એકદમ કોપી પેસ્ટ! હવે પાકિસ્તાનમાં પણ ઉભા થયા ‘કોકરોચ’.. બની ગઈ “કોકરોચ પાર્ટી પાકિસ્તાન”

ભારતમાં સોશિયલ મીડિયા પર ચર્ચામાં રહેલી ‘કોકરોચ જનતા પાર્ટી (CJP)’ બાદ હવે પાકિસ્તાનમાં પણ ‘કોકરોચ પાર્ટી પાકિસ્તાન (CPP)’ નામનું એક નવું જૂથ સોશિયલ મીડિયા પર ઝડપથી લોકપ્રિય બની રહ્યું છે. આ જૂથ પોતાને ભ્રષ્ટાચાર, ખરાબ શાસન વ્યવસ્થા અને દેશની આર્થિક મુશ્કેલીઓ સામે અવાજ ઉઠાવતું યુવા આંદોલન ગણાવે છે.

પાકિસ્તાનમાં પણ બની કોકરોચ પાર્ટી

જૂથના જણાવ્યા અનુસાર, તેનો મુખ્ય ઉદ્દેશ્ય પાકિસ્તાનમાં આર્થિક અને રાજકીય સ્થિરતા, ગુણવત્તાયુક્ત શિક્ષણ, ઊર્જા સંકટનો ઉકેલ અને પાણીની અછત જેવી ગંભીર સમસ્યાઓનું નિરાકરણ લાવવાનો છે.

1.12 લાખથી વધુ ફોલોઅર્સ

સોશિયલ મીડિયા પ્લેટફોર્મ ઇન્સ્ટાગ્રામ પર આ જૂથને અત્યાર સુધીમાં 1.12 લાખથી વધુ લોકો ફોલો કરી રહ્યા છે. જૂથનું સૂત્ર છે, “પાકિસ્તાન તેના લોકોનું છે, ભ્રષ્ટ માફિયાઓનું નહીં.” આ અભિયાન પોતાને યુવાનો દ્વારા સંચાલિત એકતા અને પરિવર્તન માટેની પહેલ તરીકે રજૂ કરી રહ્યું છે.

છેલ્લા કેટલાક દિવસોથી આ જૂથની સોશિયલ મીડિયા પોસ્ટ્સ અને અભિયાન ચર્ચાનું કેન્દ્ર બન્યા છે. જોકે, આ જૂથને લઈને હજુ સુધી પાકિસ્તાન સરકાર તરફથી કોઈ સત્તાવાર પ્રતિક્રિયા સામે આવી નથી.

પાકિસ્તાનના મંત્રીઓ ડરમાં

આ ચળવળનો ડર પાકિસ્તાની સરકારમાં પહેલેથી જ દેખાઈ રહ્યો છે. ગૃહમંત્રી મોહસીન નકવીએ આશંકા વ્યક્ત કરી છે કે જો સિસ્ટમ સુધારવામાં નહીં આવે, તો આ ‘કોક્રોચ’ બધું જ ઉથલાવી શકે છે. પોતાની સરકારને ચેતવણી આપતા, નકવીએ કહ્યું કે ભલે કોઈ તેમને ‘યુવાનો’, ‘વંદો’ કહે કે બીજું કંઈ કહે, જો તેઓ એક થાય, તો તેઓ આખી પરિસ્થિતિને ઉથલાવી શકે છે.

રાજકીય પરિદૃશ્ય ઉપરાંત, પાકિસ્તાનની આર્થિક સ્થિતિ ભયાનક છે; દેશ નબળી અર્થવ્યવસ્થા, દેવા, હિંસા અને બેરોજગારીનો સામનો કરી રહ્યો છે. ગૃહમંત્રી મોહસીન નકવીએ તાજેતરમાં આ મુદ્દાઓ પર પ્રકાશ પાડ્યો હતો અને રાષ્ટ્રની આર્થિક નિષ્ફળતાઓનો ખુલ્લેઆમ સ્વીકાર કર્યો હતો.

તેમણે ટિપ્પણી કરી, “જો આ ‘કોકરોચ’ એક થાય, તો તેઓ બધું ઉથલાવી શકે છે. તેઓ ઇચ્છે છે કે સિસ્ટમ યોગ્ય રીતે કાર્ય કરે. તેઓ ન્યાય, યોગ્યતા, નોકરીની તકો અને સરકારી રોજગારમાં સમાન પ્રવેશ ઇચ્છે છે. આપણે આપણા યુવાનોને આ વસ્તુઓ પૂરી પાડવામાં નિષ્ફળ ગયા છીએ. તેમને યુવા, વંદો, અથવા બીજું કંઈ કહો – જો તેઓ એક થાય, તો બધું બદલાઈ શકે છે.”

Breaking News : એન્ટી પેપર લીક બિલ બન્યું કાનુન, રાષ્ટ્રપતિએ આપી મંજૂરી, જાણો હવે આરોપીને કેટલી થશે સજા અને દંડ?, આ સ્ટોરી વાંચવા અહીં ક્લિક કરો