PBKS vs LSG, IPL 2022: લખનૌના મીડલ ઓર્ડરનો ફ્લોપ શો, પંજાબ સામે 154 રનનુ લક્ષ્ય, કાગિસા રબાડાની 4 વિકેટ

PBKS vs LSG, IPL 2022: કાગીસો રબાડાએ એક બાદ એક મહત્વની વિકેટ પોતાના ખાતામાં નોંધી હતી. કેેએલ રાહુલથી શરુ કરેલી તેની શિકાર યાત્રાએ લખનૌના બેટીંગ ઓર્ડરની કમર તોડી નાંખી હતી.

Quinton de Kock સૌથી વધુ રન લખનૌ તરફથી નોંધાવ્યા હતા

TV9 Gujarati | Edited By: Avnish Goswami | Updated on: Apr 29, 2022 | 9:26 PM

IPL 2022 ની 42મી મેચ પુણેના એમસીએ સ્ટેડીયમમાં રમાઈ રહી છે. પંજાબ કિંગ્સ અને લખનૌ સુપર જાયન્ટ્સ (Punjab Kings vs Lucknow Super Giants) વચ્ચે રમાઈ રહેલી મેચમાં પંજાબના કેપ્ટન મયંક અગ્રવાલે ટોસ જીતીને પ્રથમ ફીલ્ડીંગ પસંદ કરી હતી. લખનૌની ટીમ ટોસ હારીને બેટીંગ માટે ક્રિઝ પર આવી હતી. કેપ્ટન કેએલ રાહુલ (KL Rahul) આજે ઝડપથી વિકેટ ગુમાવી બેઠો હતો. કાગિસો રબાડા (Kagiso Rabada) તેની વિકેટ ઝડપવામાં સફળ થયો હતો. રબાડાએ 4 વિકેટ ઝડપી હતી. 20 ઓવરના અંતે 8 વિકેટ ગુમાવીને લખનૌની ટીમે 153 રન નોંધાવ્યા હતા. ઈનીંગમાં ડી કોકે સૌથી વધુ 46 રન નોંધાવ્યા હતા.

લખનૌનો કેપ્ટન કેએલ રાહુલ (6 રન 11 બોલ) હાલમાં શાનદાર ફોર્મમાં છે, તેની પાસેથી વધુ એક મોટી ઈનીંગ ફેન જોવા ઈચ્છે એ સ્વભાવિક છે. પરંતુ પંજાબ કિંગ્સ સામે તેની ઈનીંગ ઝડપથી સમેટાઈ ગઈ હતી. તે કાગિસો રબાડાના બોલ પર જિતેશ શર્માના હાથમાં કેચ આઉટ ઝીલાયો હતો. આ સમયે લખનૌનો સ્કોર માત્ર 13 રન હતો.

ત્યાર બાદ ક્વિન્ટન ડી કોક (46 રન 37 બોલ) અનવે દીપક હુડ્ડા (34 રન 28 બોલ) એ સ્થિતીને સંભાળી હતી બંને ચોગ્ગા અને છગ્ગા પણ મોકો મળતા જ ફટકારવાનુ જારી રાખીને ટીમનો સ્કોર આગળ વધાર્યો હતો. બંને એ 98 રનના સ્કોર પર ટીમને પહોંચાડી હતી. ત્યાં જ ડી કોકે વિકેટ ગુમાવી હતી. ત્યાર બાદ તુરત જ દીપક પણ વિકેટ ગુમાવી બેઠો હતો. બસ ત્યાર બાદ એક બાદ એક એક વિકેટ પડવા લાગી હતી.

મીડલ ઓર્ડર સંપૂર્ણ નિષ્ફળ

ડીકોક અને હુડાની જોડી પેવેલિયન પરત ફરવા સાથે જ મીડલ ઓર્ડર પોતાની જવાબદારી નિભાવવામાંથી નિષ્ફળ રહીને એક બાદ એક વિકેટ ગુમાવવા લાગ્યા હતા. 98 રન પર બીજી વિકેટ ગુમાવ્યા બાદ 111 રન સુધીમાં છઠ્ઠી વિકેટ ગુમાવી દીધી હતી. કૃણાલ પંડ્યા (7 રન 7 બોલ), માર્કસ સ્ટોઈનીશ (1 રન 4 બોલ) અને આયુષ બદોની (4 રન 4 બોલ) સસ્તામાં જ વિકેટ ગુમાવી બેઠા હતા. ઝડપથી વિકેટ પડવાને લઈને લખનૌની સ્થિતી નબળી લાગવા લાગી હતી. જોકે અંતમાં દુષ્મંતા ચામિરાના બે છગ્ગા અને મોહસીનના એક છગ્ગાએ સ્કોર બોર્ડને દોઢસોને પાર કરવામાં મહત્વની ભૂમિકા નિભાવી હતી.

કાગિસો એ લખનૌની કમર તોડી નાંખી

શરુઆત કેએલ રાહુલ થી રબાડાએ કરી હતી. કાગિસો રબાડાએ રાહુલ સહિત 4 મહત્વની વિકેટ ઝડપી હતી. જોકે તેણે 4 ઓવરમાં 38 રન આપ્યા હતા. રાહુલ ચાહરે પણ 2 વિકેટ ઝડપી હતી. તેણે 4 ઓવરમાં 30 રન ગુમાવ્યા હતા. સંદિપ શર્માએ એક વિકેટ ઝડપીને 4 ઓવરમાં 18 રન આપ્યા હતા.