વડોદરા ભાજપમાં આંતરિક વિવાદ સામે આવ્યો, જુઓ Video

ગુજરાતના વડોદરા શહેરમાં ભાજપમાં નવા હોદ્દેદારોની નિમણૂકને લઈને આંતરિક વિવાદ સપાટી પર આવ્યો છે. આ વિવાદ ત્યારે ઉગ્ર બન્યો જ્યારે પક્ષના એક જૂના અને સંનિષ્ઠ કાર્યકર બિપિન પટેલે જાહેરમાં પોતાનો બળાપો ઠાલવ્યો. એક સન્માન કાર્યક્રમમાં તેમણે કટાક્ષ કરતા કહ્યું કે, “વર્ષોથી કામકાજ કરીએ છીએ અને એનું આ પરિણામ છે.” આ વિરોધનો વીડિયો સોશિયલ મીડિયા પર વાયરલ થયો છે, જેણે પક્ષમાં ચાલતી આંતરિક ખેંચતાણ છતી કરી છે.

વિવાદનો મુખ્ય મુદ્દો વડોદરામાંથી પ્રદેશ સ્તરે થયેલી બે મહત્ત્વની નિયુક્તિઓ છે. વડોદરાના સાંસદને યુવા મોરચાના પ્રમુખ તરીકેની જવાબદારી સોંપવામાં આવી છે, જ્યારે વડોદરા જિલ્લા ભાજપ પ્રમુખ રસિક પ્રજાપતિને પ્રદેશ ઉપાધ્યક્ષ બનાવવામાં આવ્યા છે. વાંધો એ છે કે આ બંને ઉમેદવારો મૂળ વડોદરાના વતની નથી. આના કારણે સ્થાનિક જૂના કાર્યકરોમાં ભારે રોષ જોવા મળી રહ્યો છે.

બિપિન પટેલ જેમણે અગાઉ કિસાન મોરચાના પ્રમુખ, તાલુકા ઉપપ્રમુખ, જિલ્લા સહમંત્રી અને પ્રદેશ પ્રતિનિધિ જેવી અનેક જવાબદારીઓ સંભાળી છે, તેમણે આ રોષને વાચા આપી. તેમ છતાં સેવા સંનિષ્ઠ કાર્યકરોને યોગ્ય સ્થાન ન મળતા તેમણે જાહેરમાં અસંતોષ વ્યક્ત કર્યો. ભાજપના જિલ્લા કાર્યાલય, કમલમ ખાતે આયોજિત સન્માન કાર્યક્રમમાં જ બિપિન પટેલે સાંસદને સીધો સવાલ કર્યો કે, “તમે સાંસદની જવાબદારી નિભાવશો કે પછી પ્રદેશ યુવા મોરચાના પ્રમુખની? યુવા મોરચાના પ્રમુખ માટે આપ કેટલો સમય આપી શકશો?” આના જવાબમાં સાંસદે “આ પદ તમે લઈ લો” એવું કહ્યું હોવાનું મનાય છે.

આ જાહેરમાં થયેલા બળાપાના કારણે લગભગ બે મિનિટ સુધી સમગ્ર કાર્યાલયમાં સન્નાટો છવાઈ ગયો હતો. એવી અટકળો છે કે બિપિન પટેલે જે વાત કહી, તે અનેક અન્ય કાર્યકરોની મનની વાત હતી. તેઓ કદાચ બિપિન પટેલને તેમના અવાજ તરીકે જોતા હતા. આ ઘટના બાદ અન્ય કાર્યકર્તાઓમાં પણ આંતરિક ગણગણાટ શરૂ થઈ ગયો છે. આ કિસ્સો દર્શાવે છે કે પક્ષમાં નવા અને જૂના કાર્યકરો વચ્ચે તેમજ સ્થાનિક અને બિન-સ્થાનિક નેતાઓની નિમણૂકને લઈને અસંતોષ પ્રવર્તી રહ્યો છે. આ વિવાદ આગામી સમયમાં વડોદરા ભાજપમાં વધુ ચર્ચાઓ જગાવે તેવી શક્યતા છે.

ગુજરાતના તમામ જિલ્લાના સમાચાર વાંચવા માટે અહીં ક્લિક કરો