Bardoli : એક જ મહિનામાં ચોરીના 40 બનાવ, પોલીસનો પનો ટૂંકો પડ્યો હોય તેમ સ્થાનિકો સાથે શરૂ કર્યા મીટિંગોના દોર
પોલીસ (Police ) દ્વારા આ મિટિંગમાં સ્થાનિક રહીશોએ આવી ઘટનાઓ બનતી અટકાવવા કેવી તકેદારીઓ રાખવી તે બાબતે માહિતી આપી હતી.
બારડોલી (Bardoli ) નગર અને તાલુકામાં તસ્કરો (Thief ) બેફામ બની ગયા હોય તેમ રોજ જ ઘરફોડ ચોરીઓના કિસ્સાઓ એક પછી એક સામે આવી રહ્યા છે. ગઈકાલે પણ તેનરોડ પર આવેલ સનસીટી સોસાયટીમાં રાત્રી દરમિયાન તસ્કરો ત્રાટકયા હતા. અને લૂંટારુઓ દ્વારા 5 જેટલા ઘરોમાં ચોરીનો નિષ્ફળ પ્રયાસ કરવામાં આવ્યો હતો. જોકે બારડોલી પોલીસનો ઘાટ ઘોડા નાસી ગયા બાદ તબેલાને તાળા મારવા જેવો થયો છે. છેલ્લા એક મહિનામાં 40 થી વધુ ઘરફોડ ચોરીના બનાવો સામે આવ્યા બાદ પોલીસ હવે મોડે મોડે સફાળી જાગી છે.
પોલીસે શરૂ કર્યો મીટિંગોનો દોર :
બારડોલી પોલીસે ખેતરાડી વિસ્તાર નજીક તેમજ રેલવે ટ્રેક નજીક આવેલી સોસાયટીઓમાં સ્થાનિકો સાથે મિટિંગોનો દોર શરૂ કર્યો છે. પોલીસ દ્વારા ગુનેગારોને પકડવા પનો ટૂંકો પડતો હોય તેમ સોસાયટીના રહીશોએ રાખવાની તકેદારી બાબતે દ્વારા સાવચેતી રાખવા કેટલાક સૂચનો પણ આપવામાં આવ્યા હતા.
એક જ મહિનામાં 40 થી વધુ ચોરીના બનાવ :
બારડોલીમાં તસ્કરો બેફામ બન્યા હોય તેમ નગર અને તાલુકાના ગામોમાં છેલ્લા 1 મહિનામાં 40 થી વધુ ઘરોને નિશાન બનાવવામાં આવ્યા છે. અને ચોરી તેમજ ચોરીનો નિષ્ફળ પ્રયાસ કરવામાં આવ્યા છે. જેને પગલે પોલીસ એક્શનમા આવી છે અને હવે મોડે મોડે જાગીને નગર તેમજ તાલુકાના મુખ્ય માર્ગો પર ઠેર ઠેર બેરીકેટ મૂકી રાત્રી દરમિયાન પોલીસ કર્મીઓ તૈનાત કરી દેવામાં આવ્ય છે.
તો બીજી તરફ તસ્કરો હજી પણ પંથકના ખેતરાડી તેમજ રેલવે ટ્રેક નજીક આવેલ સોસાયટીઓને નિશાન બનાવી ચોરીની ઘટનાને અંજામ આપી રહ્યા છે. ત્યારે પોલીસે આસપાસ આવેલી તમામ સોસાયટીઓનાં રહીશો સાથે આવી ઘટનાઓને બનતી રોકવા માટે મિટિંગનો દોર શરૂ કર્યો છે.
લોકોને આપ્યા આ સૂચનો :
પોલીસ દ્વારા આ મિટિંગમાં સ્થાનિક રહીશોએ આવી ઘટનાઓ બનતી અટકાવવા કેવી તકેદારીઓ રાખવી તે બાબતે માહિતી આપી હતી. તસ્કરો આસાનીથી દીવાલ કૂદીને સોસાયટીમાં પ્રવેશી ન શકે તે માટે સોસાયટીની આસપાસની દીવાલ ઊંચી કરવા માટે દીવાલની અજુબાજુ તારનું ફેન્સીંગ કરવા જણાવાયું હતું. તેમજ સોસાયટીમાં રાખવામાં આવતા વોચમેનો યુવાન રાખવા માટે પણ સૂચન આપવામાં આવ્યું હતું.
જેથી રાત્રી દરમિયાન તસ્કરો સોસાયટીમાં આવે તો વોચમેન દોડીને એક છેડેથી બીજા છેડે પહોંચી જાય. આ ઉપરાંત ઘરની આસપાસ કઇ પણ ચહલ પહલ કે અજુગતું લાગે તો તાત્કાલિક ઘરની તમામ લાઈટો ચાલુ કરી આસપાસનાં લોકોને બૂમો પાડીને તાત્કાલિક સજાગ કરવા અને પોલીસને જાણ કરવા જણાવવામાં આવ્યું છે. તે સિવાય સોસાયટીમાં લગાવાયેલા તમામ CCTV કેમેરાઓ ચાલુ રાખવા જેવા અન્ય સૂચનો પોલીસ તંત્ર દ્વારા સ્થાનિક રહીશોને આપવામાં આવ્યા હતા.
Input Credit Jignesh Mehta (Bardoli )