Breaking News : અમદાવાદ સહિત ગુજરાતના અનેક જિલ્લાઓમાં વાતાવરણમાં પલટો, ભારે પવન અને વરસાદથી જનજીવન પ્રભાવિત, જુઓ Video

ગુજરાતના વિવિધ જિલ્લાઓમાં વાતાવરણમાં અચાનક પલટો જોવા મળ્યો છે. ભારે પવન, વાવાઝોડા અને વરસાદના કારણે અનેક વિસ્તારોમાં નુકસાનના બનાવો સામે આવ્યા છે. કેટલાક સ્થળોએ વૃક્ષો ધરાશાયી થયા, તો ક્યાંક રસ્તાઓ બંધ થવાની અને વીજ પુરવઠો ખોરવાવાની ઘટનાઓ નોંધાઈ છે.

ખેડા જિલ્લામાં ભારે પવન સાથે વરસાદી માહોલ સર્જાયો હતો. જિલ્લાના અનેક વિસ્તારોમાં વરસાદ વરસ્યો હતો, જ્યારે ઠાસરા તાલુકામાં પણ સારા વરસાદના સમાચાર મળ્યા છે. વરસાદના આગમનથી ગરમીમાં રાહત અનુભવાઈ હતી અને વાતાવરણમાં ઠંડક પ્રસરી હતી.

મહીસાગર જિલ્લામાં ભારે પવનના કારણે અનેક સ્થળોએ વૃક્ષો ધરાશાયી થવાના બનાવો બન્યા હતા. કડાણા તાલુકાના માલવણથી ધરોળા રોડ પર એક વૃક્ષ અચાનક રસ્તા પર પડી ગયું હતું. આ દરમિયાન ત્યાંથી પસાર થઈ રહેલા બાઇકસવાર બે યુવકો વૃક્ષની ઝપેટમાં આવી જતા ઇજાગ્રસ્ત થયા હતા. સ્થાનિક લોકોએ તાત્કાલિક બચાવ કામગીરી હાથ ધરી વૃક્ષ હટાવી બંને યુવકોને સુરક્ષિત બહાર કાઢ્યા હતા.

અરવલ્લી જિલ્લામાં ધનસુરા-મોડાસા હાઈવે પર આરામગૃહ નજીક એક વિશાળ વૃક્ષ ધરાશાયી થતાં વાહન વ્યવહાર ખોરવાઈ ગયો હતો. વૃક્ષ રસ્તા પર પડી જતાં ટ્રાફિક જામ સર્જાયો હતો. ઘટનાની જાણ થતાં ધનસુરા પોલીસ સ્થળ પર પહોંચી હતી અને વૃક્ષ હટાવવાની કામગીરી કરીને ટ્રાફિક ફરી શરૂ કરાવ્યો હતો.

અમદાવાદના રાણીપ વિસ્તારમાં આવેલા સર્વેશ એપાર્ટમેન્ટ ખાતે ચાલી રહેલી ભાગવત કથાના કાર્યક્રમ દરમિયાન બનાવવામાં આવેલો મંડપ ભારે પવનના કારણે ધરાશાયી થયો હતો. સદનસીબે કોઈ જાનહાનિના સમાચાર મળ્યા નથી, પરંતુ ઘટનાથી સ્થળ પર હાજર લોકોમાં ગભરાટ ફેલાયો હતો.

પંચમહાલ જિલ્લાના ગોધરા શહેરમાં ભારે વરસાદના કારણે એક મહત્વનો હંગામી માર્ગ ધોવાઈ ગયો હતો. આનંદનગર સોસાયટી પાસે કોતર પર બનાવવામાં આવેલ માટીનો અસ્થાયી રસ્તો વરસાદી પાણીમાં ધોવાઈ જતા અવરજવર જોખમી બની હતી. ગોધરા શહેર અને સામે આવેલા જાફરાબાદ ગામની દસ જેટલી સોસાયટીઓને જોડતા નવા પુલનું નિર્માણ કાર્ય ચાલી રહ્યું છે. ત્યાં સુધી લોકોની અવરજવર માટે આ હંગામી રસ્તો બનાવવામાં આવ્યો હતો, જે હવે વરસાદના કારણે બંધ થઈ ગયો છે.

વડોદરા જિલ્લાના સાવલી તાલુકામાં ભારે પવન, વાવાઝોડા અને વીજળીના ચમકારા વચ્ચે મેઘરાજાનું આગમન થયું હતું. વરસાદ બાદ સમગ્ર વિસ્તારમાં ઠંડક પ્રસરી ગઈ હતી અને ચોમાસા જેવો માહોલ સર્જાયો હતો. જોકે ભારે પવનના કારણે તાલુકાના મોટાભાગના ગામોમાં વીજ પુરવઠો ખોરવાઈ ગયો હતો. અનેક વિસ્તારોમાં મૂશળધાર વરસાદ વરસતાં સ્થાનિક જનજીવન પર પણ તેની અસર જોવા મળી હતી.

રાજ્યના વિવિધ જિલ્લાઓમાં બદલાયેલા હવામાનને પગલે તંત્ર દ્વારા સાવચેતી રાખવાની અપીલ કરવામાં આવી છે. હવામાન વિભાગે આગામી દિવસોમાં પણ કેટલાક વિસ્તારોમાં વરસાદ અને તેજ પવનની શક્યતા વ્યક્ત કરી છે.

દાહોદમાં વાવાઝોડાનો કહેર, સાઇન બોર્ડ ધરાશાયી થતાં મોટી દુર્ઘટના, જુઓ Video