‘યુદ્ધ વિકલ્પ નથી’, પાકિસ્તાનના પીએમ શાહબાઝે ભારત સાથે શાંતિ માટે હાથ લંબાવ્યો

પાકિસ્તાનના (pakistan) વડાપ્રધાન શાહબાઝ શરીફે (Shahbaz Sharif)ફરી એકવાર ભારત (india) સાથે શાંતિની વાત કરી છે. તેમણે કહ્યું કે યુદ્ધ બંને દેશો માટે વિકલ્પ નથી. તેમણે કહ્યું કે તેઓ ભારત સાથે ‘સ્થાયી શાંતિ’ ઈચ્છે છે અને આ માટે વાતચીત જ એકમાત્ર રસ્તો છે. યુદ્ધ કોઈ પણ દેશ માટે ઉકેલ નથી. પરંતુ શાંતિ જમ્મુ અને કાશ્મીર મુદ્દાના ઉકેલ સાથે જોડાયેલી છે, એમ તેમણે જણાવ્યું હતું. હાર્વર્ડ યુનિવર્સિટીના વિદ્યાર્થીઓના પ્રતિનિધિમંડળ સાથેની વાતચીતમાં તેમણે આ વાત કહી.

“પાકિસ્તાન ક્ષેત્રમાં શાંતિના પક્ષમાં છે અને પ્રાદેશિક શાંતિ સંયુક્ત રાષ્ટ્રના ઠરાવ હેઠળ જમ્મુ અને કાશ્મીરના મુદ્દાના ઉકેલ પર નિર્ભર છે,” તેમણે કહ્યું. તેમણે કહ્યું, “અમે ભારત સાથે સ્થાયી શાંતિ ઈચ્છીએ છીએ અને વાતચીત જ એકમાત્ર રસ્તો છે. યુદ્ધ એ કોઈપણ દેશ માટે વિકલ્પ નથી.

અસ્થિરતાને કારણે પાકિસ્તાનમાં આર્થિક સંકટ

શાહબાઝ શરીફે કહ્યું કે ઈસ્લામાબાદ અને નવી દિલ્હીએ વેપાર અને અર્થવ્યવસ્થામાં સમાનતા કરવી જોઈએ. પાકિસ્તાન પીએમે દેશની આર્થિક સ્થિતિ અને દેશમાં અસ્થિરતા વિશે પણ વાત કરી. તેમણે કહ્યું કે પાકિસ્તાનમાં આર્થિક સંકટ માળખાકીય સમસ્યાઓ અને દાયકાઓની રાજકીય અસ્થિરતાને કારણે છે. તેમણે કહ્યું કે પાકિસ્તાનના જન્મ પછીના પ્રથમ કેટલાક દાયકાઓમાં અર્થવ્યવસ્થાના તમામ ક્ષેત્રોમાં પ્રભાવશાળી વૃદ્ધિ જોવા મળી હતી, જ્યારે પરિણામો ઉત્પન્ન કરવા માટે યોજનાઓ, રાષ્ટ્રીય ઇચ્છા અને અમલીકરણ પદ્ધતિઓ હતી.

પીએમ મોદી અને શાહબાઝ શરીફની મુલાકાત થવાની સંભાવના છે

પાકિસ્તાનના પીએમ શરીફનું આ નિવેદન એવા સમયે આવ્યું છે જ્યારે આગામી મહિને સમરકંદમાં યોજાનારી SCO સમિટમાં બંને દેશોના વડા પ્રધાનોની મુલાકાત થવાની સંભાવના છે. 15-16 સપ્ટેમ્બરના રોજ સમરકંદ, ઉઝબેકિસ્તાનમાં યોજાનારી શિખર સંમેલન પહેલા, એવા અહેવાલો છે કે બંને દેશોના વડા પ્રધાનો દ્વિપક્ષીય બેઠક પણ યોજી શકે છે. છેલ્લા છ વર્ષથી બંને દેશોના નેતાઓ વચ્ચે કોઈ બેઠક થઈ નથી અને બંને દેશો વચ્ચે કોઈ વાતચીત થઈ નથી. આવી સ્થિતિમાં એવું માનવામાં આવે છે કે જો બંને દેશોના નેતાઓ સમરકંદમાં મળે છે તો ભારત-પાકિસ્તાન પરસ્પર સંબંધો સુધારવાની દિશામાં આગળ વધી શકે છે.