ટામેટાના ભાવ તળિયે જતા ખેડૂતો ચિંતામાં મુકાયા, ટામેટાની ખરીદી ટેકાના ભાવે કરાવવા ખેડૂતોની સરકારને માગ

ગુજરાતમાં ટામેટાના ભાવ તળિયે પહોંચતા જગતનો તાત દુઃખી જોવા મળી રહ્યો છે. ખેડૂતો પડતર કિંમત કરતા પણ નીચા ભાવે ટામેટા વેચવા માટે મજબુર બની ગયા છે. ત્યારે અમદાવાદ APMCમાં ટામેટાના ભાવની શું સ્થિતિ છે તે TV9 ગુજરાતીએ જાણવાનો પ્રયાસ કર્યો હતો. ત્યારે સામે આવ્યુ હતુ કે, ટામેટાની નિકાસ અટકતા તેમજ ગત વર્ષની સરખામણીએ આ વર્ષે ઊંચું વાવેતર થતા ભાવ ઘટ્યા છે. તો બીજી તરફ રાજકોટના ધોરાજીમાં ખેડૂતો સારા ભાવ ન મળતા મૂંઝવણમાં મુકાયા છે.

આ વર્ષે 1.84 લાખ હેક્ટરમાં ટામેટાનું વાવેતર થયું

હાલ APMCમાં મણ ટામેટાના ભાવ 100થી 120 રૂપિયા છે. જો કે બે દિવસ પહેલા મણ ટામેટાના ભાવ 60 રૂપિયા હતા. આજે મણ ટામેટાના ભાવ સરેરાશ 120ની આજુબાજુ રહ્યાં છે. તેમ છતાં પડતર કિંમત કરતા પણ નીચા ભાવે ટામેટા વેચવા ખેડૂતો મજબુર બન્યા છે. વેપારીઓ તેમનો નફો મેળવી લે છે પરંતુ ખેડૂતોને મજબૂરીમાં માલ વેચવો પડે છે.

સાથે જ ટામેટાની નિકાસ અટકતા તેમજ ગત વર્ષની સરખામણીએ ઊંચું વાવેતર થતા ભાવ ઘટ્યા છે. આપને કહી દઇએ કે ગત વર્ષે ગુજરાતમાં 1.58 લાખ હેક્ટરમાં ટામેટાનું વાવેતર થયેલું જેની સરખામણીએ આ વર્ષે 1.84 લાખ હેક્ટરમાં ટામેટાનું વાવેતર થયું છે. વધુ વાવેતર અને મબલખ ઉત્પાદનના કારણે ભાવ ઘટી ગયા છે.

ધોરાજીના ખેડૂતો મૂંઝવણમાં

શાકભાજીના સતત ઘટતા ભાવથી ધોરાજી પંથકના ખેડૂતો મૂંઝવણમાં છે. ધોરાજી પંથકમાં ખેડૂતોએ શાકભાજીનું પુષ્કળ પ્રમાણમાં વાવેતર કર્યું છે. વાવેતરના સમયે મોંઘા ભાવના બિયારણ, જંતુનાશક દવા સહિતનો અઢળક ખર્ચ ખેડૂતોને કરવો પડે છે. તો બીજી તરફ ખેડૂતો ઉપજનું વેચાણ કરવા જાય ત્યારે તેમને પોષણક્ષણ ભાવ મળતા નથી. હાલમાં ધોરાજીમાં ટામેટાનું પુષ્કળ પ્રમાણમાં ઉત્પાદન થયુ છે. ત્યારે ટામેટાના પ્રતિ મણના ભાવ માત્ર 45 થી 50 રૂપિયા જ મળી રહ્યા છે. ઓછા ભાવ મળતા ટામેટા કે અન્ય શાકભાજીને યાર્ડ સુધી પહોંચાડવાનો ખર્ચ પણ માથે પડે તેવી સ્થિતિ સર્જાતા ખેડૂતો દુ:ખી જોવા મળી રહ્યા છે.

Related Content