Stock Market Crash: નિફ્ટી વર્ષના નીચલા સ્તરે, સેન્સેક્સ 52 હજારની નીચે, જાણો શેરબજારમાં શા માટે ઘટાડો થયો?
હાલમાં સેન્સેક્સમાં સમાવિષ્ટ મોટા ભાગના શેરો (Stocks) નુકસાન સાથે ટ્રેડ થઈ રહ્યા છે. સૌથી મોટો ઘટાડો ટાટા સ્ટીલમાં જોવા મળ્યો છે, શેર 5 ટકાથી વધુ તૂટ્યો છે. બીજી તરફ વિપ્રો, ટેક મહિન્દ્રા અને ભારતી એરટેલ 4-4 ટકાથી વધુ તૂટ્યા છે.
શેરબજારમાં (Stock Market Today) આજે શરૂઆતી ઉછાળા બાદ ફરી એકવાર ઘટાડાનો દબદબો રહ્યો છે. સેન્સેક્સ (Sensex Today) હાલમાં 1000થી વધુ પોઈન્ટના નુકસાન સાથે ટ્રેડ કરી રહ્યો છે. બીજી તરફ નિફ્ટી 15400 ની નીચે સરકી ગયો છે. ટ્રેડિંગ દરમિયાન નિફ્ટીએ એક વર્ષની નીચી સપાટી 15344 બનાવી છે. બજારમાં આ તીવ્ર ઘટાડાથી રોકાણકારોના લગભગ 5 લાખ કરોડ રૂપિયા ડૂબી ગયા છે. હાલમાં સેન્સેક્સમાં સમાવિષ્ટ મોટા ભાગના શેરો નુકસાન સાથે ટ્રેડ થઈ રહ્યા છે. સૌથી મોટો ઘટાડો ટાટા સ્ટીલમાં જોવા મળ્યો છે, શેર 5 ટકાથી વધુ તૂટ્યો છે. બીજી તરફ વિપ્રો, ટેક મહિન્દ્રા અને ભારતી એરટેલ 4-4 ટકાથી વધુ તૂટ્યા છે. ટ્રેડિંગ દરમિયાન તમામ સેક્ટર ઈન્ડેક્સમાં ઘટાડો જોવા મળ્યો છે. સ્મોલકેપ શેરોમાં સૌથી વધુ ઘટાડો જોવા મળ્યો છે. સ્મોલકેપ 50 અને સ્મોલકેપ 100માં 3-3 ટકાથી વધુનો ઘટાડો થયો છે.
શેરબજાર કેમ ઘટ્યું?
બજારના ઘટાડા માટે અનેક પરિબળો મહત્ત્વના રહ્યા છે. ફેડરલ રિઝર્વે 2022-2023 માટે યુએસ વૃદ્ધિના અનુમાનમાં ઘટાડો કર્યો છે. આ સાથે, ઘણા માર્કેટ લીડર્સે અનુમાન લગાવ્યું છે કે વર્ષ 2022માં ફેડરલ રિઝર્વ દરોમાં 1.75 ટકાનો વધારો કરી શકે છે. તે જ સમયે, બજારમાં એવી આશંકા પણ વ્યક્ત કરવામાં આવી છે કે કેન્દ્રીય બેંકો દ્વારા દરોમાં તીવ્ર વધારાને કારણે મંદીનું જોખમ હોઈ શકે છે. આના કારણે બજારને લઈને રોકાણકારોનું સેન્ટિમેન્ટ ખરાબ થયું છે અને રોકાણકારો તેમને મળેલી દરેક તક પર રોકાણ ખેંચી રહ્યા છે.
આ સાથે FPIની વેચવાલી ચાલુ છે. જેના કારણે બજારને રિકવર થવાની તક મળી રહી નથી. જૂનમાં અત્યાર સુધીમાં FPIs એ લગભગ 25 હજાર કરોડ રૂપિયાનું વેચાણ કર્યું છે. આ સિવાય સ્થાનિક બજાર અન્ય વિદેશી બજારોમાંથી પણ સંકેતો લઈ રહ્યું છે. શરૂઆતી ઉછાળા બાદ મોટાભાગના એશિયન બજારોમાં ઘટાડો જોવા મળ્યો છે. તે જ સમયે, યુરોપિયન માર્કેટમાં પણ દબાણ જોવામાં આવ્યું છે. જેના કારણે સ્થાનિક બજાર પણ ખોટમાં આવી ગયું છે.
આ અગાઉ સતત 4 દિવસ બજારમાં નુકસાન નોંધાયું હતું. બુધવારે 152 પોઈન્ટ ઘટીને 52541ના સ્તરે અને નિફ્ટી 42 પોઈન્ટના ઘટાડા સાથે 15692ના સ્તરે બંધ થયા હતા. આજે સેન્સેક્સ 53,018.91 ઉપર ખુલ્યો હતો જે બુધવારની બંધ સપાટીથી 477.52 અંક અથવા 0.91% ઉપર હતો. નિફટી પણ તેજી સાથે 140.10 પોઇન્ટ અથવા 0.89% વધારા સાથે ઉછળ્યો. આજે નિફટી 15,832.25 ઉપર ખુલ્યો હતો.
ફેડરલ રિઝર્વે વ્યાજ દરમાં 28 વર્ષનો સૌથી મોટો વધારો કર્યો
અમેરિકામાં ફુગાવાને અંકુશમાં લેવા માટે યુએસ ફેડરલ રિઝર્વે મોટો નિર્ણય લીધો છે. યુએસ ફેડરલ રિઝર્વે 15 જૂન 2022ના રોજ વ્યાજ દરોમાં 75 બેસિસ પોઈન્ટ અથવા 0.75 ટકાના વધારાની જાહેરાત કરી છે. ફેડના નિર્ણય બાદ વ્યાજ દરો વધીને 1.75 ટકા થઈ ગયા છે. આ 28 વર્ષમાં સૌથી મોટો વધારો છે. 75 bps નો વધારો 1994 પછી સૌથી વધુ છે. તમને જણાવી દઈએ કે અમેરિકામાં મોંઘવારી 40 વર્ષની ટોચે છે. મે મહિનામાં અમેરિકામાં મોંઘવારી દર 8.6 ટકા હતો.
