CBSEનો આદેશ… આ 7 નિયમોનું પાલન કરનારા વિદ્યાર્થીઓ જ 10મા-12મા બોર્ડની પરીક્ષા આપી શકશે

સેન્ટ્રલ બોર્ડ ઓફ સેકન્ડરી એજ્યુકેશન (CBSE) એ 2026 માં યોજાનારી 10મા અને 12મા ધોરણની બોર્ડ પરીક્ષાઓ માટે તૈયારીઓ શરૂ કરી દીધી છે. આ સંદર્ભમાં આ દિવસોમાં 10મા અને 12મા ધોરણના બોર્ડના પરીક્ષાર્થીઓને પરીક્ષા ફોર્મ ભરવા માટે કહેવામાં આવી રહ્યું છે. દરમિયાન CBSE એ બોર્ડ પરીક્ષાઓમાં બેસવા માટેના નિયમોનું એક નોટિફિકેશન બહાર પાડ્યું છે, જે હેઠળ CBSE એ 10મા અને 12મા ધોરણની બોર્ડ પરીક્ષાઓમાં બેસવા માટે 7 શરતોનું પાલન સુનિશ્ચિત કરવાનું કહ્યું છે. CBSE એ કહ્યું છે કે જે વિદ્યાર્થીઓ આ 7 શરતોનું પાલન નહીં કરે તેઓ બોર્ડની પરીક્ષામાં બેસવા માટે સક્ષમ રહેશે નહીં.

ચાલો જાણીએ કે CBSE એ 10મા અને 12મા બોર્ડના પરીક્ષાર્થીઓ માટે કયા નિયમો ફરજિયાત બનાવ્યા છે? આ સાથે અમે CBSE બોર્ડ પરીક્ષાઓની તૈયારીઓ વિશે પણ ચર્ચા કરીશું.

CBSE એ 7 નિયમો ફરજિયાત બનાવ્યા

CBSE એ 10મા અને 12મા ધોરણની બોર્ડ પરીક્ષાઓના નિયમો અંગે નોટિસ જાહેર કરી છે. CBSE એ કહ્યું છે કે બધા વિદ્યાર્થીઓ માટે આ નિયમોનું પાલન કરવું ફરજિયાત રહેશે. ઉપરાંત CBSE એ સ્પષ્ટ કર્યું છે કે બોર્ડનો ઉદ્દેશ્ય શિક્ષણની ગુણવત્તા અને પરીક્ષા પ્રક્રિયાની પારદર્શિતા જાળવવાનો છે. ચાલો જાણીએ કે કયા 7 નિયમો ફરજિયાત બનાવવામાં આવ્યા છે.

1. ધોરણ 10 અને 12 એટલે કે આ બે વર્ગો બે વર્ષનો સિલેબસ છે. જેમાં ધોરણ 9-10 અને 11-12નો સમાવેશ થાય છે. CBSE એ કહ્યું છે કે બોર્ડની પરીક્ષામાં બેસવા માટે સતત બે વર્ષ અભ્યાસ કરવો ફરજિયાત રહેશે.
2. CBSE એ જણાવ્યું હતું કે, બોર્ડની પરીક્ષામાં બેસવા માટે વિદ્યાર્થીઓએ ઓછામાં ઓછી 75% હાજરી જાળવવી જરૂરી છે.
3. CBSE ના નવા નિયમો અનુસાર, વિદ્યાર્થીઓનું આંતરિક મૂલ્યાંકન બે વર્ષ માટે ફરજિયાત રહેશે. જો આવું ન થાય તો, વિદ્યાર્થીઓનું પરિણામ જાહેર કરવામાં આવશે નહીં.
4. ધોરણ 10 ના વિદ્યાર્થીઓ વધુમાં વધુ 2 એકસ્ટ્રા વિષયો પસંદ કરી શકે છે અને ધોરણ 12 ના વિદ્યાર્થીઓ 1 વધારાનો વિષય પસંદ કરી શકે છે, જેનો અભ્યાસ પણ બે વર્ષ માટે ફરજિયાતપણે કરવો પડશે.
5. વિદ્યાર્થીઓ બોર્ડની પરીક્ષા માટે એવા વિષયો આપી શકશે નહીં જેના માટે શાળામાં પરવાનગી ઉપલબ્ધ ન હોય (જેમ કે શિક્ષક, પ્રયોગશાળા અથવા વહીવટી સંમતિ).
6. જે વિદ્યાર્થીઓને વધારાના વિષયોમાં “કમ્પાર્ટમેન્ટ” અથવા “એસેન્શિયલ રિપિટ” આપવામાં આવ્યું છે. તેઓ ખાનગી ઉમેદવાર તરીકે ફરીથી પરીક્ષા આપી શકશે.
7. જે વિદ્યાર્થીઓ આ નિયમોનું પાલન કરતા નથી તેઓ ખાનગી ઉમેદવાર તરીકે બોર્ડની પરીક્ષામાં વધારાના વિષયો આપી શકશે નહીં.

2026 થી ધોરણ 10 માટે બે પરીક્ષાઓ

CBSE વર્ષ 2026 થી ધોરણ 10 માટે બે બોર્ડ પરીક્ષાઓ લેવા જઈ રહ્યું છે. પહેલી બોર્ડ પરીક્ષા ફરજિયાત રહેશે. તેમજ વિદ્યાર્થીઓ તેમના ગુણ વધારવા અને પાસ થવા માટે બીજી બોર્ડ પરીક્ષામાં બેસી શકશે.