ગઈકાલ શનિવારે, શેહબાઝ શરીફના નેતૃત્વ હેઠળની પાકિસ્તાન સરકારે એક તાકીદની બેઠક યોજી હતી. આ બેઠકમાં એવો નિર્ણય લેવાયો હતો કે,  રાજ્ય-માલિકીના સાહસો (SOEs) અને સ્વાયત્ત સંસ્થાઓના કર્મચારીઓ માટે 5 થી 30 ટકા સુધીના પગાર કાપ મૂકવો. આ નિર્ણયને શરીફ સરકારે મંજૂરી આપી હતી. પગાર કાપનું પગલું વ્યાપક કરકસર અભિયાનના ભાગ રૂપે લાગુ કરવામાં આવ્યું હોવાનુ જાહેર કરવામાં આવ્યું છે. વડાપ્રધાન કાર્યાલય દ્વારા જાહેર કરાયેલા એક નિવેદન અનુસાર, ઇંધણના ભાવમાં વધઘટ અને સરકારી કરકસરનાં પગલાંની સમીક્ષા કરવા માટે પીએમ શેહબાઝ શરીફની અધ્યક્ષતામાં એક ઉચ્ચ-સ્તરીય બેઠક બોલાવવામાં આવી હતી.

પગારમાં 5% થી 30% સુધીનો ઘટાડો

મીટિંગ દરમિયાન, એવું નક્કી કરવામાં આવ્યું હતું કે—સરકારી કર્મચારીઓની જેમ—રાજ્ય માલિકીના સાહસો અને સરકારી આશ્રય હેઠળ કાર્યરત સ્વાયત્ત સંસ્થાઓના કર્મચારીઓના પગારમાં પણ 5 થી 30 ટકાનો ઘટાડો કરવામાં આવશે. નિવેદનમાં નોંધવામાં આવ્યું છે કે આ પગલાંથી થતી બચતનો ઉપયોગ ફક્ત જનતાને રાહત આપવા માટે કરવામાં આવશે.

ઈંધણ ફાળવણીમાં 50% ઘટાડો

મીટિંગમાં એવો પણ નિર્ણય કરવામાં આવ્યું હતું કે સરકારી વાહનો માટે ઈંધણ ફાળવણીમાં 50 ટકાનો ઘટાડો કરવો. આ પધ્ધતિને થર્ડ પાર્ટી ઓડિટ દ્વારા મોનિટર કરવામાં આવશે, જ્યારે આગામી બે મહિનામાં 60 ટકા સરકારી વાહનો રસ્તાઓ પરથી દૂર કરવામાં આવશે, એટલે કે આ વાહનોને બંધ કરી દેવાશે. પીએમ કાર્યાલયના નિવેદન અનુસાર, નવા વાહનોની ખરીદી ઉપર હાલમાં સંપૂર્ણ પ્રતિબંધ લાદવાનો સરકારે નિર્ણય કર્યો છે. તેમજ અન્ય સરકારી ખરીદી પર મોરેટોરિયમ પણ અમલમાં રહેશે. વધુમાં, કેબિનેટ સભ્યો, મંત્રીઓ, સલાહકારો અને ખાસ સહાયકોના બે મહિનાના પગારનો ઉપયોગ જાહેર કલ્યાણકારી પહેલ માટે બચત તરીકે કરવામાં આવશે.

પાકિસ્તાન પર યુદ્ધની અસર

શરીફે પુનરોચ્ચાર કર્યો કે સરકારી અધિકારીઓ, મંત્રીઓ, રાજ્યમંત્રીઓ અને ખાસ સહાયકો માટે વિદેશ યાત્રા પર સંપૂર્ણ પ્રતિબંધ ચાલુ રહેશે. જેમ જેમ યુએસ-ઈરાન સંઘર્ષ તેના ત્રીજા અઠવાડિયામાં પ્રવેશી રહ્યો છે, તેમ તેમ તેના પરિણામો પાકિસ્તાનમાં દેખાવા લાગ્યા છે. ગયા શુક્રવારે પેટ્રોલિયમના ભાવમાં પ્રતિ લિટર 55 રૂપિયાના વધારા બાદ, સરકારે ઇંધણનો વપરાશ ઘટાડવા માટે ઘણા પગલાંની જાહેરાત કરી.

Iran Israel War Breaking News : ફોર્મ્યુલા 1 ની જાહેરાત, બહેરીન અને સાઉદી અરેબિયામાં રેસ રદ