Gujarat Election 2022 : ઝઘડિયા બેઠક ઉપર બાહુબલીઓ વચ્ચે  ચૂંટણી જંગ જામશે, જાણો ઉમેદવારોનો ગુનાહિત ભૂતકાળ

ગુજરાત વિધાનસભા ચૂંટણીમાં ભરૂચ જિલ્લાનીઆદિવાસી અનામત ઝઘડિયા બેઠક ઉપર બાહુબલીઓ વચ્ચે  ચૂંટણી જંગ જામશે. આ બેઠક ઉપર ગુજરાત જ નહીં કેન્દ્રનું રાજકારણ પણ નજર જમાવીને બેઠું છે. વર્ષ 1962 થી ગુજરાત વિધાનસભાની પેહલી ચૂંટણીથી અત્યાર સુધી ભાજપ આ બેઠક ક્યારેય જીતી શકી નથી. બેઠક ઉપર સતત 7 ટર્મ સુધી છોટુ વસાવા ધારાસભ્ય તરીકે ચૂંટાયા હતા. આ ચૂંટણીમાં વસાવા પરિવારમાં પિતા-પુત્ર વચ્ચે સીધો પારિવારિક ચૂંટણી જંગ નજરે પડી રહ્યો છે. આ બેઠક ઉપર સૌથી વધુ ગુનાહિત ભૂતકાળ ધરાવતા ઉમેદવારો ચૂંટણી જંગમાં છે.મહત્તમ કેસ છોટુ વસાવા અને તેમના પુત્ર મહેશ વસાવા સામે નોંધાયા છે. આ બાહુબલી નેતાઓ મોટાભાગના મામલાઓમાં નિર્દોષ છૂટયા છે.

7 ટર્મના ધારાસભ્ય સામે 2 ડઝનથી વધુ ગુનાનો ભૂતકાળ

જિલ્લાની પાંચેય બેઠકોમાં સૌથી વધુ ઉંમરના ઉમેદવાર ઝઘડિયાના છોટુ વસાવા છે. તેમની વય 77 વર્ષની છે. તલાટી રહી ચૂકેલા છોટુભાઈ OLD  SSC ભણેલા છે. છોટુભાઈ આવકવેરાનું રીટર્ન ભરતા નથી. તેમની સામે ઝઘડિયા પોલીસ મથકે 16 અને વાલિયા પોલીસ મથકે 9 ફરીયાદ દાખલ થઇ છે. તેમની પાસે 10 તોલા સોનુ, બે ટ્રેકટર સહિત 57 એકર ખેતીની જમીન છે. સ્થાવર અને જંગમ મિલકત મળી કુલ સંપત્તિ રૂપિયા 1.75 કરોડની મિલકત છે.

આ મામલે પિતા કરતા પુત્ર પાછળ નથી

છોટુ વસાવાની ટિકિટ કાપી જાતે ઉમેદવારી કરનાર BTP ના મહેશ વસાવા 55 વર્ષના છે. તેઓ ધોરણ 12 નાપાસ છે. અંકલેશ્વર કોર્ટે તેમને 3 વર્ષની સાદી કેદની સજા ફટકારી હતી જોકે તે હાલ જામીન મુક્ત છે. મહેશ સામે ઝઘડિયા પોલીસ સ્ટેશનમાં 15, વાલિયામાં 8 અને ડેડીયાપાડા પોલીસ સ્ટેશને 2 કેસ દાખલ છે.તેમના ઉપર  89.42 લાખની બેંક લોન છે.

દિલીપ વસાવા સામે 6 ગુના

મહેશ વસાવાથી નારાજ દિલીપ વસાવાએ પણ પિતા સાથે અપક્ષ ઉમેદવારી નોંધાવી છે. દિલીપ સામે 6 ફરિયાદ નોંધાયેલા છે. તેઓને એક કેસમાં સજા થઇ છે જેમાં જમીન ઉપર મુક્ત છે. તેઓનો અભ્યાસ ધોરણ 12 નપાસ છે.

કોંગ્રેસના ફતેસિંહ વસાવા  3 વર્ષની સજાના ગુનામાં જામીન મુક્ત

કોંગ્રેસના 42 વર્ષીય યુવા ઉમેદવાર પણ બાહુબલી  છે. ખેતીકામ કરતા તેઓએ ધોરણ 5 સુધીજ અભ્યાસ કર્યો છે. તકરારના ગુનામાં 3 વર્ષની સજાનો તેમની સામે હુકમ થયો હતો જેમાં તે જામીન ઉપર મુક્ત છે. બેંકમાં તેમની 35 લાખની લોન ચાલે છે. રૂપિયા 1.47 કરોડની કુલ સંયુક્ત સંપત્તિ ધરાવે છે.

ભાજપના ઉમેદવાર ધોરણ 9 પાસ

ભાજપના 46 વર્ષીય ઉમેદવાર રીતેશ વસાવા ધોરણ 9 પાસ છે. તેઓ પણ ઝઘડિયાના બીજા ઉમેદવારોની જેમ ખેતી જ કરે છે. રિતેશ પાસે 37.24 લાખની કાર, 17 તોલા સોનુ, ખેતી, રહેણાંક મકાન મળી સ્થાવર તેમજ જંગમ 2.03 કરોડની મિલકતો છે જ્યારે બેંકની 30 લાખની લોન ચાલે છે.