ભારત-પાકિસ્તાન વચ્ચે રમાઈ શકે છે ટેસ્ટ મેચ શ્રેણી, ઓસ્ટ્રેલિયા યજમાની કરવા તૈયાર
ભારત અને પાકિસ્તાનની ક્રિકેટ ટીમ હાલમાં માત્ર ICC અથવા બહુરાષ્ટ્રીય ટુર્નામેન્ટમાં જ રમતી જોવા મળે છે. બંને દેશો વચ્ચે છેલ્લા દોઢ દાયકાથી કોઈ દ્વિપક્ષીય ક્રિકેટ શ્રેણી રમાઈ નથી.
ભારત-પાકિસ્તાનની ટીમો આ દિવસોમાં T20 વર્લ્ડ કપ રમવા ઓસ્ટ્રેલિયામાં છે. પરંતુ, હવે બહુ જલદી ઓસ્ટ્રેલિયા પણ આ બંને ટીમો વચ્ચે રમાતી ટેસ્ટ શ્રેણીનું સાક્ષી બની શકે છે. ઓસ્ટ્રેલિયાના પૂર્વ ઓલરાઉન્ડર સિમોન ઓડોનેલે આ અંગે મોટો સંકેત આપ્યો છે. તેમણે કહ્યું કે MCG પર ભારત અને પાકિસ્તાન વચ્ચેના સંઘર્ષ બાદ બંને દેશો વચ્ચે ટેસ્ટ શ્રેણી માટે વાતચીતની પ્રક્રિયા ચાલી રહી છે. એવી અપેક્ષા રાખવામાં આવે છે કે આ બંને એશિયન કટ્ટર હરીફ ઓસ્ટ્રેલિયામાં એકબીજા સામે ટેસ્ટ શ્રેણી રમતા જોવા મળી શકે છે.
તમને જણાવી દઈએ કે હાલમાં ભારત અને પાકિસ્તાનની ક્રિકેટ ટીમ માત્ર ICC અથવા બહુરાષ્ટ્રીય ટૂર્નામેન્ટમાં જ સાથે રમતી જોવા મળે છે. બંને દેશો વચ્ચે છેલ્લા દોઢ દાયકાથી કોઈ દ્વિપક્ષીય ક્રિકેટ શ્રેણી રમાઈ નથી. પરંતુ હવે ઓસ્ટ્રેલિયાની પહેલથી આ શક્ય જણાય છે.
ઓસ્ટ્રેલિયા યજમાન, ભારત-પાકિસ્તાન વચ્ચે થશે ટક્કર !
સેન રેડિયો સાથેની વાતચીતમાં ઓસ્ટ્રેલિયાના ભૂતપૂર્વ ઓલરાઉન્ડરે એમ પણ કહ્યું કે, ભારત અને પાકિસ્તાન વચ્ચેની ટેસ્ટ સીરિઝ વિશે જ નહીં પરંતુ ત્રિકોણીય વનડે સિરીઝ વિશે પણ વાતચીત ચાલી રહી છે. તે વનડે શ્રેણીમાં ભારત અને પાકિસ્તાન સિવાય ત્રીજી ટીમ ઓસ્ટ્રેલિયાની હોઈ શકે છે.
ભારત અને પાકિસ્તાન વચ્ચે છેલ્લી ટેસ્ટ શ્રેણી 2007માં રમાઈ હતી
સિમોન ઓ’ડોનેલે કહ્યું કે મેલબોર્નમાં રમાયેલી ભારત-પાકિસ્તાન વચ્ચેની મેચનો રોમાંચ આ ટેસ્ટ શ્રેણી અને ત્રિકોણીય શ્રેણીના પ્રસ્તાવથી વધ્યો છે. તમને જણાવી દઈએ કે ભારતે છેલ્લે વર્ષ 2007માં પાકિસ્તાન સામે તેની જ જમીન પર ટેસ્ટ સીરીઝ રમી હતી. તે પછી તે ઘરઆંગણે ટેસ્ટ શ્રેણી ભારતે પાકિસ્તાન સામે 1-0થી જીતી હતી.
જ્યાં સુધી T20 વર્લ્ડ કપની વાત છે, તો ભારત સેમિફાઇનલની રેસમાં પાકિસ્તાનની સરખામણીમાં આગળ છે. તેના 3 મેચ બાદ 4 પોઈન્ટ છે. તો બીજી બાજુ, પાકિસ્તાને અત્યાર સુધી માત્ર એક જ મેચ જીતી છે. સેમિફાઇનલમાં જવા માટે, જ્યાં ભારતે હવે સુપર 12ની તેની બાકીની તમામ મેચો જીતવી પડશે, પાકિસ્તાને તેની જીતની સાથે અન્ય ટીમોના પરિણામો પર નિર્ભર રહેવું પડશે.