SA20 2025 : કરોડોની ઈનામી રકમ માટે 6 ટીમો વચ્ચે થશે ટક્કર, જાણો ભારતમાં ક્યાં જોઈ શકશો LIVE મેચ
દક્ષિણ આફ્રિકાની T20 લીગ SA20ની આગામી સિઝન શરૂ થવામાં થોડા કલાકો બાકી છે. SA20ની ત્રીજી સિઝન 9 જાન્યુઆરીથી શરૂ થવા જઈ રહ્યું છે. દક્ષિણ આફ્રિકામાં યોજાનારી આ લીગમાં વિવિધ દેશોના ખેલાડીઓ રમતા જોવા મળશે. કરોડોની ઈનામી રકમ માટે કુલ 6 ટીમો એકબીજા સામે ટકરાશે. તો ચાલો જાણીએ તેની ઈનામી રકમ અને તમામ ટીમો વિશે. અમે તમને એ પણ જણાવીશું કે ભારતમાં દર્શકો ઘરે બેઠા ક્યાં અને કેવી રીતે આ T20 લીગનો આનંદ માણી શકશે.
SA20ની શરૂઆત 2022-23માં કરવામાં આવી હતી. અત્યાર સુધીમાં બે સિઝન યોજાઈ ચૂકી છે. સનરાઈઝર્સ ઈસ્ટર્ન કેપ બંને સિઝનમાં ચેમ્પિયન રહ્યું છે. હવે ત્રીજી સિઝનની શરૂઆત 9 જાન્યુઆરીએ સનરાઈઝર્સ ઈસ્ટર્ન કેપ અને એમઆઈ કેપટાઉન વચ્ચેની મેચથી થશે.
ઓપનિંગ મેચ પોર્ટ એલિઝાબેથમાં રમાશે. પ્રથમ ક્વોલિફાયર 4 ફેબ્રુઆરીએ, એલિમિનેટર 5 ફેબ્રુઆરીએ અને બીજી ક્વોલિફાયર 6 ફેબ્રુઆરીએ રમાશે. ફાઈનલ 8 ફેબ્રુઆરીએ જોહાનિસબર્ગના વોન્ડરર્સ ક્રિકેટ સ્ટેડિયમમાં રમાશે.
દક્ષિણ આફ્રિકાની આ લીગમાં કુલ 34 મેચો રમાશે. મોટાભાગની મેચો ભારતીય સમય અનુસાર રાત્રે 9 વાગ્યે શરૂ થશે. કેટલીક મેચો સાંજે 7 અને 4:30 વાગ્યે પણ રમાશે.
SA20ની ત્રીજી સિઝનનો ખિતાબ જીતનારી ટીમ પર કરોડો રૂપિયાનો વરસાદ થશે. મીડિયા રિપોર્ટ્સ અનુસાર, વિજેતા ટીમને 14.20 કરોડ રૂપિયાની ઈનામી રકમ આપવામાં આવશે. રનર અપ અને ત્રીજા સ્થાને રહેલી ટીમને પણ કરોડો રૂપિયા મળશે.
ભારતીય દર્શકો પણ ઘરે બેઠા 9 જાન્યુઆરીથી શરૂ થતી SA20 સિઝન-3 નો આનંદ માણી શકશે. ભારતીય ચાહકો ટીવીમાં સ્ટાર સ્પોર્ટ્સ પર આ T20 લીગની મેચો જોઈ શકશે. જ્યારે, દર્શકો મોબાઈલ પર લાઈવ સ્ટ્રીમિંગ દ્વારા મેચનો આનંદ માણવા માટે ડિઝની પ્લસ હોટસ્ટાર એપ્લિકેશનનો ઉપયોગ કરી શકે છે. (All Photo Credit : X / Betway SA20)
Published On - 8:15 pm, Wed, 8 January 25