મોહમ્મદ શમીને ટીમ ઈન્ડિયામાં સ્થાન કેમ ન મળ્યું? શુભમન ગિલે બે નામ લઈ આપ્યો જવાબ
મોહમ્મદ શમી છેલ્લા અઢી વર્ષમાં ટીમ ઈન્ડિયા માટે એક પણ ટેસ્ટ મેચ રમ્યો નથી. આ દરમિયાન તેની ફિટનેસ અને ફોર્મ મુખ્ય પરિબળ રહ્યું છે. જોકે, તાજેતરમાં રણજી ટ્રોફીમાં રમનાર શમીએ તેની પસંદગી અંગે પ્રશ્નો ઉભા કર્યા છે. હવે આ અંગે કેપ્ટન ગિલે જવાબ આપ્યો છે.
ભારતીય ટીમ 14 નવેમ્બરથી કોલકાતાના ઈડન ગાર્ડન્સ સ્ટેડિયમમાં દક્ષિણ આફ્રિકા સામે ટેસ્ટ શ્રેણી શરૂ કરશે. છ વર્ષ બાદ કોલકાતામાં ટેસ્ટ ક્રિકેટ પરત ફરી રહ્યું છે. 2019માં અહીં રમાયેલી છેલ્લી ટેસ્ટ મેચના મોટાભાગના ભારતીય ખેલાડીઓ આ શ્રેણીનો ભાગ નથી. તેમાંથી એક ઝડપી બોલર મોહમ્મદ શમી છે, જેના માટે ઈડન ગાર્ડન્સ તેનું હોમ ગ્રાઉન્ડ છે. પસંદગીકારો દ્વારા શમીની પસંદગીએ વિવાદ ઉભો કર્યો છે. આ મુદ્દે ઘણા નિવેદનો આપવામાં આવ્યા છે, અને હવે કેપ્ટન શુભમન ગિલે પણ પહેલીવાર આ મુદ્દા પર પ્રતિક્રિયા આપી છે.
ગિલે શમીને ના રમાડવા અંગે શું કયું?
શુક્રવારે કોલકાતામાં રમાનારી ટેસ્ટ મેચના એક દિવસ પહેલા ગુરુવાર, 13 નવેમ્બરના રોજ ગિલે એક પ્રેસ કોન્ફરન્સમાં ઘણા પ્રશ્નોના જવાબ આપ્યા. આ પ્રશ્નોમાંથી એક પ્રશ્ન શમીની બાદબાકીને લગતા વિવાદને લગતો હતો. ભારતીય કેપ્ટને સ્પષ્ટપણે કહ્યું કે પસંદગીના મુદ્દા પર તેની કોઈ કોમેન્ટ નથી. ગિલે ફક્ત એટલું જ કહ્યું કે, “પસંદગીકારો તમને વધુ સારો જવાબ આપી શકશે.”
ગિલે આ બે બોલરોના નામ લીધા
સ્વાભાવિક છે કે, કેપ્ટન તરીકે માત્ર છ મહિના પહેલા જ કાર્યભાર સંભાળ્યા હોવાથી ગિલ આ વિવાદાસ્પદ મુદ્દા પર ખુલ્લેઆમ બોલશે નહીં, જેમ કે અગાઉના કેપ્ટનોએ કર્યું છે. જોકે, શુભમન ગિલે શમીની પ્રશંસા કરી અને સ્વીકાર્યું કે આ અનુભવી ઝડપી બોલર માટે મુશ્કેલ સમય છે. ગિલે પ્રેસ કોન્ફરન્સમાં કહ્યું કે “અન્ય બોલરો શમી જેવા નથી, પરંતુ તમે આકાશ દીપ અને પ્રસિદ્ધ કૃષ્ણા જેવા યુવા બોલરોના પ્રદર્શનને અવગણી શકો નહીં. ક્યારેક શમી ભાઈ જેવા ખેલાડીઓ માટે બહાર બેસવું મુશ્કેલ બની શકે છે”
શમી અઢી વર્ષથી ટેસ્ટ ક્રિકેટ રમ્યો નથી
શમીએ 2023 વર્લ્ડ ટેસ્ટ ચેમ્પિયનશિપ ફાઈનલ પછી એક પણ ટેસ્ટ મેચ રમી નથી. 2023 વર્લ્ડ કપ ફાઈલમાં ઈજા થયા બાદ તે ભારતીય ટીમની બહાર છે. તેની ફિટનેસની તપાસ ચાલી રહી છે. તે 2025 ચેમ્પિયન્સ ટ્રોફીમાં પાછો ફર્યો અને સારી બોલિંગ કરી, પરંતુ ત્યારથી તેને તક મળી નથી. તાજેતરમાં રણજી ટ્રોફીમાં સારી બોલિંગ કરનાર શમીએ તેની અવગણના પર સવાલ ઉઠાવ્યા અને કહ્યું કે તે સખત ફીટ છે. મુખ્ય પસંદગીકાર અજિત અગરકરે જવાબ આપતા કહ્યું કે તે શમીને ઓસ્ટ્રેલિયા અને ઈંગ્લેન્ડ લઈ જવા માંગતો હતો, પરંતુ તે ફિટ નથી અને હજુ પણ સંપૂર્ણ ફિટ દેખાતો નથી.
આ પણ વાંચો: ફક્ત 272 રન… શુભમન ગિલ પાસે વિરાટ-સચિનના ખાસ ક્લબમાં જોડાવાની તક, આવું ફક્ત 3 વાર બન્યું છે
