વડોદરાના પિઝાઇનોઝમાં મહિલા-બાળકોને પિરસાયા ફૂગવાળા પિત્ઝા! માત્ર દંડ વસૂલીને સંતોષ માનતી ઓથોરિટી સામે જનતામાં ભારે આક્રોશ- જુઓ Video

વડોદરા શહેરમાંથી જાણીતા પિત્ઝા આઉટલેટ ‘પિઝાઇનોઝ’ (Pizzainos) ની ઘોર બેદરકારી સામે આવી છે, જેણે ગ્રાહકોના સ્વાસ્થ્ય સાથે ખુલ્લેઆમ ચેડાં કર્યાં છે. ત્રણ મહિલાઓ પોતાના નાના બાળકો સાથે અહીં પિત્ઝા ખાવા માટે ગઈ હતી. આ દરમિયાન મહિલાઓને જે પિત્ઝા પિરસવામાં આવ્યા તેમાં સ્પષ્ટપણે ફૂગ વળી ગઈ હતી. એટલું જ નહીં, મહિલાને આપવામાં આવેલા સ્ટાર્ટરમાંથી પણ અસહ્ય દુર્ગંધ આવી રહી હતી.

આ વાસી અને ગંદો ખોરાક જોઈને મહિલાઓએ આઉટલેટ પર જ ભારે હોબાળો મચાવ્યો હતો. જોકે, સ્ટોરના મેનેજરે આ બાબતે કોઈ યોગ્ય જવાબ ન આપતાં ગ્રાહકોમાં રોષ ભભૂકી ઉઠ્યો હતો. અંતે પીડિત મહિલાએ આ સમગ્ર ઘટનાના વીડિયો અને ફોટા સોશિયલ મીડિયા પર વાયરલ કરીને આરોગ્ય વિભાગ તથા પોલીસ તંત્રને કડક કાર્યવાહી કરવા લેખિત જાણ કરી છે.

ગુજરાતમાં આવી ઘટનાઓ હવે રોજબરોજની બની ગઈ છે. ક્યાંક પાણીપુરીમાંથી હાડકાં નીકળે છે, ક્યાંક પિત્ઝામાંથી મચ્છર નીકળે છે, તો વળી ફાઈવ સ્ટાર હોટેલો હોવા છતાં સેન્ડવીચની અંદરથી જીવતા કીડા નીકળવાના કિસ્સાઓ સામે આવી રહ્યા છે. એક તરફ સરકાર સામાન્ય લોકોને બતાવવા માટે ‘સ્વચ્છ ભારત મિશન’ જેવા મોટા મોટા અભિયાનો ચલાવે છે, પરંતુ ગ્રાહકોના સ્વાસ્થ્યની સુરક્ષાના નામે ગ્રાઉન્ડ લેવલ પર સ્થિતિ બિલકુલ શૂન્ય છે.

સૌથી મોટી આશ્ચર્યની વાત એ છે કે જ્યારે પણ આવી કોઈ ગંભીર ઘટના સામે આવે છે, ત્યારે વહીવટી તંત્ર માત્ર દેખાડો કરવા માટે તે દુકાનદાર કે હોટેલ મેનેજમેન્ટને સામાન્ય દંડ ફટકારે છે અને વાતને રફેદફે કરી દે છે. જાણે તંત્રને કોઈ શરમ જ ન હોય તેમ માત્ર દંડ વસૂલીને સંતોષ માની લેવાય છે અને બીજા જ દિવસથી તે હોટેલ કે આઉટલેટવાળા પોતાનો વેપાર ફરી ધમધમતો કરી દે છે. પ્રશાસનની આ ઢીલી નીતિ જોઈને એવું લાગી રહ્યું છે કે તેમને સામાન્ય જનતાના જીવની કોઈ કિંમત જ નથી.

કોઈ નિર્દોષ નાગરિકનો જીવ જશે તો પણ આ લોકોને કોઈ ફરક પડવાનો નથી. ચૂંટણીના સમયે જ જનતા યાદ આવે છે અને બાકીના સમયે માત્ર જલસા કરવાના, તેવી નેતાઓની અને અધિકારીઓની માનસિકતા બની ગઈ હોય તેમ લાગી રહ્યું છે. ગ્રાહકો હવે માત્ર દંડ નહીં પણ આવા આઉટલેટ સંચાલકો સામે જેલ ભેગા કરવાની કડક કાનૂની કાર્યવાહીની માંગ કરી રહ્યા છે.

હોટલના ટુવાલ હંમેશા નવા જેવા મુલાયમ કેવી રીતે રહે છે? જાણી લો લોન્ડ્રીવાળાની એ 7 ખાસ ટ્રીક્સ જે ઘરમાં આવશે કામ