Junagadh પાલિકાને પાણી પુરૂં પાડતા જળાશયોમાં જુલાઇ સુધીનું જ પાણી, ચાર ડેમમાં માત્ર 30 ટકા પાણી
આમ જોવા જઈએ તો હાલ તો જૂનાગઢમાં (Junagadh) પાણીની કોઇ સમસ્યા નથી પરંતુ સિંચાઇ અને પાણી રિઝર્વ રાખવાના ડેમોમાં જથ્થો ઓછો થતો જાય છે. આ સ્થિતિ જોતાં વિસાવદર, ભેસાણ, વંથલી, માળીયાહાટી અને માણાવદર આ ચાર તાલુકામાં થોડી ઘણી પાણીની અછત વર્તાઈ શકે તેવી સંભાવના છે.
ગુજરાતમાં આગ ઝરતી ગરમીની શરુઆત થઇ ગઇ છે. ઉનાળો (Summer) શરુ થતા જ હવે જુનાગઢમાં (Junagadh) પાણીની સમસ્યા ઉભી થવાની સંભાવના છે. ઊનાળો માથા પર છે અને જૂનાગઢ જિલ્લાના 17 જળાશયોમાંથી ચાર જળાશયોમાં 30 ટકા કરતા પણ ઓછું પાણી છે. આ જોતાં અહીંના તાલુકાઓમાં પાણીની સમસ્યા સર્જાય તેમ છે. ત્યારે જુનાગઢવાસીઓમાં અત્યારથી જ પાણીની સમસ્યા (Water Crisis) ઊભી થવાની ચિંતા સતાવી રહી છે. ત્યારે એ જાણવાનો પ્રયાસ કરીએ કે જૂનાગઢમાં આવનારા મહિનાઓમાં પાણીની સ્થિતિ કેવી રહેશે.
ડેમોમાંથી કેટલાકમાં 50 ટકાથી ઓછો જથ્થો
આકરો બનતો ઊનાળો હવે તપી રહ્યો છે. ત્યારે જૂનાગઢવાસીઓને હવે પીવાનું પાણી, સિંચાઈનું પાણી અને ઢોર ઢાંખર માટે પણ પાણીની વ્યવસ્થાની સમસ્યા ઊભી થશે. જોકે જૂનાગઢની વાત કરીએ તો અહીં જિલ્લામાં કુલ 17 ડેમ આવેલા છે. જેમાંથી જૂનાગઢ મહાનગરપાલિકાને પીવાનું પાણી પુરૂં પાડતા જળાશયોમાં હજુ જુલાઇ સુધી ચાલે તેટલો પાણીનો જથ્થો છે. શહેરમાં આવેલા વિલીંગ્ડન ડેમ, શહેરની બહાર આવેલા હસ્નાપુર ડેમ અને આણંદપુર ડેમમાંથી પીવાનું પાણીનું વિતરણ કરવામાં આવે છે.આ ઉપરાંત શહેરમાં આવેલ કૂવા, બોર, ડંકીમાંથી પણ પાણી મેળવવામાં આવે છે. જેની સાથે મોટાભાગના જળાશયોમાંથી સિંચાઈ અને પીવાનું પાણી રિઝર્વ રાખવામાં આવે છે. આ ડેમોમાંથી કેટલાકમાં 50 ટકાથી ઓછો જથ્થો છે તો કેટલાકમાં તેનાથી વધારે.
બીજી તરફ વિસાવદર તાલુકાનો ઝાંઝશ્રી ડેમ, ભેસાણનો મોટા ગુજરીયા ડેમ, ભેસાણનો જ કુબેર ડેમ, વંથલી તાલુકાનો સાબલી ડેમ, માળીયાહાટીના તાલુકાનો વ્રજમી ડેમ અને માણાવદર તાલુકાનો બાટવા ખારો ડેમ આ તમામ ડેમોમાં 25 થી 30 ટકા જેટલો પાણીનો જથ્થો હાલ ઉપલબ્ધ છે. એટલે કે આગામી એક બે મહિના સુધી ચાલી શકે તેટલો જ જથ્થો હવે બચ્યો છે એવું અધિકારીઓનું કહેવું છે.
આમ જોવા જઈએ તો હાલ તો જૂનાગઢમાં પાણીની કોઇ સમસ્યા નથી પરંતુ સિંચાઇ અને પાણી રિઝર્વ રાખવાના ડેમોમાં જથ્થો ઓછો થતો જાય છે. આ સ્થિતિ જોતાં વિસાવદર, ભેસાણ, વંથલી, માળીયાહાટી અને માણાવદર આ ચાર તાલુકામાં થોડી ઘણી પાણીની અછત વર્તાઈ શકે તેવી સંભાવના છે.
વધુ સમાચાર વાંચવા માટે અમારી ટ્વીટર કોમ્યુનિટીમાં જોડાવા અહીં ક્લિક કરો-
Published On - 7:38 pm, Wed, 6 April 22