IND vs SA: ભારતીય ક્રિકેટમાં 15 વર્ષ પછી આવો દિવસ જોવા મળશે, ચાહકોને વિરાટ કોહલીની ખોટ સાલશે

કોલકાતાનું ઐતિહાસિક ઈડન ગાર્ડન્સ સ્ટેડિયમ ફરી એકવાર ટેસ્ટ ક્રિકેટના અવાજથી ગુંજી ઉઠશે. ભારત અને દક્ષિણ આફ્રિકા વચ્ચે 14 નવેમ્બરથી શરૂ થતી બે મેચની ટેસ્ટ શ્રેણીની પહેલી મેચ અહીં રમાશે. લગભગ છ વર્ષ પછી આ મેદાન પર ટેસ્ટ મેચો રમાશે. ટીમ ઈન્ડિયાએ છેલ્લે 2019 માં અહીં પિંક બોલ ટેસ્ટ રમી હતી. જોકે, દક્ષિણ આફ્રિકા સામેની આ શ્રેણીની પહેલી મેચ ભારતીય ટીમ માટે ખૂબ ખાસ સાબિત થશે.

15 વર્ષ પછી આવો દિવસ જોવા મળશે

ભારત અને દક્ષિણ આફ્રિકા વચ્ચેની આ મેચમાં મેદાન પર વિરાટ કોહલીની ગેરહાજરી રહેશે. 15 વર્ષમાં આ પહેલીવાર બનશે જ્યારે ભારતીય ટીમ કોહલી વિના ઈડન ગાર્ડન્સમાં ટેસ્ટ મેચ રમશે. છેલ્લી વખત આવું 2011 માં થયું હતું, જ્યારે કોહલી વેસ્ટ ઈન્ડિઝ સામેની ટેસ્ટમાં ટીમનો ભાગ નહોતો. ભારતે તે મેચ એક ઈનિંગ અને 15 રનથી જીતી હતી. ત્યારથી, ભારતે ઈડન ગાર્ડન્સ ખાતે કુલ પાંચ ટેસ્ટ રમી છે, જે તમામમાં વિરાટ કોહલી રમ્યો હતો.

ઈડન ગાર્ડન્સમાં કોહલીનો રેકોર્ડ

કોહલીએ ઈડન ગાર્ડન્સમાં ઘણી યાદગાર ઈનિંગ્સ રમી છે અને તેની ગેરહાજરીમાં, ખેલાડીઓની નવી પેઢી પર મોટી જવાબદારી રહેશે. શુભમન ગિલની કેપ્ટનશીપ હેઠળ, ટીમ ફક્ત શ્રેણી જીતવાની જ નહીં પરંતુ કોહલીના વારસાને આગળ વધારવાનો પણ પ્રયાસ કરશે. નોંધનીય છે કે વિરાટ કોહલીએ આ વર્ષે મે મહિનામાં ટેસ્ટ ક્રિકેટમાંથી નિવૃત્તિની જાહેરાત કરી હતી. વિરાટે ઈડન ગાર્ડન્સ ખાતે કુલ પાંચ ટેસ્ટ મેચ રમી હતી, જેમાં તેણે 46.14ની સરેરાશથી 323 રન બનાવ્યા હતા, જેમાં બે સદીનો સમાવેશ થાય છે. આ સદીઓમાંથી એક પિંક બોલ ટેસ્ટમાં આવી હતી.

ઈડન ગાર્ડન્સ ખાતે ટીમ ઈન્ડિયાનો રેકોર્ડ

ભારતે અત્યાર સુધીમાં ઈડન ગાર્ડન્સ પર 42 ટેસ્ટ મેચ રમી છે. જેમાંથી ભારતે 13 જીત મેળવી છે અને 9 હારી છે. 20 મેચ ડ્રો રહી છે. બીજી તરફ, ભારતે આ મેદાન પર દક્ષિણ આફ્રિકા સામે કુલ 3 ટેસ્ટ મેચ રમી છે. આમાંથી ભારતે 2 મેચ જીતી છે, જ્યારે દક્ષિણ આફ્રિકાએ 1 જીતી છે. બંને ટીમો વચ્ચે પહેલી ટેસ્ટ મેચ 1996માં આ મેદાન પર રમાઈ હતી, જેમાં આફ્રિકન ટીમે 329 રનથી જીત મેળવી હતી. ત્યારબાદ 2004 અને 2010માં રમાયેલી ટેસ્ટમાં ભારતનો વિજય થયો હતો.

આ પણ વાંચો: મોહમ્મદ શમીને ટીમ ઈન્ડિયામાં સ્થાન કેમ ન મળ્યું? શુભમન ગિલે બે નામ લઈ આપ્યો જવાબ

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો