Breaking News : વર્લ્ડ કપ 2027 માટે કેપ્ટન જાહેર, 28 વર્ષીય ખેલાડી પર મોટી જવાબદારી

ICC ODI વર્લ્ડ કપ 2027ને ધ્યાનમાં રાખીને વિવિધ ટીમો પોતાની તૈયારીઓમાં વ્યસ્ત થઈ ગઈ છે. આ દરમિયાન બાંગ્લાદેશ ક્રિકેટ બોર્ડે (BCB) એક મહત્વપૂર્ણ નિર્ણય લઈ પોતાની ટીમ માટે લાંબા ગાળાની યોજના જાહેર કરી છે. બોર્ડે 2027 ODI વર્લ્ડ કપ માટે કેપ્ટનની પસંદગી કરી છે, જેથી ટીમને મજબૂત અને સ્થિર નેતૃત્વ મળી શકે.

કુલ 14 ટીમો ભાગ લેશે

2027નો ODI વર્લ્ડ કપ દક્ષિણ આફ્રિકા, ઝિમ્બાબ્વે અને નામિબિયામાં યોજાનારો છે, જેમાં કુલ 14 ટીમો ભાગ લેશે. આ મહત્ત્વપૂર્ણ ટુર્નામેન્ટ માટે તમામ ટીમો તૈયારી તેજ કરી રહી છે. બાંગ્લાદેશ પણ પોતાની ટીમને મજબૂત બનાવવા માટે આયોજનબદ્ધ રીતે આગળ વધી રહ્યું છે.

બાંગ્લાદેશ ક્રિકેટ બોર્ડે જાહેરાત કરી છે કે મેહદી હસન મિરાઝ 2027 ODI વર્લ્ડ કપ સુધી ટીમના કેપ્ટન તરીકે રહેશે. બોર્ડનું માનવું છે કે લાંબા સમય સુધી એક જ કેપ્ટન રાખવાથી ટીમ વધુ સારી રીતે વિકસિત થઈ શકે છે અને સ્ટ્રેટેજી પર સ્થિરતા આવે છે.

2026માં પાકિસ્તાન સામે મહત્વપૂર્ણ જીત મેળવી

મેહદી હસન મિરાઝને ગયા વર્ષે ODI કેપ્ટન તરીકે નિમણૂક કરવામાં આવી હતી અને ત્યારથી તેમણે સારું નેતૃત્વ બતાવ્યું છે. તેમના નેતૃત્વ હેઠળ બાંગ્લાદેશે ઓક્ટોબર 2025માં વેસ્ટ ઈન્ડિઝ સામે અને માર્ચ 2026માં પાકિસ્તાન સામે મહત્વપૂર્ણ જીત મેળવી હતી. BCBના ક્રિકેટ ઓપરેશન્સ ચેરમેન નઝમુલ આબેદીને જણાવ્યું હતું કે વર્લ્ડ કપ પહેલાં મિરાઝને વધુ સમય આપવો જરૂરી છે, જેથી તેઓ ટીમને વધુ મજબૂત બનાવી શકે.

બીજી તરફ, બાંગ્લાદેશ ક્રિકેટ બોર્ડે 2028 T20 વર્લ્ડ કપ માટે પણ કેપ્ટનની જાહેરાત કરી છે. વિકેટકીપર-બેટ્સમેન લિટન દાસ 2028 સુધી T20 ટીમનું નેતૃત્વ કરશે. લિટન દાસનું કેપ્ટનશિપ મૂળ 2026 T20 વર્લ્ડ કપ સુધી હતું, પરંતુ કેટલીક સુરક્ષા ચિંતાઓને કારણે બાંગ્લાદેશે તે ટુર્નામેન્ટમાંથી ભાગ લીધો નહોતો. હવે તેમને 2028 સુધી કેપ્ટન તરીકે ચાલુ રાખવાનો નિર્ણય લેવાયો છે.

આ ઉપરાંત, બોર્ડે ભૂતપૂર્વ સ્પિનર મોહમ્મદ રફીકને એક વર્ષ માટે સ્પિન-બોલિંગ સલાહકાર તરીકે નિયુક્ત કરવાનો પણ મહત્વપૂર્ણ નિર્ણય લીધો છે. આ પગલું ટીમની બોલિંગ મજબૂત બનાવવા માટે મહત્વપૂર્ણ માનવામાં આવી રહ્યું છે.

Breaking News: હૈદરાબાદે બનાવ્યો શરમજનક રેકોર્ડ, હોમ ગ્રાઉન્ડ પર બેટ્સમેનો એક-એક રન લેવા માટે ‘તરસ્યા’