Rahul Gandhi US Visit: રાહુલ ગાંધીને મળ્યો 3 વર્ષ માટે પાસપોર્ટ, આવતીકાલે અમેરિકા જવા માટે થશે રવાના
સ્વામીએ કોંગ્રેસ નેતાની ભારતીય નાગરિકતા પર સવાલ ઉઠાવ્યા. તેમનો આરોપ હતો કે તેઓ બ્રિટિશ નાગરિક હતા. જો કે, રાહુલ ગાંધીના વકીલ તરન્નુમ ચીમાએ આ દાવાને સદંતર ફગાવી દીધો હતો અને કોર્ટમાં તેનો વિરોધ કર્યો હતો.
Delhi: કોંગ્રેસના નેતા અને વાયનાડના પૂર્વ સાંસદ રાહુલ ગાંધીને (Rahul Gandhi) 3 વર્ષ માટે નવો પાસપોર્ટ મળ્યો છે. વાસ્તવમાં, શુક્રવારે દિલ્હીની એક અદાલત દ્વારા નો ઓબ્જેક્શન સર્ટિફિકેટ (NOC) આપવામાં આવ્યું હતું, જેના બે દિવસ પછી નવો પાસપોર્ટ ઈસ્યુ કરવામાં આવ્યો છે. હવે રાહુલ સોમવારે અમેરિકા જવા રવાના થશે. કોંગ્રેસના નેતાને ટૂંકા ગાળાનો પાસપોર્ટ આપવામાં આવ્યો છે, જ્યારે સામાન્ય પાસપોર્ટની અવધિ 10 વર્ષની છે. બીજેપી નેતા સુબ્રમણ્યમ સ્વામીના વિરોધ બાદ આ નિર્ણય લેવામાં આવ્યો છે.
અમેરિકાના પ્રવાસ પહેલા રાહુલ ગાંધીએ તેમનો રાજદ્વારી પાસપોર્ટ સરેન્ડર કર્યો હતો. આ પછી મામલો કોર્ટમાં પહોંચ્યો હતો. કોર્ટે ચુકાદો આપ્યો કે તેને ત્રણ વર્ષના સમયગાળા માટે પાસપોર્ટ આપવામાં આવશે. જોકે, કોર્ટમાં સુબ્રમણ્યમ સ્વામીએ 3 વર્ષ સુધી પાસપોર્ટ અરજીનો વિરોધ કર્યો હતો. સ્વામીનો ભાર એ વાત પર હતો કે રાહુલ ગાંધીને માત્ર એક વર્ષ માટે જ પાસપોર્ટ આપવામાં આવે. આ પછી તેને રિન્યુ કરવો જોઈએ.
આ પણ વાંચો: Ahmedabad: ચીન સાથે ભારતના સંબંધો પર એસ જયશંકરે આપ્યું મોટું નિવેદન, ડ્રેગનની મનસાનો કર્યો ખુલાસો
એટલું જ નહીં, સ્વામીએ કોંગ્રેસ નેતાની ભારતીય નાગરિકતા પર સવાલ ઉઠાવ્યા. તેમનો આરોપ હતો કે તેઓ બ્રિટિશ નાગરિક હતા. જો કે, રાહુલ ગાંધીના વકીલ તરન્નુમ ચીમાએ આ દાવાને સદંતર ફગાવી દીધો હતો અને કોર્ટમાં તેનો વિરોધ કર્યો હતો. તેમણે દલીલ કરી હતી કે આવી જ અરજીઓ હાઈકોર્ટ દ્વારા પહેલાથી જ ફગાવી દેવામાં આવી છે. સોનિયા ગાંધી, રાહુલ ગાંધી અને અન્યો સામે સ્વામીની વ્યક્તિગત ફરિયાદ નેશનલ હેરાલ્ડ કેસનો આધાર છે. આ તમામ પર ષડયંત્ર, છેતરપિંડી અને વિશ્વાસભંગના ગુનાહિત આરોપ મૂકવામાં આવ્યા છે.
રાહુલ ગાંધી અમેરિકામાં વિદ્યાર્થીઓ સાથે પણ વાત કરશે
રાહુલ ગાંધી સોમવારે અમેરિકા જવાના છે. તેઓ ત્યાં અનેક બેઠકોમાં હાજરી આપવાના છે અને વોશિંગ્ટન ડીસી, ન્યુયોર્ક અને સાન ફ્રાન્સિસ્કોની યુનિવર્સિટીના વિદ્યાર્થીઓ સાથે પણ વાતચીત કરશે. એવા અહેવાલ છે કે રાહુલ ગાંધીના પ્રવાસ કાર્યક્રમમાં એનઆરઆઈને સંબોધિત કરવા, યુએસ કેપિટોલમાં ધારાસભ્યોને મળવા, થિંક ટેન્કના સભ્યો અને વોલ સ્ટ્રીટના અધિકારીઓ અને યુનિવર્સિટીના વિદ્યાર્થીઓ સાથે વાર્તાલાપનો સમાવેશ થાય છે.