી શક્યા. તેમને કેટલીક IPL મેચ રમવાની તક મળી પણ કેટલાક ખેલાડીઓનું બેટ શાંત રહ્યું છે. આજે અમે તમને એવા ત્રણ ક્રિકેટરો વિશે જણાવીશું જેઓ IPL (IPL History) ના ઈતિહાસમાં એક પણ સિક્સર ફટકારી શક્યા નથી.
- ઓસ્ટ્રેલિયાનો ભૂતપૂર્વ સુકાની માઈકલ ક્લાર્ક (Michael Clarke) તેની શાનદાર બેટિંગ અને લાંબી સિક્સર માટે જાણીતો હતો. આશ્ચર્યની વાત એ છે કે IPLના ઈતિહાસમાં તેના બેટમાંથી એક પણ સિક્સ વાગી નથી. IPL 2012માં ક્લાર્કે પૂણે વોરિયર્સ ટીમ માટે 6 મેચ રમી હતી. જેમાં તે માત્ર 98 રન જ બનાવી શક્યો હતો. તેણે ટૂર્નામેન્ટમાં કુલ 94 બોલ રમ્યો હતો. મહત્વનું છે કે આ ટુર્નામેન્ટમાં તે એક પણ સિક્સર ફટકારી શક્યો ન હતો.
- આ ઈતિહાસમાં વધુ એક ઓસ્ટ્રેલિયાના ખેલાડીનું જ નામ લિસ્ટમાં આવે છે. ઓસ્ટ્રેલિયાના ફર્સ્ટ ક્લાસ ક્રિકેટમાં ઘણા મોટા રેકોર્ડ નોંધાવનાર માઈકલ ક્લિંગરે આઈપીએલ 2011માં કોચી ટસ્કર્સ કેરળની ટીમ માટે 4 મેચ રમી હતી. ક્લિન્ગરે આ સિઝનમાં 77 બોલ રમ્યા હતા અને તે માત્ર 73 રન જ બનાવી શક્યો હતો. આમ આ ટુર્નામેન્ટમાં તે એક પણ સિક્સ ફટકારવામાં નિષ્ફળ રહ્યો હતો.
- આ લિસ્ટમાં ત્રીજા સ્થાન પર ઓસ્ટ્રેલિયાના ક્રિકેટર કેલમ ફર્ગ્યુસનનું નામ આવે છે. તેને આઈપીએલની સિઝન 2011 અને 2012માં રમવાની તક મળી હતી. કાંગારૂ ટીમના કેલમ ફર્ગ્યુસનને આઈપીએલમાં કુલ 9 મેચ રમવાની તક મળી હતી. જેમાં તેણે 117 બોલનો સામનો કર્યો હતો અને માત્ર 98 રન જ બનાવી શક્યો હતો. આ 98 રનમાં તે એક પણ સિક્સ ફટકારી શક્યો ન હતો.
આમ આઈપીએલના ઈતિહાસમાં એક પણ સિક્સ ન ફટકારવાની યાદીમાં ટોપ ત્રણ ખેલાડીઓમાં તમામ ઓસ્ટ્રેલિયાના જ ખેલાડીઓનો સમાવેશ થાય છે. મહત્વનું છે કે આઈપીએલ 2022 (IPL 2022) સિઝનની શરૂઆત 26 માર્ચથી થઈ રહી છે. ત્યારે તમામ ક્રિકેટ પ્રેમીઓમાં હાલ આઈપીએલનો ફિવર જોવા મળી રહ્યો છે. ત્યારે આ આઈપીએલની તમામ અપડેટ જાણવા માટે TV9Gujarati.com સાથે જોડાયેલા રહો.