Coronavirus: ‘જે જિલ્લામાં પોઝિટિવિટી રેટ 10 ટકાથી વધુ છે ત્યાં લાગુ થાય લોકડાઉનના કડક નિયમો’, કેન્દ્રએ રાજ્યોને આપી સૂચના
કેન્દ્રીય આરોગ્ય સચિવ રાજેશ ભૂષણે શનિવારે 10 રાજ્યો સાથે ઉચ્ચ સ્તરીય બેઠક યોજી હતી જ્યાં કોરોનાના નવા કેસ વધી રહ્યા છે અથવા પોઝિટિવિટી રેટ વધી રહ્યો છે.
કેન્દ્રીય આરોગ્ય સચિવ રાજેશ ભૂષણે શનિવારે 10 રાજ્યો સાથે ઉચ્ચ સ્તરીય બેઠક યોજી હતી જ્યાં કોરોનાના નવા કેસ વધી રહ્યા છે અથવા પોઝિટિવિટી રેટ વધી રહ્યો છે. રાજેશ ભૂષણે કહ્યું છે કે, છેલ્લા કેટલાક સપ્તાહમાં જે જિલ્લાઓમાં સકારાત્મકતાનો દર 10 ટકાથી વધુ છે તેમણે લોકડાઉનના નિયમોનું ચુસ્તપણે પાલન કરવું પડશે. કેરળ, મહારાષ્ટ્ર, કર્ણાટક, તામિલનાડુ, ઓડિશા, આસામ, મિઝોરમ, મેઘાલય, આંધ્રપ્રદેશ અને મણિપુરે બેઠકમાં ભાગ લીધો હતો.
બેઠકમાં એવું પણ કહેવામાં આવ્યું હતું કે, આવી પરિસ્થિતિઓમાં કોઈપણ પ્રકારની બેદરકારી પરિસ્થિતિને વધુ ખરાબ કરી શકે છે. ભારતના લગભગ 46 જિલ્લાઓમાં 10 ટકાથી વધુ પોઝિટિવિટી રેટ છે અને 53 જિલ્લાઓ જોખમ તરફ આગળ વધી રહ્યા છે કારણ કે તેમનો પોઝિટિવિટી રેટ 5 થી 10 ટકા વચ્ચે છે.
4 મહત્વની માર્ગદર્શિકા રાજ્યોને આપવામાં આવી છે
બેઠકમાં સામેલ રાજ્યોને ચાર મુદ્દાની માર્ગદર્શિકા આપવામાં આવી છે.
1. એવા વિસ્તારોને નિયંત્રિત અને મોનિટર કરવા જ્યાં કોરોનાના મહત્તમ કેસ નોંધાઈ રહ્યા છે. 2. કેસ મેપિંગ, સંક્રમિતોના સંપર્કોની શોધ અને કન્ટેનમેન્ટ ઝોનને વ્યાખ્યાયિત કરવું. 3. બાળકોની સંભાળ પર ધ્યાન કેન્દ્રિત કરીને ગ્રામીણ વિસ્તારોમાં આરોગ્ય માળખામાં સુધારો કરવો. 4. ICMR માર્ગદર્શિકા અનુસાર મૃત્યુ ગણતરીની નોંધણી
બેઠકમાં ઉપસ્થિત ભારતીય તબીબી સંશોધન પરિષદના મહાનિર્દેશક ડો.બલરામ ભાર્ગવે બેઠકમાં ઉપસ્થિત રાજ્યોને બિનજરૂરી મુસાફરી અને ભીડભાડ ટાળવા જણાવ્યું છે.
હોમ આઇસોલેશનમાં 80 ટકાથી વધુ સક્રિય કેસ
આરોગ્ય મંત્રાલયના જણાવ્યા અનુસાર, આ 10 રાજ્યોમાં 80 ટકાથી વધુ સક્રિય કેસ હોમ આઇસોલેશનમાં છે. આ લોકો પર નજર રાખવાની જરૂરિયાત પર ભાર મુકતા મંત્રાલયે કહ્યું કે, આ દર્દીઓ પર દેખરેખ રાખવા માટે સમુદાય, ગામ, મોહલ્લા, વોર્ડ વગેરેના સ્તરે સ્થાનિક દેખરેખ હોવી જોઈએ જેથી તેમને હોસ્પિટલમાં દાખલ કરવાની જરૂર છે કે કેમ તે જાણી શકાય.
આ પણ વાંચો: ભારતીય વાયુસેનામાં 12 પાસ માટે બહાર પડી ભરતીઓ, જાણો સમગ્ર વિગત
