પનીર ભૂલી જશો! એકવાર ઘરે બનાવો સ્પેશિયલ ‘રાજમા મલાઈ કોફ્તા’, જાણી લો ‘સિક્રેટ રેસિપી’

રોજ-રોજ રાત્રે એ જ દાળ, રોટલી કે બટાકાનું શાક ખાઈને કંટાળી ગયા છો? તો આજે રસોઈમાં કંઈક નવું અને એકદમ ચટાકેદાર વાનગી બનાવવાનો વારો છે. હેલ્ધી રાજમાથી બનતા ‘રાજમા મલાઈ કોફ્તા’ જ્યારે કાજુ અને મલાઈવાળી ક્રીમી ગ્રેવીમાં ડૂબે છે, ત્યારે તેનો સ્વાદ અદ્ભુત લાગે છે.

રાજમાના નરમ કોફ્તા જ્યારે કાજુ અને મલાઈવાળી રિચ ગ્રેવીમાં ડૂબે છે, ત્યારે મોંમાં જતાની સાથે જ ઓગળી જાય છે. આ ડિશ વીકેન્ડ ડિનર અથવા ઘરે આવેલા મહેમાનોને ઇમ્પ્રેસ કરવા માટે એકદમ પરફેક્ટ છે.

રાજમા મલાઈ કોફ્તા બનાવવા માટેની સામગ્રી

• 1 કપ ઉકાળેલા રાજમા (આખી રાત પલાળેલા અને સારી રીતે ઉકાળેલા)
• 2 ઉકાળેલા બટાકા (બાઈન્ડિંગ માટે)
• 1 ઝીણી સમારેલી ડુંગળી અને 2 લીલા મરચાં
• ઝીણી સમારેલી કોથમીર
• અડધી ચમચી ગરમ મસાલો, અડધી ચમચી લાલ મરચું પાવડર અને સ્વાદ મુજબ મીઠું
• તળવા માટે તેલ

ઢાબા સ્ટાઇલ ગ્રેવી માટે

• 2 મોટી ડુંગળી અને ૩ ટામેટાની પેસ્ટ
• 1 ચમચી આદુ-લસણની પેસ્ટ
• 8-10 કાજુની પેસ્ટ (રિચનેસ માટે)
• અડધો કપ તાજી મલાઈ અથવા ક્રીમ
• 1-1 ચમચી ધાણા પાવડર, હળદર અને કશ્મીરી લાલ મરચું
• 1 ચમચી કસૂરી મેથી
• 2 ચમચી તેલ અથવા માખણ

રાજમા મલાઈ કોફ્તા બનાવવાની રીત

1. સૌપ્રથમ એક મોટા વાસણમાં ઉકાળેલા રાજમાને સારી રીતે મેશ કરી લો. ધ્યાન રાખો કે, રાજમામાં પાણી ન હોવું જોઈએ. હવે તેમાં ઉકાળેલા બટાકા, ઝીણી સમારેલી ડુંગળી, લીલા મરચાં, કોથમીર અને બધા સૂકા મસાલા નાખીને સારી રીતે મિક્સ કરી લો. આ મિશ્રણમાંથી નાના-નાના ગોળ અથવા લંબગોળ કોફ્તા બનાવી લો. હવે એક કઢાઈમાં તેલ ગરમ કરો અને આ કોફ્તાને સોનેરી તેમજ ક્રિસ્પી થાય ત્યાં સુધી તળી લો. તેને એક પ્લેટમાં કાઢીને બાજુ પર રાખો.
2. હવે ગ્રેવી બનાવવા માટે બીજી એક કઢાઈમાં માખણ અથવા તેલ ગરમ કરો. તેમાં થોડું જીરું અને આદુ-લસણની પેસ્ટ નાખીને સાંતળો. હવે ડુંગળીની પેસ્ટ નાખો અને સોનેરી થાય ત્યાં સુધી પકાવો. ત્યારબાદ ટામેટાની પેસ્ટ, હળદર, ધાણા પાવડર અને કશ્મીરી લાલ મરચું નાખીને ત્યાં સુધી સાંતળો જ્યાં સુધી મસાલો તેલ ન છોડે.
3. મસાલો સારી રીતે ભળી જાય પછી તેમાં કાજુની પેસ્ટ નાખો અને 2 મિનિટ સુધી પકાવો. હવે ગેસની આંચ ધીમી કરો અને તેમાં તાજી મલાઈ અથવા ક્રીમ ઉમેરી દો. તેને સતત હલાવતા રહો, જેથી ગ્રેવી ફાટી ન જાય. હવે તેમાં અડધો કપ પાણી અને સ્વાદ મુજબ મીઠું નાખીને ગ્રેવીમાં એક ઉભરો આવવા દો.
4. ગ્રેવી જાડી થાય એટલે તેમાં કસૂરી મેથી અને થોડી કોથમીર નાખીને ગેસ બંધ કરી દો. ધ્યાન રાખો કે, કોફ્તાને ઉકળતી ગ્રેવીમાં ન નાખવા, નહિતર તે તૂટી શકે છે. હવે જ્યારે પણ તમારે જમવા પીરસવું હોય, ત્યારે સર્વિંગ બાઉલમાં પહેલા કોફ્તા મૂકો અને ઉપરથી ગરમાગરમ મલાઈદાર ગ્રેવી રેડી દો.
5. લો, તમારા ઢાબા સ્ટાઇલ ‘રાજમા મલાઈ કોફ્તા’ બિલકુલ તૈયાર છે. તેને ગરમાગરમ બટર નાન, લચ્છા પરોઠા અથવા જીરા રાઈસ સાથે સર્વ કરો.

વીકેન્ડમાં કંઈક ચટાકેદાર ખાવાનું મન છે? તો 10 મિનિટમાં બનાવો મુંબઈની સ્ટ્રીટ સ્ટાઈલ ‘રગડા પેટીસ’