Surat : વેતનમાં વધારો કરવાની માંગ સાથે મધ્યાહન ભોજન કર્મચારીઓએ, માંગરોળ મામલતદારને પાઠવ્યું આવેદનપત્ર
છેલ્લા બે વર્ષમાં કુકીંગ કોસ્ટ માં કોઈ પણ પ્રકારનો વધારો થયેલ નથી અને હાલ મોંધવારી સતત વધી રહી છે તો કુકીંગ કોસ્ટમાં મોંઘવારીનો દર મુજબ વધારો કરી આપવામાં આવે એ જરૂરી છે.
માંગરોળ (Mangrol ) તાલુકા મધ્યાહન ભોજન કર્મચારી મંડળ અને ભારતીય મજદૂર સંઘના સંયુક્ત ઉપક્રમે પડતર પ્રશ્નોના નિરાકરણ માટે મામલતદારને આવેદનપત્ર અપાયું હતું. માંગરોળ તાલુકા મધ્યાહન ભોજન કર્મચારી મંડળ ના પ્રમુખ ના નેતૃત્વ હેઠળ કર્મચારીઓએ મામલતદારને આવેદનપત્ર પાઠવવામાં આવ્યું હતું.
આ આવેદન પત્રમાં મુખ્યમંત્રીને સંબોધતા રજુઆત કરવામાં આવી હતી. જેમાં જણાવવામાં આવ્યું હતું કે પડતર પશ્નો મુદ્દે જો નિરાકરણ લાવવામાં નહીં આવે તો આગામી સમયમાં લડત આપવામાં આવશે. નોંધનીય છે કે મધ્યાહન ભોજન કર્મચારીઓને હાલમાં માસીક વેતન ફકત 1600, 1400, 500 અને 300 ચુકવવામાં આવે છે જે ઓછા છે તેમજ અન્ય રાજ્યમાં જેમ કે પોડુંચેરી 21,000, કેરલામા 14,000, તામીલનાડુમા 9000 ,જેટલુ વેતન મધ્યાહન ભોજન કર્મચારીઓને ચુકવવામાં આવે છે.
તેઓએ ચીમકી ઉચ્ચારી છે કે જો તારીખ 15 સપ્ટેમ્બર 2022 સુધી તેમના પ્રશ્નનું યોગ્ય નિરાકરણ ન આવે તો આગામી તારીખ. 19 સપ્ટેમ્બર, 2022 ના રોજ ગાંધીનગર ખાતે ધરણા તેમજ તારીખ 20 સપ્ટેમ્બર, 2022 થી અચોક્કસ મુદત માટે કેન્દ્ર બંધ રાખવા માટેનું આહવાન કરવામાં આવ્યું છે. વધુમાં તેઓએ જણાવ્યું કે અમારા વેતનમાં વધારો કરી સમાન કામ, સમાન વેતન મુજબ લઘુતમ વેતન ચુકવવા માંગ કરી છે.
રાજ્ય સરકાર દ્વારા હાલ બાળકોને પીરસવામાં આવતા ભોજનના બે ભાગ કરી નાસ્તો આપવાનું સૂચન કરવામાં આવ્યું છે. પણ એના માટે કોઈ પણ પ્રકારનો નાણાકીય બોજ પડ્યો નથી તો. આ માટે અલગ થી જથ્થો મળી રહે તેવી રજૂઆત કરી છે. હાલની મોંઘવારી જોતા આટલા ઓછા ખર્ચમાં નાસ્તો તથા ભોજન બનાવવું અશકય હોય નાસ્તા માટે અલગથી જથ્થો તથા પેશગી ચુકવવા માંગ કરી છે. છેલ્લા બે વર્ષમાં કુકીંગ કોસ્ટ માં કોઈ પણ પ્રકારનો વધારો થયેલ નથી અને હાલ મોંધવારી સતત વધી રહી છે તો કુકીંગ કોસ્ટમાં મોંઘવારીનો દર મુજબ વધારો કરી આપવામાં આવે એ જરૂરી છે.
કારણ કે બે વર્ષ પહેલા રાંધણ ગેસના એક બોટલના ભાવ 700 રૂપિયા હતા, તે હાલમાં 1100 રૂપિયા પર પહોંચી ગયા છે. તેમજ શાકભાજી, મરીમસાલા તેમજ અન્યના ભાવ પણ ખુબ વધી જવાથી ભોજન-નાસ્તો આપવો અશક્ય છે, જેથી કર્મચારીઓને આપવામાં આવતા કુકીંગ કોસ્ટમાં વધારો કરવાની માંગણી કરવામાં આવી છે.