Breaking News : ભારતીય ક્રિકેટર યુઝવેન્દ્ર ચહલ ભાજપમાં જોડાયો, OBC મોરચાની રાષ્ટ્રીય કાર્યસમિતિમાં વિશેષ આમંત્રિત સભ્ય તરીકે નિમણૂક
ભારતીય ક્રિકેટર યુઝવેન્દ્ર ચહલ શનિવાર 21 નોવેમ્બરના રોજ ભારતીય જનતા પાર્ટી (ભાજપ) માં જોડાયો. ભાજપે તેને ઓબીસી મોરચાની રાષ્ટ્રીય કાર્યસમિતિમાં વિશેષ આમંત્રિત સભ્ય તરીકે નિયુક્ત કર્યું છે. આ નિમણૂક બાદ ચહલે સોશિયલ મીડિયા પર પોસ્ટ કરીને વડાપ્રધાન નરેન્દ્ર મોદી સહિત પક્ષના વરિષ્ઠ નેતાઓનો આભાર માન્યો.

ભારતીય ક્રિકેટર યુઝવેન્દ્ર ચહલ સત્તાવાર રીતે ભારતીય જનતા પાર્ટી (ભાજપ) સાથે જોડાયો. પક્ષ દ્વારા OBC મોરચાની રાષ્ટ્રીય કાર્યસમિતિમાં વિશેષ આમંત્રિત સભ્ય તરીકે સ્થાન આપવામાં આવ્યું છે. ભાજપના કેન્દ્રીય કાર્યાલય દ્વારા જાહેર કરવામાં આવેલી રાષ્ટ્રીય હોદ્દેદારો અને કાર્યકારી સભ્યોની વ્યાપક યાદીના ભાગરૂપે ચહલની નિમણૂક કરવામાં આવી છે. આ જાહેરાત બાદ ચહલે સોશિયલ મીડિયા પ્લેટફોર્મ X પર પોસ્ટ કરીને પક્ષના ટોચના નેતૃત્વનો આભાર વ્યક્ત કર્યો હતો.
તેણે પોતાની પોસ્ટમાં લખ્યું કે, ભાજપ પરિવારમાં મને સ્થાન અને સન્માન આપવા બદલ હું આદરણીય વડાપ્રધાન નરેન્દ્ર મોદી, ગૃહમંત્રી અમિત શાહ, ભાજપના રાષ્ટ્રીય અધ્યક્ષ નીતિન નવીન અને ઓબીસી મોરચાના રાષ્ટ્રીય અધ્યક્ષ શ્રી અમરપાલ મૌર્યનો હૃદયપૂર્વક આભાર માનું છું.
દિલ્હી OBC મોરચાનું પ્રતિનિધિત્વ કરશે ચહલ
પક્ષ દ્વારા આપવામાં આવેલી સત્તાવાર માહિતી અનુસાર, ચહલ દિલ્હીનું પ્રતિનિધિત્વ કરતાં ઓબીસી મોરચાની રાષ્ટ્રીય કાર્યસમિતિમાં વિશેષ આમંત્રિત સભ્ય તરીકે જવાબદારી નિભાવશે. તેની સાથે ઓડિશાનો અદ્વૈત ચરણ ગણનાયક અને ઉત્તર પ્રદેશની એડવોકેટ સીમા સમૃદ્ધિ કુશવાહાને પણ વિશેષ આમંત્રિત સભ્ય તરીકે નિયુક્ત કરવામાં આવ્યું છે.
भाजपा परिवार में मुझे स्थान व मान-सम्मान देने के लिए आदरणीय प्रधानमंत्री श्री नरेंद्र मोदी जी, आदरणीय गृहमंत्री श्री अमित शाह जी, भाजपा राष्ट्रीय अध्यक्ष श्री नितिन नवीन जी व ओबीसी मोर्चा के राष्ट्रीय अध्यक्ष श्री अमरपाल मौर्य जी का हार्दिक आभार प्रकट करता हूँ।
— Yuzvendra Chahal (@yuzi_chahal) November 21, 2026
ક્રિકેટમાં ચહલનું પ્રદર્શન
ક્રિકેટના મેદાન પર યુઝવેન્દ્ર ચહલનું પ્રદર્શન પણ નોંધપાત્ર રહ્યું છે. તેણે ભારત તરફથી 72 વનડે આંતરરાષ્ટ્રીય મેચમાં 121 વિકેટ અને 80 ટી 20 આંતરરાષ્ટ્રીય મેચમાં 96 વિકેટ લીધી છે. આ ઉપરાંત, ઇન્ડિયન પ્રીમિયર લીગ (IPL) ની 188 મેચમાં તેના નામે 233 વિકેટ નોંધાયેલી છે.
ઓબીસી મોરચામાં રાષ્ટ્રીય સ્તરે મહત્ત્વની નિમણૂકો
ભાજપ દ્વારા જાહેર કરવામાં આવેલી સત્તાવાર યાદી અનુસાર, ઓબીસી મોરચાના સાત નેતાઓને રાષ્ટ્રીય ઉપાધ્યક્ષ તરીકે નિયુક્ત કરવામાં આવ્યા છે.
- જોગેન મોહન (આસામ)
- મમતા મોહંતા (ઓડિશા)
- સંગમલાલ ગુપ્તા (ઉત્તર પ્રદેશ)
- બબનરાવ રાવજી ચૌધરી (મહારાષ્ટ્ર)
- સત પ્રકાશ રાણા (દિલ્હી)
- અર્જુન સાહની (બિહાર)
- સંગીતા બલવંત બિંદ (ઉત્તર પ્રદેશ)
આ ઉપરાંત, ગજેન્દ્ર યાદવ (દિલ્હી), પ્રમોદ મધ્વરાજ (કર્ણાટક) અને લલિત ચંદ્રાકર (છત્તીસગઢ)ને રાષ્ટ્રીય મહામંત્રી તરીકે નિયુક્ત કરવામાં આવ્યા છે.
રાષ્ટ્રીય સચિવો અને સંગઠનાત્મક જવાબદારીઓ
ભાજપે વિવિધ રાજ્યોમાંથી સાત નેતાઓને ઓબીસી મોરચાના રાષ્ટ્રીય સચિવ તરીકે જવાબદારી સોંપી છે.
- દશરથજી ઠાકોર (ગુજરાત)
- ટી. વરથરાજન (તમિલનાડુ)
- સંજીવ કુમાર ઉર્ફે બબલુ ભગત (ઝારખંડ)
- સરિતા જાંગિડ (હરિયાણા)
- કડગાંચી રમેશ (તેલંગાણા)
- વૈભવ પંવાર (મધ્યપ્રદેશ)
- ભીમ કુમાર સાહૂ (બિહાર)
અન્ય સંગઠનાત્મક નિમણૂકોમાં ઉત્તર પ્રદેશના રાધેશ્યામ યાદવને રાષ્ટ્રીય ખજાનચી બનાવવામાં આવ્યા છે. જ્યારે દિલ્હીના સંજય કુમાર ગુર્જરને રાષ્ટ્રીય કાર્યાલય સચિવ અને ડો. અરુણ યાદવને સહ-કાર્યાલય સચિવ તરીકે નિયુક્ત કરવામાં આવ્યા છે. બિહારના અજય ગુપ્તાને ઓબીસી મોરચાના મીડિયા સંયોજક તરીકેની જવાબદારી સોંપવામાં આવી છે.
