Surat Diamond export : સુરતના આવશે સોનાના દિવસો, હીરા ઉદ્યોગમાં ફરી તેજીના એંધાણ

સુરતના હીરા ઉદ્યોગમાં લાંબા સમયથી ચાલી રહેલી મંદી બાદ હવે તેજીના સંકેતો જોવા મળી રહ્યા છે. નવેમ્બર મહિનામાં હીરા એક્સપોર્ટમાં નોંધપાત્ર વધારો થયો છે, જેના કારણે સમગ્ર ઉદ્યોગમાં નવી આશા જાગી છે. ખાસ કરીને અમેરિકાથી ઓર્ડર ફરી શરૂ થતાં હીરા વેપારમાં રેકોર્ડ બ્રેક ઉછાળો નોંધાયો છે.

નાતાલ (ક્રિસમસ) તહેવારના આગમન સાથે જ અમેરિકન બજારમાંથી નેચરલ તેમજ લેબગ્રોન ડાયમંડના ઓર્ડરમાં મોટો વધારો જોવા મળ્યો છે. અગાઉ ટેરિફ અને વૈશ્વિક આર્થિક પરિસ્થિતિના કારણે સર્જાયેલી મંદી હવે ધીમે ધીમે તૂટતી દેખાઈ રહી છે, જે હીરા ઉદ્યોગ માટે સકારાત્મક સંકેત માનવામાં આવે છે.

હીરા ઉદ્યોગ સાથે જ જ્વેલરી સેક્ટરમાં પણ સારી તેજી જોવા મળી છે. એક્સપોર્ટ વધતા ઉત્પાદન પ્રક્રિયા તેજ બનશે અને તેના સીધા પરિણામરૂપે રોજગારીની નવી તકો ઊભી થવાની શક્યતા છે. વેપારીઓ માને છે કે આગામી મહિનાઓમાં કામનો પ્રવાહ વધુ વધશે.

વેપારીઓને આશા છે કે ક્રિસમસ અને ન્યૂ યર માટે મળતા વધારાના ઓર્ડરના કારણે રોજગારીમાં બમણો વધારો થઈ શકે છે. લાંબા સમય બાદ હીરા ઉદ્યોગમાં આવી સકારાત્મક સ્થિતિ સર્જાતાં સુરત સહિત સમગ્ર હીરા ક્લસ્ટરમાં ઉત્સાહનો માહોલ જોવા મળી રહ્યો છે.