રાજ્યમાં આગામી 5 દિવસ સાર્વત્રિક વરસાદની હવામાન વિભાગની આગાહી
Rain Forecast in Gujarat : રાજ્યમાં આગામી 5 દિવસ માટે સાર્વત્રિક વરસાદ વરસી શકે છે અને હળવાથી મધ્યમ વરસાદી ઝાપટા પડી શકે છે.સાથે જ સૌરાષ્ટ્ર-કચ્છમાં પણ હળવાથી મધ્યમ વરસાદી ઝાપટા પડવાની આગાહી કરવામાં આવી છે.
GANDHINAGAR : રાજ્યમાં વરસાદી સિસ્ટમ સક્રિય છે અને આગામી 5 દિવસ રાજ્યમાં સાર્વત્રિક વરસાદ વરસી શકે છે…હવામાન વિભાગે આગાહી કરી છે કે રાજ્યમાં આગામી 5 દિવસ માટે સાર્વત્રિક વરસાદ વરસી શકે છે અને હળવાથી મધ્યમ વરસાદી ઝાપટા પડી શકે છે.સાથે જ સૌરાષ્ટ્ર-કચ્છમાં પણ હળવાથી મધ્યમ વરસાદી ઝાપટા પડવાની આગાહી કરવામાં આવી છે. તો ભારે વરસાદની આગાહીને પગલે દક્ષિણ ગુજરાતની દરિયાઇ પટ્ટી પરના માછીમારોને દરિયો ન ખેડવા સૂચના આપવામાં આવી છે.મહત્વપૂર્ણ છે કે મેઘરાજા અંતિમ ઇનિંગમાં ધમાકેદાર બેટિંગ કરી રહ્યા છે…અને રાજ્યભરના જળાશયોમાં પાણીની નવી આવક નોંધાઇ છે.
ઉલ્લેખનીય છે કે આગામી 5 દિવસ રાજ્યમાં સાર્વત્રિક વરસાદની હવામાન વિભાગે આગાહી કરી છે, ત્યારે ખેડૂતો માટે આ રાહતના મોટા સમાચાર કહી શકાય. સાથે જ રાજ્યમાં 35 ટકા વરસાદની ઘટ પણ ચાલુ સપ્ટેમ્બર માસમાં પૂર્ણ થાય તેવી સંભાવના વ્યક્ત કરાઇ છે.
વરસાદની આગાહી પર નજર કરીએ તો ઉત્તર ગુજરાતના બનાસકાંઠા, ગાંધીનગર, ખેડા, અમદાવાદ અને આણંદમાં ભારેથી અતિભારે વરસાદની આગાહી હવામાન વિભાગે કરી છે…તો સૌરાષ્ટ્રના શહેરો સુરેન્દ્રનગર, રાજકોટ, મોરબી અને બોટાદમાં પણ ભારેથી અતિભારેની આગાહી કરવામાં આવી છે.
જ્યારે જામનગર,પાટણ, મહેસાણા, સાબરકાંઠા, અરવલ્લી, પંચમહાલ, દાહોદ, મહીસાગર, નવસારી, વલસાડ અને દમણ તથા દાદરાનગર હવેલીમાં ભારે વરસાદની આગાહી હવામાન વિભાગે કરી છે.
