IPL Media Rightsથી થઈ મોટી કમાણી, હવે BCCIએ પણ ખોલી પોતાની તિજોરી, 900 ક્રિકેટરો-અમ્પાયરોને થશે ફાયદો

વિશ્વના સૌથી ધનાઢ્ય ક્રિકેટ બોર્ડ બોર્ડ ઓફ કંટ્રોલ ફોર ક્રિકેટ ઈન ઈન્ડિયાનું (BCCI) બેંક બેલેન્સ ઘણું વધવાનું છે. BCCIએ વિશ્વની સૌથી પ્રખ્યાત T20 ફ્રેન્ચાઈઝી ટૂર્નામેન્ટ, ઈન્ડિયન પ્રીમિયર લીગનું આયોજન કરીને ઘણી કમાણી કરી છે અને હવે BCCIને વધુ કમાણી થવાની છે. IPL મીડિયા અધિકારોની હરાજીથી ભારતીય બોર્ડને લગભગ 50 હજાર કરોડ રૂપિયાની કમાણી થવા જઈ રહી છે. અલબત્ત, પહેલેથી જ ખૂબ જ સમૃદ્ધ બોર્ડ, હવે વધુ સમૃદ્ધ થવા જઈ રહ્યું છે. આવી સ્થિતિમાં બોર્ડે પણ મોટી કમાણી સુનિશ્ચિત કર્યા બાદ પોતાની તિજોરી ખોલવાનો નિર્ણય લીધો છે. BCCI તેના ભૂતપૂર્વ ક્રિકેટરો અને મેચ અધિકારીઓને મોટો ફાયદો આપવા જઈ રહ્યું છે. BCCI સેક્રેટરી જય શાહે (Jay Shah) જાહેરાત કરી છે કે બોર્ડ ભૂતપૂર્વ ક્રિકેટરો અને મેચ અધિકારીઓની નિવૃત્તિ પેન્શન બમણું કરવા જઈ રહ્યું છે.

BCCI સચિવ જય શાહે સોમવારે, 13 જૂને એક ટ્વીટ કરીને બોર્ડના આ નિર્ણયની જાણકારી આપી. જય શાહે પોતાના ટ્વીટમાં કહ્યું “મને એ જાહેરાત કરતાં આનંદ થાય છે કે ભૂતપૂર્વ ક્રિકેટરો (પુરુષ અને મહિલા) અને મેચ અધિકારીઓના માસિક પેન્શનમાં વધારો કરવામાં આવી રહ્યો છે. લગભગ 900 લોકોને આનો લાભ મળશે અને તેમાંથી લગભગ 75 ટકા લોકોને 100 ટકા વધારાનો લાભ મળશે.

I’m pleased to announce an increase in the monthly pension of former cricketers (men & women) and match officials. Around 900 personnel will avail of this benefit and close to 75% of personnel will be beneficiaries of a 100% raise.

— Jay Shah (@JayShah) June 13, 2022

IPL મીડિયા અધિકારો (IPL Media Rights)ની હરાજીમાં બે પેકેજો માટે હરાજી પૂર્ણ થઈ ગઈ છે. IPL ના ટીવી અધિકારોની હરાજી કરવામાં આવી છે. જે પ્રતિ મેચ 57.5 કરોડમાં વેચાયા છે. તો ડિજિટલ અધિકારોની હરાજી 48 કરોડ રૂપિયા પ્રતિ મેચમાં કરવામાં આવી છે. આ આગામી પાંચ વર્ષ માટે છે. વેબસાઈટ Cricbuzz એ આ અંગે માહિતી આપી છે. એટલે કે ટીવી અને ડિજિટલ પ્લેટફોર્મ પર મેચ બતાવવા માટે BCCI ને કુલ 105.5 કરોડ રૂપિયા મળશે. આ હરાજી આગામી પાંચ વર્ષના અધિકારો માટે યોજવામાં આવી રહી છે એટલે કે BCCI 2023 થી 2027 સુધીના મીડિયા અધિકારોનું વેચાણ કરી રહ્યું છે.