ઘરમાં જગ્યા ઓછી છે છતાં તમે ટામેટાં ઉગાડવા માંગો છો? તો અપસાઇડ ડાઉન ગાર્ડનિંગની આ રીત તમારા માટે ઉપયોગી બની શકે છે. આ ટેકનિકમાં ખાસ વાત એ છે કે એક જ કન્ટેનરમાંથી બે છોડ ઉગાડીને ઓછી જગ્યામાં ગાર્ડનિંગ કરી શકાય છે.

સામાન્ય રીતે ટામેટાંનો છોડ આપણે કૂંડા કે જમીનમાં સીધો જ ઉગાડતા જોયો છે. પરંતુ ટામેટાંને ઊંધા લટકાવીને પણ ઉગાડી શકાય છે. શરૂઆતમાં આ રીત થોડી અલગ લાગી શકે, પરંતુ નાની બાલ્કની કે મર્યાદિત જગ્યા ધરાવતા લોકો માટે આ એક રસપ્રદ વિકલ્પ બની શકે છે.

તો ચાલો.. જાણીએ

શું છે અપસાઇડ ડાઉન ગાર્ડનિંગ?

નામ સાંભળીને તમને પણ સવાલ થતો હશે કે આખરે છોડને ઊંધો કેવી રીતે ઉગાડી શકાય? સરળ ભાષામાં સમજીએ તો, સામાન્ય રીતે આપણે છોડને કૂંડામાં માટી ભરીને ઉપરની તરફ ઉગાડીએ છીએ. પરંતુ અપસાઇડ ડાઉન ગાર્ડનિંગમાં આ રીત થોડી અલગ હોય છે. અહીં છોડને કન્ટેનરના તળિયેથી બહાર કાઢીને નીચેની તરફ લટકાવવામાં આવે છે.

ઉદાહરણ તરીકે, એક મજબૂત ડોલ લો અને તેના તળિયે એક કાણું કરો. આ કાણામાંથી ટામેટાંના નાના છોડનો થડ બહાર કાઢવામાં આવે છે, જ્યારે છોડનાં મૂળ અને માટી ડોલની અંદર જ રહે છે. ત્યારબાદ ડોલને ઉપરથી મજબૂત હૂક પર લટકાવી દેવામાં આવે છે.

જેમ જેમ છોડ મોટો થાય છે તેમ તેની ડાળીઓ નીચેની તરફ લટકતી જાય છે અને તેના પર ટામેટાં પણ નીચે તરફ જ ઉગે છે. એટલે અહીં છોડ સીધો ઊપર વધવાને બદલે ડોલમાંથી નીચે તરફ વધતો જોવા મળે છે.

આ રીત ખાસ કરીને એવા લોકો માટે રસપ્રદ બની શકે છે જેમની પાસે બાલ્કનીમાં જગ્યા ઓછી હોય અથવા મોટું ગાર્ડન ન હોય. સૌથી રસપ્રદ વાત એ છે કે ડોલની ઉપરની ખાલી જગ્યામાં ધાણા કે ફુદીના જેવી નાની હર્બ્સ પણ ઉગાડી શકાય છે. એટલે એક જ ડોલનો ઉપયોગ કરીને બે પ્રકારના છોડ ઉગાડવાનો પ્રયાસ કરી શકાય છે.

નાની બાલ્કની માટે કેમ છે ઉપયોગી?

આ પદ્ધતિનો સૌથી મોટો ફાયદો એ છે કે છોડને ફ્લોર પર જગ્યા આપવાની જરૂર પડતી નથી. જો બાલ્કની નાની હોય અને પહેલેથી જ થોડા કુંડા રાખેલા હોય, તો ઉપરની જગ્યા અથવા રેલિંગ પાસે લટકાવીને ગાર્ડનિંગ કરી શકાય છે. આ રીતે ફ્લોરની જગ્યા બચાવીને ઉપલબ્ધ જગ્યાનો વધુ સારી રીતે ઉપયોગ કરી શકાય છે.

ટામેટાં જમીનથી દૂર રહેશે

ટામેટાંના છોડમાં ફળો મોટા થયા બાદ ડાળીઓ નીચે તરફ ઝૂકી શકે છે. સામાન્ય ગાર્ડનિંગમાં જમીનની નજીક આવેલા ફળો પર માટી લાગી શકે છે. ઊંધા લટકાવેલા છોડમાં ટામેટાં હવામાં લટકતા હોવાથી તેઓ જમીનથી દૂર રહે છે. જોકે, છોડને યોગ્ય રીતે ઉગાડવો અને તેની આસપાસ સ્વચ્છતા જાળવવી પણ જરૂરી છે.

અલગ સપોર્ટની જરૂરિયાત ઘટી શકે

ટામેટાંનો છોડ મોટો થતો જાય ત્યારે તેની ડાળીઓને સંભાળવા માટે લાકડી કે અન્ય સપોર્ટની જરૂર પડી શકે છે. આ પદ્ધતિમાં છોડ પહેલેથી જ નીચેની તરફ વધે છે, તેથી તેને ઉપરની તરફ સીધો રાખવાની જરૂરિયાત કેટલીક પરિસ્થિતિમાં ઓછી થઈ શકે છે. તેમ છતાં, છોડની જાત અને તેના વધતા કદ પ્રમાણે સપોર્ટની જરૂર પડી શકે છે.

એક જ કન્ટેનરમાં ડબલ ગાર્ડનિંગ

આ પદ્ધતિની સૌથી રસપ્રદ બાબત એ છે કે કન્ટેનરની ઉપરની જગ્યાને પણ વેડફાતી અટકાવી શકાય છે. ટામેટાંના છોડ સાથે ઉપરની માટીમાં ધાણા, ફુદીનો જેવી નાની હર્બ્સ ઉગાડી શકાય છે. એટલે એક જ કન્ટેનરમાં અલગ-અલગ ઊંચાઈએ બે પ્રકારના છોડ ઉગાડવાનો પ્રયાસ કરી શકાય છે.