Gir Somnath : ગીર સોમનાથ જિલ્લામાં પડેલા ભારે વરસાદે તૈયાર મગફળીના પાકને મોટો ફટકો માર્યો છે. ખાસ કરીને ગીર ગઢડા, ઉના અને તાલાલા સહિતના વિસ્તારોમાં ખેતરોમાં તૈયાર કરાયેલો મગફળીનો પાક વરસાદી પાણીમાં પલળી જતા ખેડૂતોને મોટું આર્થિક નુકસાન થયું હોવાની માહિતી સામે આવી છે.

મગફળી કાઢ્યા બાદ જ વરસાદ બન્યો આફત

ગીર ગઢડા વિસ્તારમાં અનેક ખેડૂતોએ મગફળીનો પાક તૈયાર થતાં તેને જમીનમાંથી બહાર કાઢ્યો હતો. જોકે, પાક બહાર કાઢ્યા બાદ અચાનક ધોધમાર વરસાદ પડતાં ખેતરોમાં રાખેલી મગફળી પલળી ગઈ હતી. જેના કારણે લાંબા સમયથી પાક બચાવવા માટે મહેનત કરી રહેલા ખેડૂતોની મુશ્કેલીમાં વધારો થયો છે.

વરસાદી પાણી ભરાવાના કારણે કેટલીક જગ્યાએ મગફળીના ઢગલા પણ પલળી ગયા છે. ખેડૂતોના જણાવ્યા મુજબ, કેટલાક ખેતરોમાં પાકને મોટા પ્રમાણમાં નુકસાન થયું છે અને અમુક ખેડૂતોનો મોટાભાગનો તૈયાર પાક બગડી ગયો હોવાનો દાવો કરવામાં આવી રહ્યો છે.

મગફળી સાથે પશુચારો પણ પલળ્યો

ભારે વરસાદની અસર માત્ર મગફળીના પાક પૂરતી મર્યાદિત રહી નથી. પશુપાલન સાથે સંકળાયેલા ખેડૂતો માટે પશુઓનો ચારો પણ વરસાદમાં પલળી જતાં વધારાની મુશ્કેલી ઊભી થઈ છે. ખેતી અને પશુપાલન બંને પર નિર્ભર ખેડૂતો માટે એકસાથે પાક અને ચારાનું નુકસાન આર્થિક પડકાર વધારી રહ્યું છે.

ખેડૂતોની સરકાર પાસે સર્વેની માગ

તૈયાર પાકને નુકસાન થતાં ખેડૂતોમાં ચિંતા જોવા મળી રહી છે. ખેડૂતોનું કહેવું છે કે, આખી સીઝનની મહેનત બાદ તૈયાર થયેલા પાકને નુકસાન થયું હોવાથી સરકાર અને તંત્ર દ્વારા તાત્કાલિક પાક નુકસાનનો સર્વે કરવામાં આવે. ખેડૂતોની માગ છે કે નુકસાનનો યોગ્ય સર્વે કરી તેની વિગતોના આધારે સરકાર દ્વારા નિયમ મુજબ સહાય આપવામાં આવે, જેથી વરસાદના કારણે થયેલા આર્થિક નુકસાનમાં તેમને રાહત મળી શકે.

ઉના, ગીર ગઢડા અને તાલાલામાં મુશળધાર વરસાદ

ગઈકાલે ઉના, ગીર ગઢડા અને તાલાલા સહિતના વિસ્તારોમાં ભારે વરસાદ નોંધાયો હતો. આ વરસાદને કારણે ખેતરોમાં તૈયાર અને બહાર કાઢીને રાખવામાં આવેલા મગફળીના પાકને નુકસાન થયું છે. હવે ખેડૂતોની નજર સરકાર અને સ્થાનિક તંત્ર દ્વારા હાથ ધરાનારા સર્વે પર છે.

Ahmedabad Breaking: બન્ટી બબલી બનીને પૂર્વ કુલપતિ-રજીસ્ટ્રારે ગુજરાત યુનિવર્સિટીનુ ₹32 કરોડોનું કરી નાખ્યું