1 ગ્લાસ ચોખામાં કેટલું પાણી નાખવું? કૂકરમાં પરફેક્ટ ભાત બનાવવાની ‘સિક્રેટ ટ્રિક’

દરેક વ્યક્તિ માટે ભાત બનાવવા એ સૌથી સહેલા કામોમાંનું એક છે પરંતુ ઘણી વખત ભાત કાં તો વધુ પડતા રાંધાઈ જાય છે અથવા યોગ્ય રીતે રંધાતા નથી. આવામાં પ્રેશર કૂકરનો સાચો ઉપયોગ તમારા કામને સરળ બનાવી શકે છે.

ઘણા લોકો ભાત જલ્દી બનાવવા માટે પ્રેશર કૂકરનો ઉપયોગ કરે છે અને આનાથી ગેસની બચત પણ થાય છે. જો કે, કૂકરમાં ભાત બનાવવા માટે પાણીનું યોગ્ય પ્રમાણ હોવું ખૂબ જ જરૂરી છે. આનાથી ભાત એકદમ છૂટા-છૂટા બને છે.

1 ગ્લાસ ચોખામાં કેટલું પાણી નાખવું જોઈએ?

ભાત બનાવવા માટે સૌથી પહેલા એક ગ્લાસ ચોખા લો. આના માટે પાણીનું પ્રમાણ ચોખાથી દોઢ ગણું રાખવું જોઈએ એટલે કે 1 ગ્લાસ ચોખા માટે 1.5 ગ્લાસ પાણી નાખો. ધ્યાન રાખો કે, જે ગ્લાસથી ચોખા માપો, તે જ ગ્લાસથી પાણી પણ માપો.

ચોખાને પહેલા સારી રીતે ધોઈ લો

ચોખાને રાંધતા પહેલા 2 થી 3 વખત ચોખ્ખા પાણીથી ધોઈ લો. આનાથી એક્સ્ટ્રા સ્ટાર્ચ નીકળી જાય છે અને ભાત વધારે ચીકણા નથી બનતા. ધોયા પછી ચોખાને સીધા પ્રેશર કૂકરમાં નાખી દો.

એક સીટીમાં બની જશે ‘ભાત’

કૂકરમાં ધોયેલા ચોખા અને માપેલું પાણી નાખીને ઢાંકણું બંધ કરી દો. હવે ગેસને તેજ આંચ પર રાખો, જેવી પહેલી સીટી વાગે, તરત જ ગેસ બંધ કરી દો. એકથી વધુ સીટી વાગવા દેવાની ભૂલ ન કરો, કારણ કે આનાથી ભાત વધારે રંધાઈ શકે છે.

કૂકરનું ઢાંકણું તરત ન ખોલો

ભાત સારા બનવાની સૌથી જરૂરી ટ્રિક આ જ છે. ગેસ બંધ કર્યા પછી કૂકરને 15 થી 20 મિનિટ સુધી એમ જ રહેવા દો. હવે પૂરું પ્રેશર જ્યારે પોતાની જાતે નીકળી જાય, ત્યારે જ ઢાંકણું ખોલો. આનાથી ભાત વરાળમાં ધીમે-ધીમે પાકે છે અને તેના દાણા તૂટતા નથી.

Food Combinations for Health: શું તમે જાણો છો આ 6 સ્માર્ટ ફૂડ કોમ્બિનેશન? સાથે ખાશો તો શરીરને મળશે અઢળક ફાયદા