Breaking News: ઈરાન-ઈઝરાયેલ યુદ્ધ વચ્ચે કુવૈતે તોડી પાડ્યા અમેરિકાના 3 ફાઈટર જેટ્સ

મધ્ય-પૂર્વમાં ચાલી રહેલા ભીષણ યુદ્ધ વચ્ચે એક અત્યંત દુર્ભાગ્યપૂર્ણ ઘટના સામે આવી છે. કુવૈતે તેના મિત્ર દેશ અમેરિકાના જ 3 F-15E સ્ટ્રાઈક ઈગલ (Strike Eagle) લડાયક વિમાનોને તોડી પાડ્યા છે. યુએસ સેન્ટ્રલ કમાન્ડના જણાવ્યા અનુસાર, વિમાનમાં સવાર તમામ 6 ક્રૂ મેમ્બર્સ સુરક્ષિત રીતે ઈજેક્ટ થઈ ગયા હતા અને તેમને બચાવી લેવાયા છે.

કેવી રીતે બની આ ઘટના?

આ ઘટના 2 માર્ચ, એટલે કે આજે વહેલી સવારેમાં બની હતી. તે સમયે અમેરિકન F-15E વિમાનો ઈરાન પરના હુમલામાં મદદ કરી રહ્યા હતા. તે દરમિયાન આ વિસ્તારમાં ઈરાની વિમાનો, બેલેસ્ટિક મિસાઈલો અને ડ્રોન હુમલાઓ સતત થઈ રહ્યા હતા. આ અફરાતફરીમાં કુવૈતી એર ડિફેન્સ સિસ્ટમે અમેરિકન વિમાનોને ભૂલથી ઈરાની ખતરો સમજી લીધા અને તેમના પર ફાયરિંગ કરીને તેમને તોડી પાડ્યા.

ઓપરેશન એપિક ફ્યુરી અને ઈરાનની વળતી કાર્યવાહી

અમેરિકા અને ઈઝરાયેલ દ્વારા ઈરાનના સૈન્ય ઠિકાણાઓ પર 1000થી વધુ હુમલા કરવામાં આવ્યા છે. તેના જવાબમાં ઈરાને કુવૈત સહિતના ખાડી દેશો પર મિસાઈલ અને ડ્રોન હુમલા શરૂ કર્યા છે. કુવૈત સિટીમાં આવેલા અમેરિકન દૂતાવાસ સંકુલને પણ નિશાન બનાવવામાં આવ્યું છે, જ્યાંથી આગ અને ધુમાડાના ગોટેગોટા જોવા મળ્યા હતા.

યુદ્ધમાં જાનહાનિનો આંકડો

ઈરાની રેડ ક્રિસેન્ટ સોસાયટીના જણાવ્યા અનુસાર, અમેરિકા-ઈઝરાયેલના ઓપરેશનમાં અત્યાર સુધીમાં ઈરાનમાં ઓછામાં ઓછા 555 લોકો માર્યા ગયા છે અને 130થી વધુ શહેરો આ હુમલાની લપેટમાં આવ્યા છે. કુવૈત સરકારે આ ઘટનાને સ્વીકારી છે અને બંને દેશો હવે ભવિષ્યમાં આવી ભૂલ ન થાય તે માટે તપાસ અને વધુ સારા સંકલન પર કામ કરી રહ્યા છે.

નિષ્ણાતો માને છે કે યુદ્ધ ક્ષેત્રમાં ભીડભાડવાળું આકાશ અને અત્યંત ઝડપથી બદલાતી પરિસ્થિતિને કારણે આ ‘ફ્રેન્ડલી ફાયર’ની ઘટના બની છે.

ઈરાન પર હુમલામાં બદલાયું દુનિયાનું ‘ઓઈલ પોલિટિક્સ’: રશિયા ફરી પિક્ચરમાં આવ્યું, શું ભારતને મળશે સસ્તું તેલ ?,

વાંચવા માટે અહીં ક્લિક કરો