નિર્મલા સીતારમણ આજથી છ દિવસના અમેરિકા પ્રવાસે, IMF-વિશ્વ બેંકની બેઠકમાં લેશે ભાગ

નાણા પ્રધાન નિર્મલા સીતારમણ (Nirmala Sitharaman) મંગળવારે આંતરરાષ્ટ્રીય નાણાકીય ભંડોળ (IMF) અને વિશ્વ બેંકની (World Bank) વાર્ષિક બેઠકમાં ભાગ લેવા અમેરિકાના વોશિગ્ટન પહોંચશે. આ બેઠક દરમિયાન વર્તમાન વૈશ્વિક આર્થિક સ્થિતિ પર ચર્ચા કરવામાં આવશે. નાણામંત્રી નિર્મલા સીતારમણ તેમની છ દિવસની અમેરિકાની મુલાકાત દરમિયાન યુએસ ટ્રેઝરી સેક્રેટરી જેનેટ યેલેન (US Treasury Secretary Janet Yellen) સાથે દ્વિપક્ષીય બેઠક પણ કરશે. નાણા પ્રધાન નિર્મલા સીતારમણ આ સમયગાળા દરમિયાન G20 દેશના નાણા પ્રધાનો અને કેન્દ્રીય બેંકના ગવર્નરો સાથે પણ બેઠક કરશે. આ સિવાય તેઓ બિઝનેસ લીડર્સ અને રોકાણકારોને પણ મળશે.

સીતારામન 11-16 ઓક્ટોબર સુધીની તેમની છ દિવસીય યુએસ મુલાકાત દરમિયાન યુએસ નાણા પ્રધાન જેનેટ યેલેન અને વિશ્વ બેંકના પ્રમુખ ડેવિડ માલપાસ સાથે અલગ-અલગ બેઠકો પણ કરશે. તે જાપાન, દક્ષિણ કોરિયા, સાઉદી અરેબિયા, ઓસ્ટ્રેલિયા, ભૂટાન, ન્યુઝીલેન્ડ, ઇજિપ્ત, જર્મની, મોરેશિયસ, સંયુક્ત આરબ અમીરાત, ઈરાન અને નેધરલેન્ડ સહિતના દેશો સાથે દ્વિપક્ષીય બેઠકો પણ કરશે. આ ઉપરાંત, તેમણે OECD, યુરોપિયન કમિશન અને UNDPના નેતાઓ અને વડાઓ સાથે સીધી બેઠકો યોજશે.

એક સત્તાવાર નિવેદનમાં કહેવામાં આવ્યું છે કે, “કેન્દ્રીય નાણા અને કોર્પોરેટ બાબતોના પ્રધાન નિર્મલા સીતારમણ 11 ઓક્ટોબર, 2022 થી યુએસની સત્તાવાર મુલાકાત લેશે. તેમની મુલાકાત દરમિયાન, સીતારમણ IMF અને વિશ્વ બેંકની વાર્ષિક બેઠકોમાં ભાગ લેશે અને G20 નાણા પ્રધાનો અને કેન્દ્રીય બેંકના ગવર્નરો સાથે બેઠક કરશે. તેમની મુલાકાત દરમિયાન, સીતારામન વોશિંગ્ટન સ્થિત બિન-લાભકારી જાહેર નીતિ સંસ્થા, બ્રુકિંગ્સ ઇન્સ્ટિટ્યુશન ખાતે ‘ભારતની આર્થિક સંભાવનાઓ અને વિશ્વ અર્થતંત્રમાં ભૂમિકા’ પરની ચર્ચામાં પણ ભાગ લેશે.

નાણા પ્રધાન નિર્મલા સીતારમણ, અમેરિકા યાત્રા દરમિયાન ઓર્ગેનાઈઝેશન ફોર ઈકોનોમિક કો-ઓપરેશન એન્ડ ડેવલપમેન્ટ (OECD) અને યુરોપિયન કમિશન તેમજ યુનાઈટેડ નેશન્સ ડેવલપમેન્ટ પ્રોગ્રામ (UNDP)ના નેતાઓ અને વડાઓ સાથે પણ બેઠકો કરશે.