Breaking News :બુટલેગરોનો નવો ખેલ! રાજસ્થાનથી બનાસકાંઠા સુધી ફેલાયેલો બુટલેગર ગેંગનો ખતરનાક પ્લાન ખુલ્લો

રાજકોટના રણછોડનગર વિસ્તારમાં આવેલી શેરી નંબર–1માં આવેલ એક ચાંદીના કારખાનામાંથી થયેલી 120 કિલો ચાંદીના દાગીનાની ચોરી હવે જાણે કોઈ ક્રાઈમ થ્રિલર ફિલ્મ જેવી બની ગઈ છે. શરૂઆતમાં સામાન્ય લાગતો આ ગુનો પોલીસની ઊંડાણપૂર્વકની તપાસ સાથે-સાથે એવો વળાંક લેતો ગયો કે હવે તેમાં રાજસ્થાનથી લઈને બનાસકાંઠા સુધી ફેલાયેલું મોટું ષડયંત્ર સામે આવી રહ્યું છે.

પોલીસ તપાસમાં ખુલ્યું છે કે આ ચોરી કોઈ એકલદોકલ વ્યક્તિનું કામ નહોતું, પરંતુ બુટલેગર્સના ગોઠવાયેલા નેટવર્ક દ્વારા રચાયેલો સંપૂર્ણ પ્લાન હતો. રાજકોટ ક્રાઈમ બ્રાન્ચે ચોરીમાં ઉપયોગમાં લેવાયેલી એક કાર જપ્ત કરી છે, જે આ કેસમાં મહત્વપૂર્ણ કડી બની છે. તપાસમાં જાણવા મળ્યું કે આ કાર રાજસ્થાનના કુખ્યાત બુટલેગર ધરમસિંગની છે, જે હાલ જેલવાસ ભોગવી રહ્યો છે. જેલમાં હોવા છતાં ધરમસિંગે પોતાની કાર બોટાદના બુટલેગર રાજુ ભોજકને આપી હતી.

આ પછી કાર ચોરી માટે દાંતીવાડાના એક શખ્સને સોંપવામાં આવી. ચોરી બાદ “કમિશન” તરીકે રાજુ ભોજકને 31 કિલો ચાંદી મળવાની સોદાબાજી થઈ હતી. ક્રાઈમ બ્રાન્ચે આ કાર સાથે 31 કિલો ચાંદીનો જથ્થો પણ જપ્ત કરી લીધો છે, જે પોલીસ માટે મોટી સફળતા ગણાઈ રહી છે.

આ કેસમાં અગાઉ અમદાવાદ ક્રાઈમ બ્રાન્ચ પણ સક્રિય બની હતી. ગત રવિવારે અમદાવાદમાંથી એક શખ્સને 40 કિલો ચાંદીના જથ્થા સાથે ઝડપી લેવાયો હતો. આરોપીઓની પૂછપરછ જેમ જેમ આગળ વધી રહી છે, તેમ તેમ ચોરી પાછળના ચહેરાઓ એક પછી એક સામે આવી રહ્યા છે. સીસીટીવી ફૂટેજમાં દેખાતા ચાર શખ્સો સિવાય પણ અન્ય લોકોની સંડોવણી હોવાની પોલીસને મજબૂત શંકા છે.

હાલમાં ક્રાઈમ બ્રાન્ચ જપ્ત કરાયેલી ચાંદી અને કારના આધારે વધુ કડીઓ જોડવાની કામગીરીમાં લાગી છે. પોલીસનો દાવો છે કે આગામી દિવસોમાં વધુ આરોપીઓ ઝડપાઈ શકે છે અને આ સમગ્ર ષડયંત્રના મૂળ સુધી પહોંચવામાં આવશે.

આ ઘટના માત્ર એક મોટી ચોરી નથી, પરંતુ ચાંદીના કારખાનાઓ અને દુકાનો માટે ચેતવણી પણ છે કે સુરક્ષા વ્યવસ્થાની ગંભીર સમીક્ષા હવે સમયની જરૂરિયાત બની ગઈ છે.

Input Credit: Mohit Bhatt

રેલવે ટ્રેક પર 10 સિંહ! એક સેકન્ડ મોડું પડ્યું હોત તો… આ સ્ટોરી વાંચવા અહીં ક્લિક કરો