Ahmedabad : ગુજરાતમાં હવાઈ સેવાઓ પ્રભાવિત, ઇન્ડિગોની 23 ફલાઈટ રદ જ્યારે 53 ફલાઈટ મોડી પડી, DGCAએ કર્યો ખુલાસો, જુઓ Video
અમદાવાદ એરપોર્ટ પર કુલ 23 ઇન્ડિગો ફ્લાઇટ રદ કરવામાં આવી છે, જ્યારે અન્ય 53 ફ્લાઇટો પોતાના નિર્ધારિત સમય કરતાં મોડી ચાલી રહી છે. આ રદ થયેલી ફ્લાઇટ્સમાં 12 આવનારી અને 11 જનારી ફ્લાઇટનો સમાવેશ થાય છે. ફ્લાઇટોની મોડાઈનો સમયગાળો ઓછામાં ઓછો 30 મિનિટ અને વધુમાં વધુ 3 કલાક સુધીનો જોવા મળી રહ્યો છે,
અમદાવાદ એરપોર્ટ પર ઇન્ડિગો એરલાઇન્સની હવાઈ સેવાઓ છેલ્લા કેટલાક સમયથી ગંભીર રીતે પ્રભાવિત થઈ રહી છે, જેના પરિણામે હજારો મુસાફરોને ભારે હાલાકીનો સામનો કરવો પડી રહ્યો છે. ગઈકાલથી લઈને આજે સવારે 7 વાગ્યા સુધીમાં, અમદાવાદ એરપોર્ટ પર કુલ 23 ઇન્ડિગો ફ્લાઇટ રદ કરવામાં આવી છે, જ્યારે અન્ય 53 ફ્લાઇટો પોતાના નિર્ધારિત સમય કરતાં મોડી ચાલી રહી છે. આ રદ થયેલી ફ્લાઇટ્સમાં 12 આવનારી અને 11 જનારી ફ્લાઇટનો સમાવેશ થાય છે. ફ્લાઇટોની મોડાઈનો સમયગાળો ઓછામાં ઓછો 30 મિનિટ અને વધુમાં વધુ 3 કલાક સુધીનો જોવા મળી રહ્યો છે, જેના કારણે એરપોર્ટ પર મુસાફરોનો જમાવડો થયો છે અને તેમને લાંબા સમય સુધી રાહ જોવી પડી રહી છે.
DGCAએ કર્યો ખુલાસો
આ સમસ્યા માત્ર અમદાવાદ સુધી સીમિત નથી. દેશભરમાં ઇન્ડિગો એરલાઇન્સની હવાઈ સેવાઓ પ્રભાવિત થઈ છે. ડાયરેક્ટર જનરલ ઓફ સિવિલ એવિએશન (DGCA) દ્વારા પણ આ મામલે ગંભીર નોંધ લેવામાં આવી છે. DGCAને મળેલી માહિતી મુજબ, દેશભરમાં ઇન્ડિગોની 1232 થી વધુ ફ્લાઇટ રદ કરવામાં આવી છે. આ પરિસ્થિતિને ધ્યાનમાં રાખીને, DGCAએ ઇન્ડિગો એરલાઇન્સ પાસેથી ખુલાસો માંગ્યો છે અને તેમને પોતાના ઓપરેશન્સમાં સુધારો કરવા માટે સૂચના આપી છે. DGCAએ મુસાફરોને થઈ રહેલી મુશ્કેલીઓ પ્રત્યે દુઃખ પણ વ્યક્ત કર્યું છે અને એરલાઇન્સ કંપનીઓને યોગ્ય તકેદારી લેવા જણાવ્યું છે.
23 ઇન્ડિગો ફલાઈટ રદ જ્યારે 53 ફલાઈટ મોડી પડી
ઇન્ડિગો એરલાઇન્સ દ્વારા જાહેર કરાયેલી પ્રેસનોટમાં અને તેમના ખુલાસામાં જણાવાયું છે કે ઓપરેશનલ કારણો, ટેકનિકલ ખામીઓ અને તાજેતરમાં થયેલા કેટલાક નિયમોમાં ફેરફાર જેવા વિવિધ કારણોસર આ સમસ્યાઓ ઉભી થઈ છે. એરલાઇન્સે સ્વીકાર્યું છે કે ફ્લાઇટ ઓપરેશનમાં તકલીફ પડી રહી છે અને તેઓએ 48 કલાકની અંદર તમામ ખામીઓ દૂર કરવાનો દિલાસો આપ્યો છે.
અમદાવાદ ઉપરાંત, વડોદરા એરપોર્ટ પર પણ ઇન્ડિગોની સેવાઓ પ્રભાવિત થઈ છે. આજે વડોદરાથી મુંબઈ, દિલ્હી, હૈદરાબાદ અને ગોવા જતી ચાર ફ્લાઇટ રદ કરવામાં આવી છે. છેલ્લા નવ દિવસમાં વડોદરામાં ઇન્ડિગોની કુલ 11 ફ્લાઇટ રદ થઈ હોવાના અહેવાલ છે. આ ફ્લાઇટ રદ થવા પાછળ પણ ઓપરેશનલ કારણો જવાબદાર હોવાનું જણાવાયું છે. અમદાવાદ અને સુરત એરપોર્ટ પર પણ મુસાફરોની હાલાકીના દ્રશ્યો સામે આવ્યા છે, જ્યાં લાંબા સમય સુધી રાહ જોતા મુસાફરો અને એરલાઇન્સ સ્ટાફ વચ્ચે ઘર્ષણના બનાવો પણ બન્યા હોવાનું જાણવા મળ્યું છે. આ તમામ ઘટનાક્રમ સૂચવે છે કે ઇન્ડિગોની હવાઈ સેવાઓ હાલમાં કપરા સમયમાંથી પસાર થઈ રહી છે.
ગુજરાતના તમામ જિલ્લાના સમાચાર વાંચવા માટે અહીં ક્લિક કરો
