પત્ની પોતાના પતિને ‘હિજડા’ કહે તો તે ગુનો છે? જાણો હાઈકોર્ટનો ઐતિહાસિક નિર્ણય
જો કોઈ પત્ની તેના પતિને હિજડા કહે તો તે માનસિક ક્રૂરતા છે. આ પતિ વિરુદ્ધ ગુનો છે. છૂટાછેડાના કેસની સુનાવણી દરમિયાન હાઈકોર્ટે પોતાના નિર્ણયમાં આ વાત કહી છે. પત્નીના વાંધાને અવગણીને કોર્ટે છૂટાછેડા મંજૂર કર્યા છે.
આ નિર્ણય પંજાબ અને હરિયાણા હાઈકોર્ટે આપ્યો છે. કોર્ટે કહ્યું કે પત્ની માટે તેના પતિને નપુંસક કહેવો માનસિક ક્રૂરતા છે. જસ્ટિસ સુધીર સિંહ અને જસજીત સિંહ બેદીની ડિવિઝન બેન્ચે છૂટાછેડાના કેસમાં પત્ની દ્વારા દાખલ કરવામાં આવેલી અરજી પર પોતાના નિર્ણયમાં આ કોમેન્ટ્સ આપી હતી. નીચલી અદાલતે પતિ-પત્ની વચ્ચે છૂટાછેડાને મંજૂરી આપી હતી. જેની સામે પત્નીએ હાઈકોર્ટમાં અપીલ કરી હતી. હાઈકોર્ટે પત્નીની અપીલ ફગાવી દીધી છે.
પતિને કહેતી હતી હિજડા
આ કેસમાં પતિની માતાએ જુબાની આપી હતી. પુત્રવધૂ તેના પતિને હિજડા કહેતી હતી. હાઈકોર્ટે કહ્યું કે તે સ્પષ્ટ છે કે પત્નીની હરકતો અને વર્તન ક્રૂરતા સમાન છે. કોર્ટે કહ્યું- પહેલા પતિને હિજડા કહેવું અને સાસુને કહેવું કે તેણે હિજડાને જન્મ આપ્યો છે તે ક્રૂર કૃત્ય છે.
પત્ની શારીરિક સંબંધોનું વીડિયો રેકોર્ડિંગ કરતી
વાસ્તવમાં આ કપલે ડિસેમ્બર 2017માં લગ્ન કર્યા હતા. પતિએ છૂટાછેડાની અરજીમાં આરોપ લગાવ્યો હતો કે તેની પત્ની મોડી રાત સુધી જાગતી રહેતી અને તેની બીમાર માતાને કહેતી હતી કે તેને પહેલા માળે ભોજન આપે.
પતિએ એવો પણ આરોપ લગાવ્યો હતો કે તેની પત્ની પોર્ન અને મોબાઈલ ગેમ્સની લત ધરાવે છે. પતિનો આરોપ છે કે તેની પત્ની તેને સેક્સનો સમયગાળો રેકોર્ડ કરવા કહેતી હતી અને એ પણ કહ્યું હતું કે “સેક્સ એક વખતમાં ઓછામાં ઓછા 10-15 મિનિટ સુધી ચાલવું જોઈએ અને રાત્રે ઓછામાં ઓછો ત્રણ વખત કરવું જોઈએ”.
પત્નીએ આપ્યા આવા જવાબો
પતિએ કહ્યું કે, પત્ની તેને ટોણા મારતી હતી કે તે “શારીરિક રીતે તેની સાથે પથારીમાં રહેવા માટે યોગ્ય નથી”. પત્નીએ એમ પણ કહ્યું હતું કે તે બીજા કોઈ સાથે લગ્ન કરવા માગે છે. જવાબમાં પત્નીએ આરોપોને નકારી કાઢ્યા હતા અને કહ્યું હતું કે, પતિએ તેને તેના સાસરિયામાંથી કાઢી મૂકી હતી. પત્નીએ એવો પણ આરોપ મૂક્યો હતો કે તેના સાસરિયાઓએ તેને નશીલી દવા પણ આપી હતી. જેના કારણે તે બેભાન થઈ ગઈ હતી અને “તે અવસ્થા દરમિયાન તેઓએ તેના ગળામાં તાવીજ બાંધ્યું હતું અને તેને નશીલું પાણી પીવડાવ્યું હતું જેથી તેઓ તેને કાબૂ કરી શકે”.
હાઈકોર્ટે કહ્યું આવું
અપીલમાં પત્નીએ કહ્યું કે, નીચલી અદાલતે તેના પતિ અને તેની મા ની જુબાની પર ખોટી રીતે વિશ્વાસ કર્યો. નીચલી અદાલતે છૂટાછેડાની મંજૂરી આપીને યોગ્ય નિર્ણય આપ્યો નથી. પત્નીએ કહ્યું કે તેના સાસરિયાંમાં તેની સાથે ક્રૂરતા થઈ રહી છે. જો કે હાઈકોર્ટે કહ્યું કે, આ આરોપ સાબિત થયો નથી. કારણ કે પત્નીએ તેના માતા-પિતા અથવા કોઈ નજીકના સંબંધી દ્વારા તેની સાથે કરવામાં આવેલી ક્રૂરતા વિશે સાક્ષી આપી ન હતી. આ સિવાય કોર્ટે એમ પણ કહ્યું કે નીચલી અદાલતે પતિ વિરુદ્ધ ઘરેલુ હિંસાનો આરોપ લગાવતી પત્નીની અરજીને ફગાવી દીધી હતી. હાઈકોર્ટે કહ્યું કે, રેકોર્ડમાં એવું કંઈ નથી જે દર્શાવે છે કે નીચલી કોર્ટનો નિર્ણય ખોટો છે.
આવો આપ્યો નિર્ણય
હાઈકોર્ટે જણાવ્યું હતું કે, પત્નીની તમામ ક્રિયાઓ અને આચરણને ધ્યાનમાં લઈને અને બંને પક્ષો છેલ્લા છ વર્ષથી અલગ રહેતા હોવાને ધ્યાનમાં લઈને ફેમિલી કોર્ટે યોગ્ય ચુકાદો આપ્યો છે કે પક્ષકારો વચ્ચેના લગ્ન તૂટી ગયા છે. કોર્ટે એમ પણ કહ્યું હતું કે બંને પક્ષો છેલ્લા છ વર્ષથી અલગ રહે છે અને તેમની ફરી મુલાકાત થવાની કોઈ શક્યતા નથી. આવી સ્થિતિમાં હાઈકોર્ટે છુટાછેડા આપવા એવું ફેમિલી કોર્ટના નિર્ણયને યથાવત રાખ્યો હતો અને પત્નીની અપીલને ફગાવી દીધી હતી.
