Premanand Maharaj : શું મૃત્યુ પછી પરિવારના સભ્યો સાથેના સંબંધો તૂટી જાય છે? પ્રેમાનંદ મહારાજે જણાવ્યું ગહન સત્ય

જીવન અને મૃત્યુ બંને માનવ અસ્તિત્વના ગહન સત્ય છે. જીવન દરમિયાન વ્યક્તિ અનેક સંબંધોમાં બંધાય છે, પરંતુ મૃત્યુ પછી આ સંબંધોનું શું થાય છે – આ પ્રશ્ન ઘણા લોકોને વિચારમાં મૂકે છે. શું આત્મા મૃત્યુ બાદ પોતાના પરિવાર, ઓળખ અને લાગણીઓને યાદ રાખે છે? આ વિષય પર તાજેતરમાં એક મહિલાએ આધ્યાત્મિક ગુરુ પ્રેમાનંદ મહારાજને પ્રશ્ન કર્યો હતો.

મહિલાએ પૂછ્યું હતું કે શું મૃત્યુ પછી પરિવાર સાથેના સંબંધો ટકી રહે છે કે સંપૂર્ણપણે તૂટી જાય છે. મહિલાને જવાબ આપતાં પ્રેમાનંદ મહારાજે કહ્યું કે મૃત્યુ સાથે તમામ સાંસારિક સંબંધો સમાપ્ત થઈ જાય છે. તેમના જણાવ્યા મુજબ, મૃત્યુ ગાઢ નિંદ્રા કરતાં પણ વધુ ઊંડી અવસ્થા છે, જેમાં કોઈ યાદ, ઓળખ કે લાગણી રહેતી નથી.

પ્રેમાનંદ મહારાજે જણાવ્યું કે જેમ ગાઢ નિંદ્રામાં વ્યક્તિને કંઈ યાદ રહેતું નથી, તેમ મૃત્યુ પછી પણ કોઈ સંસ્મરણ રહેતું નથી. તેમણે ઉદાહરણ આપતાં કહ્યું કે બાળક નવ મહિના માતાના ગર્ભમાં રહે છે, પરંતુ જન્મ પછી તેને તે સમયની કોઈ યાદ રહેતી નથી. એ જ રીતે, મૃત્યુ પછી આત્મા પોતાના પૂર્વ જીવનના સંબંધોને યાદ રાખતો નથી.

મહારાજના જણાવ્યા અનુસાર, મૃત્યુ સાથે પરિવાર, પત્ની, સંતાન, મિલકત, બેંક બેલેન્સ, પદ અને પ્રતિષ્ઠા-બધું અહીં જ રહી જાય છે. આત્મા સાથે માત્ર તેના કર્મોના પરિણામો જ આગળની યાત્રામાં જોડાય છે. સંબંધો શરીર અને સંજોગો પર આધારિત હોય છે અને શરીરનો અંત આવતાં જ આ બંધનો પણ તૂટી જાય છે.

પ્રેમાનંદ મહારાજે અંતમાં જણાવ્યું કે સંબંધો આ દુનિયામાં જન્મ પછી શરૂ થાય છે અને મૃત્યુ સાથે તેમનો અંત આવે છે. આત્માની યાત્રામાં કર્મ જ સત્ય છે, બાકી બધું ક્ષણિક છે.