Breaking News : દાહોદમાં વાવાઝોડાનો કહેર, સાઇન બોર્ડ ધરાશાયી થતાં મોટી દુર્ઘટના, જુઓ Video

દાહોદ જિલ્લામાં આવેલા અચાનક વાવાઝોડાએ ભારે તબાહી મચાવી છે. તેજ પવન અને ખરાબ હવામાનના કારણે જિલ્લામાં અનેક સ્થળોએ નુકસાનના બનાવો સામે આવ્યા છે. વાવાઝોડાની સૌથી ગંભીર ઘટના દાહોદ શહેરના ગરબાડા ચોકડી વિસ્તારમાં બની હતી, જ્યાં સ્માર્ટ સિટી પ્રોજેક્ટ અંતર્ગત ઉભું કરાયેલું એક મહાકાય સાઇન બોર્ડ તૂટી પડતાં બે લોકોના મોત થયા હતા, જ્યારે અન્ય બે લોકો ગંભીર રીતે ઇજાગ્રસ્ત થયા હોવાનું જાણવા મળ્યું છે.

પ્રાપ્ત માહિતી મુજબ, વાવાઝોડાના જોરદાર પવનના કારણે આ વિશાળ સાઇન બોર્ડ તેના આધાર પરથી ઉખડી ગયું અને રસ્તા પર ફંગોળાઈ પડ્યું હતું. ઘટનાસ્થળે હાજર લોકોમાં અફરાતફરી મચી ગઈ હતી. ઇજાગ્રસ્તોને તાત્કાલિક સારવાર માટે હોસ્પિટલ ખસેડવામાં આવ્યા હતા, જ્યારે મૃતકોના પરિવારજનોમાં શોકની લાગણી છવાઈ ગઈ છે.

વાવાઝોડાની અસર માત્ર આ ઘટના પૂરતી મર્યાદિત રહી નહોતી. દાહોદ શહેર સહિત જિલ્લાના વિવિધ વિસ્તારોમાં અનેક વૃક્ષો ધરાશાયી થયા હતા, જેના કારણે કેટલાક રસ્તાઓ પર વાહન વ્યવહાર પણ ખોરવાયો હતો. ઉપરાંત, પાલિકા દ્વારા ઉભો કરાયેલો પતરાનો શેડ પણ જોરદાર પવન સામે ટકી શક્યો નહોતો અને જમીનદોસ્ત થઈ ગયો હતો.

આ સમગ્ર ઘટનાએ સ્માર્ટ સિટી પ્રોજેક્ટના કામકાજ અને ગુણવત્તા અંગે પણ અનેક સવાલો ઉભા કર્યા છે. સ્થાનિક લોકોનો આક્ષેપ છે કે મહાકાય અને ભારે વજન ધરાવતા સાઇન બોર્ડને અત્યંત પાતળા નટ-બોલ્ટના સહારે ઉભું કરવામાં આવ્યું હતું. વાવાઝોડા દરમિયાન સાઇન બોર્ડ તૂટી પડતાં બાંધકામની ગુણવત્તા અને સુરક્ષા ધોરણો અંગે ચર્ચા શરૂ થઈ છે.

ઘટના બાદ સ્થાનિક તંત્ર અને સંબંધિત વિભાગો દ્વારા તપાસ શરૂ કરવામાં આવી છે. સાઇન બોર્ડના નિર્માણમાં કોઈ બેદરકારી અથવા ટેકનિકલ ખામી રહી હતી કે નહીં તે અંગે તપાસ બાદ જ સ્પષ્ટતા થઈ શકશે. હાલ દાહોદ જિલ્લામાં વાવાઝોડાથી થયેલા નુકસાનનું મૂલ્યાંકન કરવાની કામગીરી પણ હાથ ધરવામાં આવી રહી છે.

અમદાવાદના સ્પોર્ટ્સ ક્લબમાં બોમ્બની ધમકી, પોલીસ અને BDDS ટીમ તપાસમાં, જુઓ Video